മോഡിയുടെ സന്ദര്‍ശനം: ചൈനയുടെ അന്തര്‍വാഹിനിക്ക് ശ്രീലങ്ക അനുമതി നിഷേധിച്ചതായി വെളിപ്പെടുത്തല്‍
കൊളംബോ തീരത്ത് നങ്കൂരമിടാന്‍ അനുമതി തേടിയ ചൈനീസ് അന്തര്‍വാഹിനിക്ക് ശ്രീലങ്ക അനുമതി നിഷേധിച്ചതായി വെളിപ്പെടുത്തല്‍. രണ്ടു ദിവസത്തെ സന്ദര്‍ശനത്തിനായി ഇന്ത്യന്‍ പ്രധാനമന്ത്രി നരേന്ദ്ര മോഡി ശ്രീലങ്കയിലെത്തിയതിനു പിന്നാലെയാണ് ചൈനീസ് അന്തര്‍വാഹിനിക്ക് കൊളംബോ തീരത്തു നങ്കൂരമിടാന്‍ ശ്രീലങ്ക അനുമതി നിഷേധിച്ച വിവരം അധികൃതര്‍ വെളിപ്പെടുത്തിയത്. മോഡിയുടെ ശ്രീലങ്കന്‍ സന്ദര്‍ശനത്തിനിടെയുള്ള ഈ നിര്‍ണായക വെളിപ്പെടുത്തലിന് വലിയ രാഷ്ട്രീയ മാനങ്ങളുണ്ട്.
ശ്രീലങ്ക ആതിഥ്യം വഹിക്കുന്ന രാജ്യാന്തര ബുദ്ധസമ്മേളനത്തില്‍ പങ്കെടുക്കുന്നതിനാണ് മോഡിയുടെ സന്ദര്‍ശനം. മേയ് 12 മുതല്‍ 14 വരെയാണ് സമ്മേളനം. നൂറിലേറെ രാജ്യങ്ങളില്‍ നിന്നുള്ള നാനൂറിലേറെ പ്രതിനിധികള്‍ സംബന്ധിക്കുന്ന സമ്മേളനം ശ്രീബുദ്ധന്റെ ജനനം, ജ്ഞാനോദയം, നിര്‍വാണം എന്നിവയെ അനുസ്മരിക്കുന്നതാണ്. സന്ദര്‍ശനത്തിനിടെ ലങ്കന്‍ നേതാക്കളുമായി മോദി അനൗപചാരിക സംഭാഷണം നടത്തുമെന്നാണ് വിവരം.
2014 ഒക്ടോബറില്‍ ചൈനയുടെ അന്തര്‍വാഹിനിക്ക് കൊളംബോ തീരത്ത് നങ്കൂരമിടാന്‍ ശ്രീലങ്ക അനുമതി നല്‍കിയത് ഇന്ത്യയെ പ്രകോപിപ്പിച്ചിരുന്നു. മേഖലയില്‍ സ്വാധീനം വളര്‍ത്തുവാനുള്ള ചൈനയുടെ ബോധപൂര്‍വമായ ശ്രമമായാണ് ഇന്ത്യ ഇതിനെ കണ്ടത്. ഇതിനു പിന്നാലെയാണ് ഇതേ തീരത്ത് നങ്കൂരമിടാനുള്ള ചൈനയുടെ ശ്രമങ്ങളെ ശ്രീലങ്ക തടഞ്ഞത്. ശ്രീലങ്കന്‍ തീരത്ത് നങ്കൂരമിടാനുള്ള ചൈനയുടെ നീക്കങ്ങളെ എപ്പോഴും പിന്തുണയ്ക്കാനാകില്ലെന്ന് ശ്രീലങ്കന്‍ അധികൃതര്‍ ചൂണ്ടിക്കാട്ടി. ഇക്കാര്യത്തില്‍ ഇന്ത്യയുടെ താല്‍പര്യങ്ങള്‍ കൂടി കണക്കിലെടുക്കേണ്ടതുണ്ടെന്ന് അവര്‍ ചൂണ്ടിക്കാട്ടി.
അതേസമയം, ചൈനീസ് അന്തര്‍വാഹിനികള്‍ക്കായി ശ്രീലങ്കന്‍ തുറമുഖം തുറന്നുകൊടുക്കില്ലെന്ന് ഇതിന് അര്‍ഥമില്ലെന്ന് മറ്റൊരു ഉദ്യോഗസ്ഥന്‍ അഭിപ്രായപ്പെട്ടു. കഴിഞ്ഞ ഏതാനും വര്‍ഷങ്ങളായി ശ്രീലങ്കയില്‍ വന്‍ നിക്ഷേപമാണ് ചൈന നടത്തിവരുന്നത്. റോഡുകള്‍, വിമാനത്താവളങ്ങള്‍, റയില്‍വേ, തുറമുഖങ്ങള്‍ തുടങ്ങി എല്ലാ മേഖലകളിലും ശ്രീലങ്കയെ സഹായിക്കുന്ന നയമാണ് ചൈന സ്വീകരിച്ചുവരുന്നത്.
പരമ്പരാഗതമായി ശ്രീലങ്കയുമായി അടുത്ത വ്യാപാരബന്ധം പുലര്‍ത്തുന്ന ഇന്ത്യയെ 'വെട്ടി', മേഖലയില്‍ സ്വാധീനമുറപ്പിക്കുകയാണ് ചൈനയുടെ ലക്ഷ്യമെന്ന് കരുതുന്നു. ഇന്ത്യയുടെ ബദ്ധവൈരികളായ പാക്കിസ്ഥാനുമായി സൗഹൃദം പങ്കിടുന്ന ചൈന, ഇന്ത്യയുടെ മറ്റൊരു അയല്‍രാജ്യമായ ശ്രീലങ്കയെയും സ്വന്തം കുടക്കീഴിലാക്കി ഇന്ത്യയെ പ്രതിരോധത്തിലാക്കുന്നതിനുള്ള ശ്രമമാണ് നടത്തുന്നതെന്ന് വ്യക്തം.
https://www.facebook.com/Malayalivartha
