കൊളംബിയയില്‍ സമനീഗോയില്‍ ഒരു വീട്ടില്‍ സംഘടിപ്പിച്ച പാര്‍ട്ടിയ്ക്ക് നേരെ നടന്ന അക്രമി സംഘത്തിന്റെ വെടിവയ്പില്‍ 8 പേര്‍ മരിച്ചു. ഏഴ് യുവാക്കളും ഒരു യുവതിയുമാണ് മരിച്ചത്. സംഭവ സമയം 20ഓളം പേരാണ് വീടിനുള്ളിലുണ്ടായിരുന്നത്. അക്രമികള്‍ ആരാണെന്നോ വെടിവയ്പിന് പിന്നിലെ ഉദ്ദേശമെന്താണെന്നോ വ്യക്തമല്ല. അക്രമികളെ കുറിച്ച്് വിവരം നല്‍കുന്നവര്‍ക്ക്് പാരിതോഷികം പ്രഖ്യാപിച്ചിരിക്കുകയാണ് കൊളംബിയ സര്‍ക്കാര്‍. 53,000 ഡോളറാണ് പാരിതോഷികം പ്രഖ്യാപിച്ചിരിക്കുന്നത്. ഇക്വഡോറുമായി അതിര്‍ത്തി പങ്കിടുന്ന ഈ മേഖലയില്‍ മയക്കുമരുന്ന് മാഫിയയുടെ സാന്നിദ്ധ്യം സജീവമാണ്.

എല്ലാ വര്‍ഷവും ഇവിടെ നടക്കേണ്ടിയിരുന്ന മ്യൂസിക് ഫെസ്റ്റിവല്‍ കൊവിഡിന്റെ പശ്ചാത്തലത്തില്‍ മാറ്റിവച്ചതിനെ തുടര്‍ന്നാണ് ഇവര്‍ ഒരു വീട്ടില്‍ ചെറിയ പാര്‍ട്ടി സംഘടിപ്പിച്ച് ഒത്തുകൂടാന്‍ തീരുമാനിച്ചത്. വെടിവയ്പിന് മുമ്ബ് ചിലര്‍ക്ക് ഫോണുകോളുകളിലൂടെയും വാട്‌സാപ്പിലൂടെയും ഭീഷണി സന്ദേശങ്ങള്‍ എത്തിയിരുന്നതായി റിപ്പോര്‍ട്ടുണ്ട്. മരിച്ചവരെല്ലാം തന്നെ 25ല്‍ താഴെ പ്രായമുള്ളവരാണ്.
തോക്ക് ധാരികളായ നാല് പേരാണ് ആക്രമണത്തിന് പിന്നിലെന്ന് രക്ഷപ്പെട്ടവര്‍ പറയുന്നു.