ഇന്‍ഷുറന്‍സില്ലാത്ത വാഹനങ്ങള്‍ അപകടത്തില്‍പെട്ടാല്‍ ഇനി വിട്ടുകിട്ടണമെങ്കില്‍ എതിര്‍ വാഹനത്തിനുണ്ടായ കേടുപാട് പരിഹരിക്കാന്‍ ആവശ്യമായ തുകയോ ഗാരന്റിയോ കെട്ടിവെക്കണം. തേര്‍ഡ് പാര്‍ട്ടി ഇന്‍ഷുറന്‍സ് വ്യവസ്ഥകള്‍ കര്‍ശനമാക്കുന്ന, കേരള മോട്ടോര്‍ വാഹനചട്ടത്തിന്റെ കരട് ഭേദഗതി സര്‍ക്കാര്‍ പ്രസിദ്ധീകരിച്ചു. വാഹനാപകടം സംഭവിച്ചാല്‍ എതിര്‍വാഹനത്തിന് ഇന്‍ഷുറന്‍സ് പരിരക്ഷ ലഭിക്കുന്ന സൗകര്യമാണ് തേര്‍ഡ് പാര്‍ട്ടി ഇന്‍ഷുറന്‍സിലുള്ളത്.
നിലവില്‍ അപകടത്തില്‍പെടുന്ന വാഹനങ്ങള്‍ മോചിപ്പിക്കാന്‍ ഇന്‍ഷുറന്‍സില്ലാത്തതിന് സ്‌റ്റേഷനില്‍ 1000 രൂപ പിഴ അടച്ചാല്‍ മതി. എന്നാല്‍, ഇത്തരത്തില്‍ പിഴയൊടുക്കി വാഹനം വീണ്ടെടുത്തശേഷം ഉടമകള്‍ കേസ് അവഗണിക്കുകയും നഷ്ടപരിഹാരം നല്‍കാതിരിക്കുകയും ചെയ്യുന്ന പ്രവണത വര്‍ധിക്കുന്ന സാഹചര്യത്തിലാണ് ചട്ടഭേദഗതിയിലൂടെ കര്‍ശന നടപടിക്കൊരുങ്ങുന്നത്.

സംസ്ഥാനത്തെ വാഹനാപകട നഷ്ടപരിഹാര െ്രെടബ്യൂണലുകളില്‍ (എം.എ.സി.ടി) ഇത്തരം ആയിരക്കണക്കിന് കേസുകളാണ് കെട്ടിക്കിടക്കുന്നത്. എം.എ.സി.ടി നഷ്ടപരിഹാര വിധി വരുമ്പോഴേക്കും ഉടമയുടെ കൈയില്‍ വാഹനമുണ്ടാവില്ല, അല്ലെങ്കില്‍ പണം കാണില്ല. റവന്യൂ റിക്കവറിയിലേക്ക് നീങ്ങുകയാണെങ്കില്‍ കൈവശം ഭൂമിയോ ആസ്തിയോ കാണില്ല. എന്തെങ്കിലും ആസ്തിയുണ്ടെങ്കില്‍ അവ കണ്ടെത്തി വസൂലാക്കുന്നതിന് നടപടിക്രമങ്ങളും നൂലാമാലകളും ഏറെയാണ്. കെ.എസ്.ആര്‍.ടി.സിക്കെതിരെയുള്ള കേസുകളുടെ വിധിയിലും ഈ അനിശ്ചിതത്വവും ഇഴച്ചിലുമുണ്ട്. നഷ്ടപരിഹാരം അനുവദിച്ചുള്ള കോടതിവിധി നടപ്പാക്കിക്കിട്ടാന്‍ വാദി വീണ്ടും എക്‌സിക്യൂഷന്‍ പെറ്റീഷനുമായി കോടതിയെ സമീപിക്കേണ്ട ഗതികേടുമുണ്ട്. ഇതൊക്കെ കണക്കിലെടുത്താണ് നഷ്ടപരിഹാരനടപടികള്‍ സുഗമവും വേഗത്തിലുമാക്കാന്‍ മോട്ടോര്‍ വാഹനചട്ടത്തിലെ 391എ വകുപ്പ് ഭേദഗതി ചെയ്യുന്നത്.
അപകടത്തില്‍പെടുന്ന വാഹനത്തിന് ഇന്‍ഷുറന്‍സ് ഇല്ലാതിരിക്കുകയും നഷ്ടപരിഹാരത്തിനുള്ള ഗാരന്റി തുക അടക്കാതിരിക്കുകയുമാണെങ്കിലും കഥ മാറും. ഇത്തരം ഘട്ടങ്ങളില്‍ വാഹനം പിടിച്ചെടുത്ത് മൂന്ന് മാസത്തിനകം പൊതുലേലം ചെയ്ത് തുക വസൂലാക്കും. കരട് ഭേദഗതിയില്‍ പൊതുജനങ്ങളുടെ ആക്ഷേപങ്ങളും അഭിപ്രായങ്ങളും സ്വീകരിക്കും. ഇതടക്കം നടപടികള്‍ പൂര്‍ത്തിയാക്കി ഭേദഗതി ഒരു മാസത്തിനുള്ളില്‍ പ്രാബല്യത്തില്‍വരും.