യു.എസില്‍ ആഫ്രിക്കന്‍ വംശജനായ ജോര്‍ജ് ഫ്ലോയ്ഡിന്റെ കഴുത്തില്‍ കാല്‍മുട്ടമര്‍ത്തി കൊന്ന മുന്‍ പോലീസുകാരന്‍ ഡെറിക് ഷോവിന് 22.5 വര്‍ഷം തടവുശിക്ഷ.

മിനിയാപോളിസ് കോടതി ജഡ്ജി പീറ്റര്‍ കാഹിലാണ് ശിക്ഷ വിധിച്ചത്. ഫ്ലോയ്ഡിന്റെ കുടുംബത്തിന്റെ വേദന തിരിച്ചറിയണമെന്ന് ജഡ്ജി പറഞ്ഞു. അധികാരസ്ഥാപനത്തിന്റെ ദുരുപയോഗമാണ് ഒരാളുടെ മരണത്തിന് ഇടയാക്കിയത്.

നിയമത്തിന്റെ അടിസ്ഥാനത്തിലാണ് ശിക്ഷ വിധിച്ചത്. വികാരത്തിനും സഹതാപത്തിനും ഇവിടെ സ്ഥാനമില്ലെന്ന് 22 പേജുള്ള വിധിന്യായത്തില്‍ ജഡ്ജി പറഞ്ഞു.

ഷോവിന്‍ കുറ്റക്കാരനാണെന്ന് നേരത്തേ കോടതി കണ്ടെത്തിയിരുന്നു. 2020 മേയ് 25-നാണ് ഫ്ളോയ്ഡ് കൊല്ലപ്പെട്ടത്. വ്യാജരേഖകള്‍ ഉപയോഗിച്ചെന്ന് ആരോപിച്ചാണ് ഷോവിന്‍ ഫ്ളോയ്ഡിനെ നിലത്തേക്ക് തള്ളിയിട്ടത്.

തുടര്‍ന്ന് കാല്‍മുട്ടുകള്‍കൊണ്ട് കഴുത്തില്‍ ശക്തമായി അമര്‍ത്തി. എട്ടുമിനിറ്റും 46 സെക്കന്‍ഡും ഷോവിന്റെ കാല്‍മുട്ടുകള്‍ ഫ്ലോയ്ഡിന്റെ കഴുത്തിലുണ്ടായിരുന്നുവെന്നാണ് പോസ്റ്റ്മോര്‍ട്ടം റിപ്പോര്‍ട്ട്. 'എനിക്ക് ശ്വാസംമുട്ടുന്നു' എന്ന ഫ്ലോയ്ഡിന്റെ അവസാനനിലവിളി മുദ്രാവാക്യമാക്കി യു.എസിലെങ്ങും പ്രതിഷേധം ശക്തമായിരുന്നു.

അതേസമയം 'നിങ്ങളുടെ കാല്‍മുട്ടുകള്‍ എന്റെ കഴുത്തിലാണ്. എനിക്ക് ശ്വാസംമുട്ടുന്നു'' -മരിക്കുന്നതിന് തൊട്ടുമുമ്പ് ജീവനുവേണ്ടി യാചിക്കുന്ന ഫ്‌ളോയ്ഡിന്റെ ഈ വാക്കുകള്‍ ലോകത്താകമാനം പ്രതിഷേധാഗ്‌നി തീര്‍ത്തിട്ട് ഒരുവര്‍ഷത്തോളമാകുന്നു. 'എനിക്ക് ശ്വാസം മുട്ടുന്നു' എന്ന ഫ്‌ളോയ്ഡിന്റെ വാക്കുകള്‍ വംശവെറിക്കെതിരേ പിന്നീട് ലോകത്താകമാനം അരങ്ങേറിയ പ്രക്ഷോഭങ്ങളുടെ മുദ്രാവാക്യമാവുകയും ചെയ്തു. ഫ്‌ളോയ്ഡിന്റെ മരണത്തോടെയാണ് വംശീയവാദികളും അടിമക്കച്ചവടക്കാരുമായിരുന്ന ചരിത്രനേതാക്കളുടെ പ്രതിമകള്‍ തകര്‍ത്തുകൊണ്ടുള്ള സമരമുറ ലോകത്താകെ ചൂടുപിടിച്ചത്.

ഫ്‌ളോയ്ഡ് വധത്തിന്റെ വീഡിയോ പുറത്തുവന്നതോടെ ഡെറെക് ചൗവിനെയും മറ്റു മൂന്ന് പോലീസുകാരെയും നേരത്തേ സേനയില്‍നിന്ന് പുറത്താക്കിയിരുന്നു. എഫ്.ബി.ഐ.യാണ് ഫ്‌ളോയ്ഡ് വധക്കേസ് അന്വേഷിച്ചത്.