ഗള്‍ഫ് മേഖലയിലെ കുടിവെള്ള പ്രശ്‌നത്തിന് പരിഹാരം കണ്ടെത്താനായി സാഹസിക നീക്കത്തിന് ഒരുങ്ങുകയാണ് യുഎഇ. അന്റാര്‍ട്ടിക്കയിലെ മഞ്ഞുമലകള്‍ വലിച്ചുകൊണ്ടു വരാനാണ് ഉദ്ദേശിക്കുന്നത്. ഈ നീക്കത്തെ ലോകം ആശ്ചര്യത്തോടെ ആണ് കാണുന്നത് പല സാഹസികതകള്‍ പലതും കാണിച്ചു ലോകത്തെ ആശ്ചര്യപ്പെടുത്തുന്ന യുഎഇ യുടെ പുതിയ നീക്കം വളരെ ഗൗരവമേറിയതാണ്. മസ്ദര്‍ സിറ്റി കേന്ദ്രമായ യുഎഇയിലെ സ്വകാര്യ കമ്പനിയായ നാഷണല്‍ അഡൈ്വസര്‍ ബ്യൂറോ ആണ് ഈ ഉദ്യമത്തിന് തുടക്കമിടുന്നത്. രാജ്യത്ത് രൂക്ഷമായ കുടിവെള്ള പ്രശ്‌നത്തിന് ഒരു പരിഹാരം എന്ന നിലയ്ക്കാണ് ഈ പദ്ധതി.

നല്ല കുടിവെള്ളം യുഎഇയില്‍ വിതരണം ചെയ്യുകയാണ് നാഷണല്‍ അഡൈ്വസര്‍ ബ്യൂറോയുടെ ലക്ഷ്യം. ഒരു മഞ്ഞുമല മാത്രം കൊണ്ടുവന്നാല്‍ 10 ലക്ഷം പേര്‍ക്ക് അഞ്ചുവര്‍ഷത്തിലധികം കാലം കുടിവെള്ളം ലഭിക്കാന്‍ മതിയാകുമെന്നാണ് കമ്പനിയുടെ വാദം.മഞ്ഞുമലകള്‍ കപ്പലില്‍ കെട്ടി വലിച്ചു കൊണ്ടുവരാനാണ് കമ്പനി ഉദ്ദേശിക്കുന്നത്. യുഎഇ എമിറേറ്റ്‌സ് ആയ ഫുജൈറയില്‍ നിന്നു 12600 കിലോമീറ്റര്‍ ദൂരമുണ്ട് അന്റാര്‍ട്ടിക്കന്‍ മഞ്ഞുമലകളിലേക്ക്.

അന്റാര്‍ട്ടിക്കയില്‍ ഉറച്ചുകിടക്കുന്ന മഞ്ഞുമലകള്‍ പൊട്ടിക്കുന്നത് തന്നെ ഏറെ ശ്രമകരമായ ദൗത്യമാണ്. ഒരു മഞ്ഞുമല അന്റാര്‍ട്ടിക്കയില്‍ നിന്നു യുഎഇയിലേക്ക് എത്തിക്കുന്നതിന് ഒരു വര്‍ഷം എടുക്കുമെന്നാണ് കരുതുന്നത്. ഇതിനായി കമ്പനി പ്രത്യേക പദ്ധതി തയ്യാറാക്കിയിട്ടുണ്ട്. വന്‍ സാമ്പത്തിക ചെലവുള്ള പദ്ധതിക്ക് സാങ്കേതിക വിദ്യയുടെ സഹായവും ആവശ്യമാണ്. 2018ല്‍ യുഎഇ മഞ്ഞുമല പദ്ധതി നടപ്പാകും. പദ്ധതിയുടെ സാധ്യത തങ്ങള്‍ പരിശോധിച്ചിട്ടുണ്ട്. വലിയ ഐസ് ബ്ലോക്കുകള്‍ പൊട്ടിച്ച് കൂറ്റന്‍ ടാങ്കുകളിലാക്കിയാണ് കടലിലൂടെ കെട്ടിവലിക്കുകയെന്നും അബ്ദുല്ല മുഹമ്മദ് പറഞ്ഞു.