ഒന്നര മണിക്കൂറില് കോവിഡ് നിര്ണയം; ലാംപോര് പരിശോധനയുമായി ബ്രിട്ടന്
കൊറോണ പ്രതിരോധത്തിനു അതി നിര്ണായകമായ കാര്യമാണ് അതിവേഗ പരിശോധനയും രോഗനിര്ണയവും. രോഗമുളളവരെ കണ്ടെത്തുകയും ഐസലേഷനിലാക്കുകയും രോഗസാധ്യതയുള്ളവരെ ക്വാറന്റീനിലാക്കുകയും ചെയ്തില്ലെങ്കില് വൈറസിന്റെ സമൂഹവ്യാപനത്തിന് അത് കാരണമാകും. എന്നാല് നിലവിലെ പരിശോധനകളില് പലതിനും ഫലം ലഭിക്കാന് 24 മണിക്കൂറിലേറെ സമയം ആവശ്യമായി വരുന്നു. രോഗനിര്ണയത്തിലെ ഈ കാലതാമസം ഒഴിവാക്കാന് ലാംപോര് എന്ന പേരില് പുതിയ പരിശോധന യുമായി മുന്നോട്ട് വന്നിരിക്കുകയാണ് ബ്രിട്ടന്. കയ്യിലൊതുങ്ങുന്ന ഈ ഉപകരണം കൊണ്ട്, ലാബില് പോകാതെ ഒന്നരമണിക്കൂറില് കൊറോണ നിര്ണയം നടത്താനാകും.
അതുകൊണ്ടുതന്നെ പ്രാധാന്യം കണക്കിലെടുത്ത് ഈ ഓണ് ദ് സ്പോട്ട് സ്വാബ് ടെസ്റ്റുകള് വ്യാപകമാക്കാന് ഒരുങ്ങുകയാണ് ബ്രിട്ടിഷ് സര്ക്കാര്. പരിശോധന രോഗികളുടെ പടിവാതിക്കല് എത്തിക്കാന് ഈ യന്ത്രത്തിനാകും. ഓള്ഡ് ഏജ് ഹോമുകള് ഉള്പ്പെടെയുള്ള ഇടങ്ങളില് യന്ത്രമെത്തിച്ച് പരിശോധന നടത്തും. കോവിഡിന് പുറമേ ഇന്ഫ്ളുവന്സ എ, ഇന്ഫ്ളുവന്സ ബി തുടങ്ങിയ ചില അണുബാധകളെയും ഒറ്റ സാംപിളില് തിരിച്ചറിയാം എന്നതാണ് ലാംപോര് ടെസ്റ്റിന്റെ സവിശേഷത.
ഇന്ത്യന് വംശജനായ ഗോര്ഡന് സങ്കേര സിഇഒ ആയ ഓക്സ്ഫര്ഡ് നാനോപോറാണ് ലാംപോര് സ്വാബ് ടെസ്റ്റിനുള്ള ഉപകരണം ലഭ്യമാക്കുക. കയ്യിലൊതുങ്ങുന്ന മിനിയോണ് യന്ത്രത്തിന് പ്രതിദിനം 2000 പരിശോധനകള് നടത്താനാകും. ഇതിന്റെ തന്നെ ഡെസ്ക്ടോപ് ഗ്രിഡിയോണ് യന്ത്രം പ്രതിദിനം 15,000 പരിശോധനകള് നടത്തും എന്നതും ഇതിന്റെ സവിശേഷതയാണ്.
https://www.facebook.com/Malayalivartha