ജീവിതത്തില്‍ ആദ്യമായി കൂട്ടുകാരുമൊത്ത് നിശാക്ലബ്ബില്‍ ഘോഷിക്കാന്‍ പോയ 18 കാരിക്ക് സംഭവിച്ചത് കണ്ട് ഞെട്ടിയിരിക്കുകയാണ് ലോകം. ആദ്യമായി നിശാക്ലബ്ബില്‍ എത്തിയ മില്ലീ ടപ്ലിന്‍ എന്ന 18 കാരി മദ്യത്തില്‍ മയക്കുമരുന്ന് ചേര്‍ത്ത് കഴിച്ചതിനെതുടര്‍ന്ന് കാണിക്കുന്ന വിഷമതകളുടെ വീഡിയോ ആണ് മില്ലീയുടെ അമ്മ പുറത്തുവിട്ടത്. ചുണ്ടുകള്‍ വക്രിച്ചും കൈയുകള്‍ വളഞ്ഞുമുള്ള ചിത്രവും അമ്മ പങ്കുവയ്ക്കുന്നു. പൊലീസ് സംഭവം വിശദമായി അന്വേഷിച്ചുകൊണ്ടിരിക്കുകയാണ്. ഇതോടെ നിശാക്ലബ്ബുകളില്‍ എത്തുന്നവര്‍ കൂടുതല്‍ ജാഗരൂകരാകണമെന്ന മുന്നറിയിപ്പും പൊലീസ് നല്‍കുന്നു. ഓര്‍ഡര്‍ നല്‍കിയ മദ്യം മാറ്റിവച്ചിട്ട് മറ്റെവിടെയെങ്കിലും പോകരുതെന്നും ഇത്തരത്തില്‍ എന്തെങ്കിലും വിഷാംശങ്ങള്‍ അതില്‍ ആരെങ്കിലും കലര്‍ത്താന്‍ സാധ്യതയുണ്ടെന്നും അവര്‍ പറയുന്നു. ഇതാദ്യമായാണ് ഇത്തരത്തില്‍ ഒരു സംഭവം ബ്രിട്ടനില്‍ റിപ്പോര്‍ട്ട് ചെയ്യപ്പെടുന്നത്.

ഇക്കഴിഞ്ഞ ശനിയാഴ്ച്ച ഒരു സ്വകാര്യ ആഘോഷത്തിനായാണ് മില്ലീ ജീവിതത്തില്‍ ആദ്യമായി ഒരു നിശാക്ലബ്ബ് സന്ദര്‍ശിക്കുന്നത്. എസ്സെക്‌സ് സൗത്ത് എന്‍ഡിലെ മൂ മൂസിലായിരുന്നു അവര്‍ ആഘോഷങ്ങള്‍ക്കായി എത്തിയത്. അവര്‍ക്ക് നല്‍കിയ മദ്യത്തില്‍ എന്തോ കലര്‍ത്തിയതായി സംശയിക്കപ്പെടുന്നു. മദ്യം കഴിച്ചതിനെ തുടര്‍ന്ന് അസ്വസ്ഥതകള്‍ പ്രകടിപ്പിക്കാന്‍ തുടങ്ങിയ ഈ പെണ്‍കുട്ടിയെ ഉടനെ ആശുപത്രിയിലേക്ക് മാറ്റുകയായിരുന്നു.
ചുണ്ടുകള്‍ കോച്ചി, കൈവിരലുകള്‍ വളച്ചുള്ള അവളുടെ ഇപ്പോഴത്തെ രൂപം ഭയം ജനിപ്പിക്കുന്നതാണെന്ന് മില്ലിയുടെ അമ്മ ക്ലെയര്‍ പറയുന്നു. എന്താണ് സംഭവിച്ചതെന്ന് തനിക്ക് മനസ്സിലാകുന്നില്ല എന്നും അവര്‍ തുറന്നു പറയുന്നു. എന്താണ് സംഭവിക്കുന്നതെന്ന് മില്ലിക്ക് മനസ്സിലാകുന്നുണ്ടെങ്കിലും സംസാരിക്കാന്‍ ആകുന്നില്ലെന്നും അവര്‍ കൂട്ടിച്ചേര്‍ത്തു. സംഭവ സ്ഥലത്ത് മില്ലിയുടെ സുഹൃത്തുക്കള്‍ ഉണ്ടായിരുന്നതിനാല്‍ അവരെ പെട്ടെന്ന് ആശുപത്രിയിലാക്കുകയായിരുന്നു എന്നും അവര്‍ പറഞ്ഞു.
രണ്ടു കവിള്‍ മദ്യം മാത്രമാണ് മില്ലി കുടിച്ചതെന്ന് സുഹൃത്തുക്കളും സാക്ഷ്യപ്പെടുത്തുന്നു. അപ്പോഴേക്കും അസ്വസ്ഥത അനുഭവപ്പെടുകയായിരുന്നു. മില്ലി അവര്‍ക്ക് പരിചയമുള്ള ഒരു വ്യക്തിയില്‍ നിന്നും മദ്യം സ്വീകരിക്കുകയായിരുന്നു എന്നാണ് ക്ലബ് ജീവനക്കാര്‍ പറയുന്നത്. ഇക്കാര്യം പൊലീസിനെ അറിയിച്ചിട്ടുണ്ടെന്നും അവര്‍ പറഞ്ഞു. പൊലീസ് സംഭവം വിശദമായി അന്വേഷിച്ചുകൊണ്ടിരിക്കുകയാണ്. ശനിയാഴ്ച്ച പ്രാഥമിക ചികിത്സയ്ക്ക് ശേഷം വീട്ടില്‍ മടങ്ങിയെത്തിയ മില്ലിയുടെ നില മാറ്റമില്ലാതെ തുടരുകയാണ്.