യൂറോപ്പിനെ ഞെട്ടിച്ച് ഡെന്മാര്‍ക്ക് തലസ്ഥാനമായ കോപ്പന്‍ഹേഗനിലെ മാളിലുണ്ടായ വെടിവെപ്പില്‍ മൂന്ന് പേര്‍ മരിച്ചെന്ന് റിപ്പോര്‍ട്ട്. വെടിവയ്പ്പുമായി ബന്ധപ്പെട്ട് ഒരാളെ അറസ്റ്റ് ചെയ്തതായി ഡാനിഷ് പൊലീസ് പറഞ്ഞു. കൂടുതല്‍ വിവരങ്ങള്‍ പുറത്തുവിട്ടിട്ടില്ല. വെടിവെപ്പ് നടന്ന കോപ്പന്‍ഹേഗന്‍ സിറ്റി സെന്ററിനും വിമാനത്താവളത്തിനും ഇടയിലുള്ള വലിയ ഫീല്‍ഡ് മാളിന് ചുറ്റും സേനയെ വിന്യസിച്ചിട്ടുണ്ടെന്ന് കോപ്പന്‍ഹേഗന്‍ പൊലീസ് ട്വിറ്ററില്‍ കുറിച്ചു. സംഭവസ്ഥലത്ത് നിന്നുള്ള ചിത്രങ്ങള്‍ പുറത്തുവന്നു.

'കനത്ത വെടിവെപ്പാണ് നടന്നത്. എത്രപേര്‍ക്ക് പരിക്കേറ്റുവെന്നോ മരിച്ചുവെന്നോ ഞങ്ങള്‍ക്ക് ഇതുവരെ കൃത്യമായ റിപ്പോര്‍ട്ട് ലഭിച്ചിട്ടില്ല. സ്ഥിതിഗതികള്‍ വളരെ ഗുരുതരമാണ്,' കോപ്പന്‍ഹേഗന്‍ മേയര്‍ സോഫി ആന്‍ഡേഴ്‌സണ്‍ പറഞ്ഞു. ആക്രമണവുമായി ബന്ധപ്പെട്ട് 22 കാരനായ ഡെന്മാര്‍ക്ക് പൗരനെ പൊലീസ് അറസ്റ്റ് ചെയ്തു. ആക്രമണത്തിന്റെ കാരണം വ്യക്തമല്ലെന്നും ഭീകരവാദ സാധ്യത തള്ളിക്കളയുന്നില്ലെന്നും പൊലീസ് മേധാവി പറഞ്ഞു.

നൂറുകണക്കിന് സ്ഥാപനങ്ങള്‍ പ്രവര്‍ത്തിക്കുന്ന മാളില്‍, പ്രാദേശിക സമയം വൈകുന്നേരം അഞ്ചരയോടെ ഏറെ തിരക്കുള്ള സമയത്താണ് വെടിവെപ്പ് നടന്നത്. ബ്രിട്ടീഷ് ഗായകന്‍ ഹാരി സ്റ്റെയ്ല്‍സിന്റെ പരിപാടി നടക്കുന്നതിന് ഒന്നര കിലോമീറ്റര്‍ സമീപത്തായിരുന്നു സംഭവം. ആക്രമണത്തെ തുടര്‍ന്ന് പരിപാടി മാറ്റി. കഴിഞ്ഞയാഴ്ച നോര്‍വേ നഗരമായ ഒസ്ലോയിലെ ബാറിന് പുറത്ത് വെടിവെപ്പ് നടന്നിരുന്നു. അന്ന് രണ്ട് പേര്‍ കൊല്ലപ്പെടുകയും 21 പേര്‍ക്ക് പരിക്കേല്‍ക്കുകയും ചെയ്തു.

ഇതുവരെ എത്രപേര്‍ മരണമടഞ്ഞിട്ടുണ്ടെന്ന് കൃത്യമായി അറിവായിട്ടില്ലെന്ന് കോപ്പന്‍ഹേഗന്മേയറും പ്രസ്താവിച്ചു. വെടിവെയ്പ്പ് നടന്ന സ്ഥലത്തു നിന്നും 500 യാര്‍ഡ് മാത്രം മാറിയുള്ള റോയല്‍ അറീനയില്‍ ബ്രിട്ടീഷ് ഗായകനായ ഹാരി സ്‌റ്റൈല്‍സിന്റെ സംഗീത പരിപാടി നടക്കാന്‍ ഇരിക്കുകയായിരുന്നു. സംഭവത്തില്‍ ഞെട്ടി എന്നും എല്ലാവര്‍ക്കും വേണ്ടി പ്രാര്‍ത്ഥിക്കുന്നു എന്നും ഗായകന്‍ പിന്നീട് തന്റെ ട്വീറ്ററില്‍ പോസ്റ്റ് ചെയ്തു. വെടിവയ്പ്പിന് ശേഷവും പരിപാടി നടക്കുമെന്ന് സംഘാടകര്‍ അറിയിച്ചിരുന്നെങ്കിലും പിന്നീട് അത് വേണ്ടെന്ന് വയ്ക്കുകയായിരുന്നു.

ഷോപ്പിങ് മാളിനുള്ളില്‍ വന്‍ തിരക്കുള്ള സമയത്തായിരുന്നു അക്രമി തോക്കുമായി എത്തി വെടിയുതിര്‍ത്തത്. ജീവന്‍ രക്ഷിക്കാനായി പലരു പരക്കം പായുകയായിരുന്നു. വെടി ഉതിര്‍ക്കുന്നതിനൊപ്പം അയാള്‍ എന്തൊക്കെയോ ഉച്ചത്തില്‍ വിളിച്ചു പറയുന്നുമുണ്ടായിരുന്നു എന്ന് ദൃക്‌സാക്ഷികള്‍ പറയുന്നു. എന്നാല്‍ മരണഭയത്താല്‍ പരക്കം പായുന്നതിനിടയില്‍ എന്താണ് അയാള്‍ വിളിച്ചു കൂവിയതെന്ന് ശ്രദ്ധിക്കാനുമായില്ല എന്ന് അവര്‍ പറയുന്നു.

തൊട്ടടുത്ത നോര്‍വേയിലെ ഒരു ഗേ ബാറില്‍ തീവ്രവാദി എന്ന് സംശയിക്കപ്പെടുന്ന ഒരാള്‍ വെടിയുതിര്‍ത്തതിനു ഒരാഴ്ച്ച കഴിയുമ്പോഴാണ് ഡെന്മാര്‍ക്കില്‍ ഇത് നടക്കുന്നത്. നോര്‍വയില്‍ നടന്ന വെടിവയ്പ്പുമായി ബന്ധപ്പെട്ട് ഇറാന്‍ വംശജനായ ഒരു 42 കാരനെ പൊലീസ് അറസ്റ്റ് ചെയ്തിരുന്നു. ആ വെടിവയ്പില്‍ രണ്ടു പേര്‍ മരണമടഞ്ഞിരുന്നു.