കാനഡയെ ആശങ്കയിലാഴ്​ത്തി കോവിഡ്​ ലാംഡ വകഭേദം വ്യാപിക്കുന്നു​. വ്യാഴാഴ്ച പുതുതായി 11 ലാംഡ കേസുകളാണ്​ രാജ്യത്ത്​ റിപ്പോര്‍ട്ട്​ ചെയ്​തതെന്ന്​ ചീഫ്​ പബ്ലിക്​ ഹെല്‍ത്ത്​ ഓഫിസറായ ഡോ. തെരേസ ടാം വ്യക്തമാക്കുകയുണ്ടായി. കൂടാതെ ലോകത്ത്​ ഏറ്റവും കൂടുതല്‍ മരണനിരക്കുള്ള പെറുവിലാണ്​ ലാംഡ വകഭേദം ആദ്യമായി കണ്ടെത്തിയത്​.

ലാംഡ വകഭേദം എങ്ങനെയാണ്​ പടര്‍ന്ന്​ പിടിക്കുന്നതെന്നും കോവിഡ്​ വാക്​സിനോട്​ അവ എങ്ങനെയാണ്​ പ്രതികരിക്കുന്നതെന്നും കാനഡയിലെ ആരോഗ്യ വിദഗ്​ധര്‍ സൂക്ഷ്​മമായി നിരീക്ഷിച്ച് വരുകയാണ്​. ഇപ്പോള്‍ വളരെ കുറച്ച്‌​ ലാംഡ കേസുകള്‍ മാത്രമാണ്​ റിപ്പോര്‍ട്ട്​ ചെയ്യപ്പെട്ടിട്ടുള്ളതെന്നും കൂടുതല്‍ വിവരങ്ങള്‍ ശേഖരിച്ച്‌​ വരുന്നതേയുള്ളൂവെന്നും തെരേസ മാധ്യമങ്ങളോട് പറഞ്ഞു.

അതോടൊപ്പം തന്നെ ലാംഡ വകഭേദം എം ആര്‍.എന്‍.എ വാക്​സിനുകളായ ഫൈസര്‍- ബയോണ്‍ടെക്​, മൊഡേണ സ്വീകരിച്ചവരിലും രോഗലക്ഷണങ്ങള്‍ ഉണ്ടാക്കുന്നതായി ന്യൂയോര്‍ക്ക്​ സര്‍വകലാശാല ജൂലൈയില്‍ പ്രസിദ്ധീകരിച്ച പഠനത്തില്‍ പറയുന്നു. എന്നാൽ ഇവക്കെതിരെ ഫലപ്രദമാണെന്നാണെന്ന്​ തന്നെയാണ്​ പഠനത്തില്‍ കണ്ടെത്തിയിരിക്കുന്നത്​.

കൂടാതെ ഇന്ത്യയടക്കമുള്ള ലോകരാജ്യങ്ങളില്‍ കനത്ത നാശം വിതച്ച കോവിഡ്​ ഡെല്‍റ്റ വകഭേദത്തേക്കാള്‍ ഭീകരനായ 'ലാംഡ' വകഭേദം 30ലധികം രാജ്യങ്ങളില്‍ കണ്ടെത്തിയതായി യു.കെ ആരോഗ്യ മന്ത്രാലയം ക​ഴിഞ്ഞ ദിവസം പ്രഖ്യാപിക്കുകയും ചെയ്തിരുന്നു. യു.കെയില്‍ ഇതുവരെ ആറ്​ ലാംഡ കേസുകള്‍ റിപ്പോര്‍ട്ട്​ ചെയ്​തിട്ടുണ്ട്​. ലാംഡ വകഭേദം ഡെല്‍റ്റ വകഭേദ​ത്തേക്കാള്‍ വിനാശകാരിയാണെന്ന്​ ഗവേഷകര്‍ കണ്ടെത്തിയതായി 'ദ സ്റ്റാര്‍' റിപ്പോര്‍ട്ട്​ ചെയ്യുകയുണ്ടായി.

അതേസമയം പാന്‍ അമേരിക്കന്‍ ഹെല്‍ത്ത്​ ഓര്‍ഗനൈസേഷന്‍ റിപ്പോര്‍ട്ട്​ പ്രകാരം മേയ്​, ജൂണ്‍ മാസങ്ങളില്‍ പെറുവില്‍ സ്​ഥിരീകരിച്ച 82 ശതമാനം കോവിഡ്​ കേസുകളുടെയും സാംപിളുകള്‍ ലാംഡയുടേതാണെന്ന്​ യൂറോ ന്യൂസ്​ റിപ്പോര്‍ട്ട്​ ചെയ്​തു. ജൂണ്‍ 30നകം എട്ട്​ ലാറ്റിനമേരിക്കന്‍ രാജ്യങ്ങളിലും കരീബിയന്‍ രാജ്യങ്ങളിലും ലാംഡ റിപ്പോര്‍ട്ട്​ ചെയ്​തതായി പി.എ.എച്ച്‌​.ഒ റീജ്യനല്‍ അഡ്വൈസര്‍ ജെയ്റോ മെന്‍ഡസ്​ വ്യക്തമാക്കുകയുണ്ടായി.