പരീക്ഷണത്തിന്റെ മൂന്നാംഘട്ടത്തിലുള്ളവ എന്ന് ലോകാരോഗ്യ സംഘടന അംഗീകരിച്ച സാധ്യതാ വാക്‌സീനുകളുടെ പട്ടികയില്‍ റഷ്യയുടെ വാക്‌സീന്‍ ഇല്ലായിരുന്നു. വാക്‌സീന്‍ പരീക്ഷണത്തില്‍ പാലിക്കേണ്ട നടപടിക്രമങ്ങള്‍ ഉറപ്പാക്കണമെന്ന് ലോകാരോഗ്യ സംഘടന നിര്‍ദേശിച്ച് ഒരാഴ്ചയ്ക്കുള്ളിലാണ് റഷ്യ വാക്‌സീന് അംഗീകാരം നല്‍കിയത്.

ആദ്യ 2 ഘട്ടങ്ങളില്‍ നിന്നു വ്യത്യസ്തമായി കൂടുതല്‍ വൊളന്റിയര്‍മാരില്‍ വ്യാപകമായി പരീക്ഷിച്ചു വാക്‌സീന്റെ ഫലപ്രാപ്തിയും സുരക്ഷിതത്വവും ഉറപ്പാക്കുന്ന മൂന്നാംഘട്ടം നിര്‍ണായകമാണ്. വാക്‌സീന്‍ വ്യാപക ഉപയോഗത്തിനായി നിര്‍മിക്കാന്‍ തുടങ്ങുകയാണെന്നും പരീക്ഷണ ഘട്ടം പൂര്‍ത്തിയായെന്നും കഴിഞ്ഞ ആഴ്ച റഷ്യ പ്രഖ്യാപിച്ചിരുന്നു. ഇതേത്തുടര്‍ന്നായിരുന്നു വിദഗ്ധരും ലോകാരോഗ്യ സംഘടനയും അടക്കം മുന്നറിയിപ്പു നല്‍കിയത്.

ജൂണ്‍ 18-നായിരുന്നു മോസ്‌കോയിലെ ഗമാലിയ ഗവേഷണ സര്‍വകലാശാല വികസിപ്പിച്ച വാക്‌സീന്‍ മൂന്നാംഘട്ട പരീക്ഷണം തുടങ്ങിയത്്. 38 പേരില്‍ നടന്ന ആദ്യ ഘട്ട പരീക്ഷണം കഴിഞ്ഞ് രണ്ടാം ഘട്ടത്തില്‍ 1000 പേര്‍ക്ക് വാക്‌സീന്‍ നല്‍കി. ജൂലൈ 20-ന് ആശുപത്രി വിട്ട വൊളന്റിയര്‍മാരില്‍ ശക്തമായ പ്രതിരോധശേഷി രൂപപ്പെട്ടെന്നാണ് അവകാശവാദം. തുടര്‍ന്ന് മൂന്നാം ഘട്ടത്തിനു തുടക്കമിട്ട് അന്തിമ ഫലം പരസ്യപ്പെടുത്തുന്നതിനു മുന്‍പാണ് വാക്‌സീന്‍ ഉപയോഗിക്കാന്‍ അനുമതി നല്‍കിയത്.

ലോകത്തിലെ പ്രധാന മരുന്നുത്പാദക കമ്പനികളെ പ്രതിനിധീകരിക്കുന്ന മോസ്‌കോയിലെ അസോസിയേഷന്‍ ഓഫ് ക്ലിനിക്കല്‍ ട്രയല്‍സ് ഓര്‍ഗനൈസേഷനും പരീക്ഷണം പൂര്‍ണമാകുന്നതു വരെ, വാക്‌സീന് അംഗീകാരം നല്‍കരുതെന്ന് റഷ്യന്‍ സര്‍ക്കാരിനോട് ആവശ്യപ്പെട്ടിരുന്നെങ്കിലും പുടിന്‍ തീരുമാനവുമായി മുന്നോട്ടുപോയി.

മികച്ച പ്രതിരോധശേഷി ഉറപ്പാക്കിയാണ് വാക്‌സീന്‍ ലഭ്യമാക്കുന്നതെന്നാണു റഷ്യയുടെ വാദം. ഇതു സംബന്ധിച്ച ആശങ്കകളെല്ലാം റഷ്യന്‍ പ്രസിഡന്റ് വ്‌ലാഡിമിര്‍ പുടിന്‍ തള്ളി. ഫലപ്രദവും സുരക്ഷിതവുമായ വാക്‌സീന്‍ നല്ല പ്രതിരോധശേഷി നല്‍കുമെന്നും എല്ലാ നടപടിക്രമവും പാലിച്ചതായും അദ്ദേഹം പറഞ്ഞു.

ആദ്യം പ്രഖ്യാപിക്കുന്നതിലല്ല, സുരക്ഷിതവും ഫലപ്രദവുമായ വാക്‌സീന്‍ കണ്ടെത്തുകയെന്നതാണ് പ്രധാനമെന്നായിരുന്നു യുഎസ് ആരോഗ്യ സെക്രട്ടറി അലക്‌സ് അസറിന്റെ പ്രതികരണം. 160 സാധ്യതാ വാക്‌സീനുകളാണ് നിലവില്‍ പരീക്ഷണ ഘട്ടത്തിലുള്ളത്. ഇതില്‍ 27 എണ്ണത്തിനാണ് മനുഷ്യരില്‍ പരീക്ഷണത്തിന് അനുമതി നല്‍കിയിട്ടുള്ളത്.

ആരോഗ്യമന്ത്രി മിഖായേല്‍ മുറഷ്‌കോ പറഞ്ഞത് കോവിഡിനെതിരെ മനുഷ്യരാശിയുടെ വിജയമാണിതെന്നായിരുന്നു. വാക്‌സീന്റെ മൂന്നാം ഘട്ട ട്രയല്‍ യുഎഇയിലും ഫിലിപ്പീന്‍സിലും വൈകാതെ തുടങ്ങും. ഉല്‍പാദനത്തിന് 5 രാജ്യങ്ങളിലെ കമ്പനികളുമായാണ് കരാറുണ്ടാക്കിയിട്ടുള്ളത്.

ഇതുപ്രകാരം, പ്രതിവര്‍ഷം 50 കോടി ഡോസ് ഉല്‍പാദനം ഉറപ്പാക്കി കഴിഞ്ഞു. റഷ്യയുടെ വാക്‌സീന്‍ വാങ്ങാന്‍ താല്‍പര്യപ്പെവരുടെ കൂട്ടത്തില്‍ ലാറ്റിന്‍ അമേരിക്കന്‍ രാജ്യങ്ങളും അറബ്-ഏഷ്യന്‍ രാജ്യങ്ങളുമുണ്ട്. വാക്‌സീന് അംഗീകാരം നല്‍കിയെങ്കിലും ഈ വര്‍ഷം അവസാനമോ അടുത്ത വര്‍ഷം ആദ്യമോ മാത്രമായിരിക്കും വ്യാപകമായ തോതില്‍ വിതരണം ചെയ്യാന്‍ കഴിയുക.