കരുണാനിധി ഹിന്ദുത്വ ഗോസായി രാഷ്ട്രീയത്തിന് ദ്രാവിഡ ദേശത്തു സൂചി കുത്താനിടം കൊടുത്തില്ല എന്നാണ് സൈബർ സഖാക്കൾ മദാറടിക്കുന്നത് എന്ന് അഡ്വക്കേറ്റ്‌ ജയശങ്കർ. ലൈഞ്ജറുടെ പുതിയ പിന്തുണക്കാർക്ക് അദ്ദേഹം ചെയ്ത കാര്യങ്ങൽ ഓർമയുണ്ടോ എന്നും അദ്ദേഹം ചോദിക്കുന്നു. തമിഴ്‌നാട് മുൻ മുഖ്യമന്ത്രി കരുണാനിധിയെ അനുസ്മരിച്ച് ജയശങ്കർ ഇട്ട ഫേസ്ബുക് പോസ്റ്റിലാണ് അദ്ദേഹം ഇത്തരത്തിൽ പ്രതികരിച്ചത്.

അഡ്വ . ജയശങ്കറിന്റെ ഫേസ്ബുക്‌പോസ്റ് ഇങ്ങനെ ;

മുത്തുവേൽ കരുണാനിധി കാലയവനികയ്ക്കു പിന്നിൽ മറയുന്നു.

തമിഴക മുതലമൈച്ചർ, ദ്രാവിഡ കച്ചി തലൈവർ, കഥ- വചനം എഴുത്താളൻ എന്നീ നിലകളിൽ അദ്ദേഹം നൽകിയ സംഭാവനകളെ പാടിപ്പുകഴ്ത്തുകയാണ് യക്ഷ കിന്നര ഗന്ധർവ്വന്മാർ. കളത്തിൽ ചേരനേ, കലയിൽ ചോളനേ, കവിതയിൽ പാണ്ഡ്യനേ, എങ്കൾ കലൈഞ്ജറേ വാഴ്ക വാഴ്ക!

അഞ്ചു തവണ മുഖ്യമന്ത്രി ആയപ്പോഴും വിഭവസമാഹരണത്തിൽ വിരുതു തെളിയിച്ച മഹാനാണ് മു.കരുണാനിധി. 1978ൽ നാലു വോള്യമായി പുറത്തുവന്ന ജസ്റ്റിസ് ആർഎസ് സർക്കാരിയ കമ്മീഷൻ റിപ്പോർട്ട് കലൈഞ്ജറുടെ ഭരണ നേട്ടങ്ങൾ എണ്ണിപ്പറഞ്ഞിട്ടുണ്ട്.

പെരിയോർ ഇവി രാമസ്വാമിയും കാ.നാ. അണ്ണാദുരൈയും നട്ടുനനച്ചു വളർത്തിയ ദ്രാവിഡ കക്ഷിയെ തൻെറ കുടുംബസ്വത്താക്കാൻ കരുണാനിധിക്കു സാധിച്ചു. സ്റ്റാലിൻ ചെന്നൈയിൽ, അഴഗിരി മധുരൈയിൽ, കനിമൊഴി ദില്ലിയിൽ.

കരുണാനിധി ഹിന്ദുത്വ ഗോസായി രാഷ്ട്രീയത്തിന് ദ്രാവിഡ ദേശത്തു സൂചി കുത്താനിടം കൊടുത്തില്ല എന്നാണ് സൈബർ സഖാക്കൾ മദാറടിക്കുന്നത്.

1999-04 കാലത്ത് ബിജെപി മുന്നണിയിൽ ആയിരുന്നു ഡിഎംകെ. 99ലെ തെരഞ്ഞെടുപ്പിൽ തമിഴകത്തെ നാലു സീറ്റിൽ താമര വിരിഞ്ഞു- നീലഗിരി, തിരുച്ചിറപ്പള്ളി, നാഗർകോവിൽ, കോയമ്പത്തൂർ. വാജ്പേയിയുടെ ക്യാബിനറ്റിൽ മുരശൊലി മാരൻ വ്യവസായ, വാണിജ്യ വകുപ്പുകളും ടി ആർ ബാലു വനം- പരിസ്ഥിതി വകുപ്പും കയ്യാളി.

പറയുമ്പോൾ എല്ലാം പറയണമല്ലോ, നമ്മുടെ അബ്ദുൽ നാസർ മഅദനിയെ 1998ൽ ആദ്യം അകത്താക്കിയതും കരുണാനിധി ആയിരുന്നു. കോയമ്പത്തൂർ സ്ഫോടന കേസിൽ പ്രതിചേർക്കപ്പെട്ട മഅദനി ഒമ്പതു കൊല്ലം വിചാരണ തടവുകാരനായി കാരാഗൃഹവാസം അനുഭവിക്കേണ്ടി വന്ന കാര്യം കലൈഞ്ജറുടെ പുതിയ പിന്തുണക്കാർക്ക് ഓർമയുണ്ടോ എന്തോ?