കനത്ത മഴയെ തുടര്‍ന്ന് കു​തി​രാ​ന്‍ ഇ​ര​ട്ട​തു​ര​ങ്ക​ത്തി​ന്‍റെ 95 ശ​ത​മാ​നം പ​ണി​ക​ഴി​ഞ്ഞ ആ​ദ്യ​ തു​ര​ങ്ക​ത്തി​ന്‍റെ മു​ക​ള്‍​വശം ഇടിഞ്ഞുവീണു. ഇരട്ടതുരങ്കത്തിന്റെ കിഴക്കുഭാഗത്ത് കവാടത്തിന് മുകള്‍വശത്ത് ഷോട്ട്ക്രീറ്റ് ചെയ്ത ഭാഗമാണ് ഇടിഞ്ഞുവീണത്. ഏകദേശം പണി പൂര്‍ത്തിയായ ആദ്യ തുരങ്കത്തിന്റെ മുകള്‍വശമാണ് ഇടിഞ്ഞുവീണത്. ഇതോടെ ടണലിന്റ സുരക്ഷ ഭീഷണിയിലായിരിക്കുകയാണ്.

പാറ പൊട്ടിച്ചു നീക്കിയാല്‍പ്പോലും മണ്ണിടിച്ചിലുണ്ടാകുമെന്ന സാഹചര്യമാണുള്ളത്. ഇന്ന് പുലര്‍ച്ചെ ആറ് മണിയോടെയാണ് തുരങ്കത്തിന്റെ മുകള്‍ ഭാഗം ഇടിയാന്‍ തുടങ്ങിയത്. വനഭൂമിയായതിനാല്‍ ഇതിന് മുകളില്‍ ധാരാളണം മരങ്ങളുണ്ട്.

തുരങ്കത്തിനു മുകളില്‍ ഇരുവശത്തേക്കുമായി വെള്ളം ഒഴുക്കുന്നതിനുവേണ്ടി കാച്ച് വാട്ടര്‍ ഡ്രൈനേജ് നിര്‍മ്മിക്കുന്നതിനായി വനം വകുപ്പില്‍ നിന്നും അനുമതി വാങ്ങിതരണമെന്ന് ആവശ്യപ്പെട്ട് നിര്‍മ്മാണ കമ്പനിയായ പ്രഗതി ഗ്രൂപ്പ് കെഎംസിക്ക് കത്ത് നല്‍കിയിരുന്നത്. കെഎംസി അനുമതിക്കായി വനംവകുപ്പിനെ സമീപിച്ചിട്ടുണ്ട് എന്നാണ് സൂചന.

എന്നാല്‍ ഇക്കാര്യത്തില്‍ ഇതുവരെയായിട്ടും വനംവകുപ്പ് തീരുമാനമെടുത്തിട്ടില്ല. ഈ ഡ്രൈനേജ് സംവിധാനം മുകളിലുണ്ടെങ്കില്‍ ഇങ്ങനെയുള്ള അപകടങ്ങള്‍ ഉണ്ടാകില്ലെന്നാണ് പ്രഗതി ഗ്രൂപ്പ് അധികൃതര്‍ പറയുന്നത്.