സൈബര്‍ ആക്രമണത്തെ തുടര്‍ന്ന് ബ്രിട്ടനില്‍ ആശുപത്രികള്‍ സ്തംഭിച്ചു, രോഗികള്‍ വലഞ്ഞു
ഇംഗ്ലണ്ട്, സ്‌കോട്ട്‌ലന്‍ഡ് എന്നിവിടങ്ങളിലെ എന്‍എച്ച്എസ് ആശുപത്രികള്‍ ഉള്‍പ്പെടെയുള്ള ആരോഗ്യസേവന മേഖലയ്ക്കുനേരെ സൈബര്‍ ആക്രമണം. ആരോഗ്യമേഖല അപ്പാടെ നിശ്ചലമാക്കിയ സൈബര്‍ ആക്രമണത്തിന്റെ പശ്ചാത്തലത്തില്‍ സര്‍ക്കാരും സ്‌കോട്ട്‌ലന്‍ഡ് യാര്‍ഡിന്റെ സൈബര്‍ സെല്ലും പ്രതിരോധ നടപടികള്‍ക്കു തുടക്കമിട്ടു.
ലോകത്തിന്റെ വിവിധ ഭാഗങ്ങളിലുള്ള പല സ്ഥാപനങ്ങള്‍ക്കുനേരെയും കഴിഞ്ഞദിവസം സമാനമായ സൈബര്‍ ആക്രമണങ്ങള്‍ ഉണ്ടായതായും അതിലൊന്നു മാത്രമാണ് എന്‍എച്ച്എസിനു നേരെയുണ്ടായതെന്നും പ്രധാനമന്ത്രി തെരേസ മേ വിശദീകരിച്ചു.
കംപ്യൂട്ടറുകള്‍ ലോഗ് ഓണ്‍ ചെയ്യുമ്പോള്‍ 230 പൗണ്ട് നല്‍കാന്‍ ആവശ്യപ്പെട്ടുകൊണ്ട് പ്രത്യക്ഷപ്പെടുന്ന വൈറസ് പ്രോഗ്രാമാണ് ആരോഗ്യമേഖലയെ ആകെ സ്തംഭിപ്പിച്ച വില്ലനായി മാറിയത്. കംപ്യൂട്ടറുകള്‍ നിശ്ചലമായതോടെ ആശുപത്രികളിലും ജിപി സെന്ററുകളിലും രോഗികളുടെ വിവരങ്ങള്‍ ലഭ്യമല്ലാതായി.
ഓപ്പറേഷനുകളും എക്‌സ്‌റേ, സ്‌കാനിംങ് തുടങ്ങിയ പരിശോധനകളും മുടങ്ങി. 39 ആശുപത്രികളുടെയും നിരവധി ജിപി സെന്ററുകളുടെയും പ്രവര്‍ത്തനം ഇത്തരത്തില്‍ അവതാളത്തിലായതായാണ് ഒടുവില്‍ ലഭ്യമായ വിവരം. രോഗികള്‍ക്ക് ചികില്‍സ ലഭ്യമാക്കാന്‍ ബുദ്ധിമുട്ടുണ്ടായെങ്കിലും രോഗികളെക്കുറിച്ചുള്ള രഹസ്യവിവരങ്ങളും മറ്റും ചോര്‍ത്താന്‍ ഹാക്കര്‍മാര്‍ക്ക് സാധിച്ചിട്ടില്ലെന്നാണ് അന്വേഷണ ഉദ്യോഗസ്ഥര്‍ പറയുന്നത്.
സ്ഥിതിഗതികള്‍ നിയന്ത്രിക്കാനും സംവിധാനങ്ങള്‍ പൂര്‍വസ്ഥിതിയിലെത്തിക്കാനും നാഷണല്‍ സൈബര്‍ സെക്യൂരിറ്റി സെന്റര്‍ ഊര്‍ജിത നടപടികള്‍ സ്വീകരിച്ചുവരുന്നതായി പ്രധാനമന്ത്രി വ്യക്തമാക്കി. 24 മണിക്കൂറിനകം സൈബര്‍ കണ്‍ട്രോള്‍ ഏറ്റെടുത്ത് ആശുപത്രികളുടെ പ്രവര്‍ത്തനം സാധാരണ സ്ഥിതിയിലേക്കു മടക്കിക്കൊണ്ടുവരാനാകുമെന്നാണ് സര്‍ക്കാര്‍ പ്രതീക്ഷിക്കുന്നത്.
ജിപി സര്‍ജറികള്‍ പലതും ഇന്നലെ വൈകുന്നേരത്തോടെ പ്രവര്‍ത്തനം നിര്‍ത്തി. രോഗികളെയും കൊണ്ടുള്ള ആംബുലന്‍സുകള്‍ പ്രവര്‍ത്തനം തടസമാകാത്ത ആശുപത്രികളിലേക്കു മാത്രം തിരിച്ചുവിട്ടു. ആക്‌സിഡന്റ് ആന്‍ഡ് എമര്‍ജന്‍സി സര്‍വീസുകള്‍ കഴിയുന്നതും മുടക്കംകൂടാതെ നടത്താന്‍ ശ്രമിക്കുന്നുണ്ടെന്ന് എന്‍എച്ച്എസ് ഇംഗ്ലണ്ട് അധികൃതര്‍ പറയുന്നു.
സമാനമായ വൈറസുകള്‍ ഇന്നലെ എഴുപതോളം രാജ്യങ്ങളിലെ നൂറകണക്കിനു സ്ഥാപനങ്ങളെയും സേവനങ്ങളെയും തളര്‍ത്തിയെന്നാണ് പുറത്തുവരുന്ന റിപ്പോര്‍ട്ടുകള്‍. നിരവധി ടെലികോം നെറ്റ്‌വര്‍ക്കിംങ് കമ്പനികളെ ആക്രമണം ബാധിച്ചിട്ടുണ്ടെന്നാണ് വിവരം. ബ്രിട്ടണില്‍ എന്‍എച്ച്എസില്‍ ഒഴികെ മറ്റൊരു സ്ഥാപനവും സമാനമായ സംഭവം ഉണ്ടായതായി അറിയിച്ചിട്ടില്ല. അതേസമയം, വെയില്‍സിലും വടക്കന്‍ അയര്‍ലന്‍ഡിലും എന്‍എച്ച്എസിന്റെ പ്രവര്‍ത്തനം സുഗമമാണ്.
രോഗികളുടെ വ്യക്തിഗത വിവരങ്ങളും രോഗവിവരശേഖരണവും തുടങ്ങി മരുന്നു കുറിക്കലും ഡിസ്ചാര്‍ജും വരെ പൂര്‍ണമായും കംപ്യൂട്ടര്‍ സഹായത്തോടെ നടക്കുന്ന എന്‍എച്ച്എസില്‍ കംപ്യൂട്ടറുകള്‍ തുറക്കാന്‍ കഴിയാതായതോടെ എല്ലാം നിലച്ച മട്ടായി. കംപ്യൂട്ടറുകള്‍ പണിമുടക്കിയാല്‍ വികസിത രാജ്യങ്ങളില്‍ ശിലായുഗസമാനമായ അന്തരീക്ഷമാകും ഫലമെന്ന് തെളിയിക്കുന്നതായി കേവലം മണിക്കൂറികള്‍ മാത്രം നീണ്ട ഈ അരക്ഷിതാവസ്ഥ.
https://www.facebook.com/Malayalivartha
