6000ത്തിലേറെ ദ്വീപുകളടങ്ങിയ ജപ്പാന്​ 'സമ്മാനമായി' വീണ്ടും ഒരു ദ്വീപ്​ കൂടി. ടോക്യോ നഗരത്തില്‍ നിന്ന്​ 1,200 കിലോമീറ്റര്‍ അകലെ പസഫിക്കിലാണ്​ അടുത്തിടെ നടന്ന സമുദ്രാന്തര ഭൂചലനത്തെ തുടര്‍ന്ന്​ മണ്‍തിട്ട ഉയര്‍ന്നുവന്നത്​. രാജ്യ​ത്തിന്റെ ഏറ്റവും തെക്കേ അറ്റത്ത്​ സ്​ഥിതി ചെയ്യുന്ന മിനാമി ഇയോ​ട്ടോക്ക്​ 50 കിലോമീറ്റര്‍ അകലെയാണ്​ ഒരു കിലോമീറ്റര്‍ മാത്രം വ്യാസമുള്ള 'ദ്വീപ്​'.

ഉയര്‍ന്നുവന്ന മണ്‍തിട്ട കാലത്തെ അതി ജീവിക്കുമോ എന്നാണ്​ ജപ്പാന്‍ നിരീക്ഷിക്കുന്നത്​. അഗ്​നി പര്‍വതത്തില്‍ നിന്ന്​ പുറന്തള്ളിയ ചാരവും മറ്റു വസ്​തുക്കളും ചേര്‍ന്നാണ്​ ഇവ രൂപപ്പെട്ടതെങ്കില്‍ നില നില്‍ക്കാന്‍ സാധ്യത കുറവാണ്​. തുടര്‍ച്ചയായ കടല്‍ത്തിരയിളക്കത്തില്‍ ഇവ വെള്ളത്തോടു ചേര്‍ന്ന്​ ഇല്ലാതാകും. എന്നാല്‍, അഗ്​നി പര്‍വത സ്​ഫോടനത്തിന്​ തുടര്‍ച്ചയുണ്ടാകുകയും ഇനിയും സമാനമായി പുറം തള്ളലുകള്‍ നടക്കുകയും ചെയ്​താല്‍ ഇവ ഉറച്ചു നില്‍ക്കും.

1904, 1914, 1986 വര്‍ഷങ്ങളിലും സമാനമായി ദ്വീപുകള്‍ രൂപപ്പെട്ടിരുന്നുവെങ്കിലും മണ്ണൊലിപ്പ്​ തുടര്‍ന്ന്​ നാമാവശേഷമായിരുന്നു. അതേസമയം, 2013ല്‍ തുടര്‍ച്ചയായ അഗ്​നിപര്‍വത സ്​ഫോടനങ്ങളില്‍ നിഷിനോഷിമയോടു ചേര്‍ന്ന്​ രൂപപ്പെട്ട ഭൂപ്രദേശം ക്രമേണ ഈ ദ്വീപിന്റെ ഭാഗമായി മാറി.

മിനാമി ഇയോ​ട്ടോയില്‍ അഗ്​നി പര്‍വത സ്​ഫോടനം തുടരാന്‍ സാധ്യതയുണ്ടെന്നാണ്​ ജപ്പാന്‍ കാലാവസ്​ഥ വിഭാഗത്തിന്റെ മുന്നറിയിപ്പ്​. ഞായറാഴ്​ച ജപ്പാന്‍ തീരദേശ സേനയാണ്​ പുതിയ ദ്വീപ്​ കണ്ടെത്തിയത്​. കടലിനു നടുവില്‍ അഗ്​നിപര്‍വത ശിലാനിക്ഷേപം പൊങ്ങിക്കിടക്കുന്ന നിലയില്‍ കണ്ടെത്തുകയായിരുന്നു.