കൊവിഡിനെതിരെ ആഗോള തലത്തില്‍ പ്രതിരോധ പ്രവര്‍ത്തനവുമായി അമേരിക്ക
കൊവിഡ് വാക്‌സിനേഷന്‍ എടുത്തവര്‍ക്ക് മാസ്‌ക് ധരിക്കല്‍ നിര്‍ബന്ധമല്ലാതാക്കിയ നടപടിക്ക് പിന്നാലെ നൊവിഡ് ആക്ടുമായി അമേരിക്ക. കൊവിഡ് വ്യാപനത്തെ ഒരു പരിധി വരെ ചെറുത്ത അമേരിക്ക, വൈറസിന്റെ മറ്റൊരു വകഭേദമോ വീണ്ടുമൊരു വ്യാപനമോ ഒഴിവാക്കുന്നതിന് പദ്ധതി തയാറാക്കുകയാണ് നൊവിഡ് ആക്ടിലൂടെ.
അമേരിക്കന്‍ കോണ്‍ഗ്രസ് പ്രതിനിധി രാജ കൃഷ്ണമൂര്‍ത്തിയാണ് നൊവിഡ് നിയമം പ്രഖ്യാപിച്ചത്. 2003 മുതല്‍ ദശലക്ഷക്കണക്കിന് പേരുടെ ജീവന്‍ രക്ഷിച്ച എയ്ഡ്‌സ് റിലീഫ് ആക്‌ട്, രണ്ടാം ലോക മഹായുദ്ധകാലത്ത് സഖ്യകക്ഷികളെ സഹായിക്കാന്‍ കൊണ്ടുവന്ന ലെന്‍ഡ് ലീസ് ആക്‌ട് എന്നിവയില്‍ നിന്നാണ് നൊവിഡ് നിയമം എന്ന ആശയം ഉണ്ടായത്. കൊവിഡ് മഹാമാരി ലോകം മുഴുവന്‍ ബാധിച്ച വൈറസാണ്. അതിന്റെ വകഭേദങ്ങള്‍ കൂടുതല്‍ അപകടകാരികളാണ്.
ഈ വ്യാപനത്തെ പ്രതിരോധിക്കുന്നതിന്റെ ഭാഗമായി മറ്റ് രാജ്യങ്ങളെ സഹായിക്കാനുള്ള വിവിധ പദ്ധതികളാണ് നൊവിഡ് ആക്ടിലൂടെ സാധ്യമാക്കുകയെന്ന് രാജ കൃഷ്ണമൂര്‍ത്തി പറഞ്ഞു. നൊവിഡ് നിയമത്തിന് കീഴില്‍ വാക്‌സിന്‍ ഉള്‍പ്പെടെയുള്ള സഹായങ്ങള്‍ ലോകരാജ്യങ്ങള്‍ക്ക് എത്തിക്കാനാണ് അമേരിക്ക ലക്ഷ്യമിടുന്നത്. ആഗോള തലത്തില്‍ വിവിധ രാജ്യങ്ങളെ ഏകോപിപ്പിച്ചാണ് പദ്ധതികള്‍ നടപ്പിലാക്കുക.
https://www.facebook.com/Malayalivartha
