ദേശീയ സുരക്ഷാ നിയമം: ഹോങ്കോങ്ങില്‍ മാധ്യമ ഉടമ അറസ്റ്റില്‍
ചൈന ഹോങ്കോങ്ങില്‍ മാധ്യമങ്ങള്‍ക്കെതിരേ നടപടി തുടങ്ങി. ആറാഴ്ച മുന്‍പ് ഏര്‍പ്പെടുത്തിയ ദേശീയ സുരക്ഷാ നിയമത്തിന്റെ മറവിലാണ് നടപടി. വിദേശ ശക്തികളുമായി ഗൂഢാലോചന നടത്തിയെന്ന് ആരോപിച്ച് കടുത്ത ചൈന വിമര്‍ശകനായ മാധ്യമ പ്രമുഖന്‍ ജിമ്മി ലായി (71) യെ പൊലീസ് അറസ്റ്റ് ചെയ്തു.
ചൈന വിരുദ്ധ പ്രക്ഷോഭങ്ങളില്‍ സജീവമായി പങ്കെടുക്കാന്‍ ലായിയുടെ ഉടമസ്ഥതയിലുള്ള പത്രം കഴിഞ്ഞ വര്‍ഷം ജനങ്ങളെ പ്രോത്സാഹിപ്പിച്ചിരുന്നു. ലായിയുടെ നെക്സ്റ്റ് ഡിജിറ്റല്‍ ഗ്രൂപ്പിന്റെ കേന്ദ്ര ഓഫിസ് റെയ്ഡ് ചെയ്ത പൊലീസ്, കമ്പനിയുടെ ഉന്നത ഉദ്യോഗസ്ഥരടക്കം മറ്റ് 8 പേരെക്കൂടി അറസ്റ്റ് ചെയ്തിട്ടുണ്ട്. ഹോങ്കോങ് ജനാധിപത്യ പ്രക്ഷോഭത്തെ ശക്തമായി പിന്തുണയ്ക്കുന്ന ആപ്പിള്‍ ഡെയ്‌ലി പത്രം പ്രവര്‍ത്തിക്കുന്നതും ഈ ഓഫിസില്‍ നിന്നാണ്.
മുന്നറിയിപ്പ് അവഗണിച്ച് ലായും മറ്റുള്ളവരും നടപടികള്‍ ഫെയ്‌സ്ബുക്കിലൂടെ സംപ്രേഷണം ചെയ്തു. റെയ്ഡ് വാര്‍ത്തയറിഞ്ഞ് ആയിരക്കണക്കിനാളുകള്‍ ഓഫിസിനു മുന്‍പില്‍ തടിച്ചുകൂടി. ഹോങ്കോങ്ങില്‍ ആദ്യമായാണ് ഒരു മാധ്യമ സ്ഥാപനത്തില്‍ പൊലീസ് ഇത്തരത്തില്‍ റെയ്ഡ് നടത്തുന്നതെന്ന് ആപ്പിള്‍ ഡെയ്‌ലി എഡിറ്റര്‍ ഇന്‍ ചാര്‍ജ് റയാന്‍ ലോ പറഞ്ഞു.
https://www.facebook.com/Malayalivartha
