വനിതാ ഹോസ്റ്റലിന് മുകളില്‍ നിന്നും ചാടി ജീവനൊടുക്കിയ പെണ്‍കുട്ടിയുടെ സഹോദരിയെ വീടിനുള്ളില്‍ തൂങ്ങി മരിച്ച നിലയില്‍ കണ്ടെത്തി. ഇന്നലെ രാത്രി പഠിച്ചുകൊണ്ടിരുന്ന രിന്‍സിയോട് നേരം വൈകിയതിനാല്‍ മാതാവ് റഫീക്ക കിടന്നുറങ്ങാന്‍ പറഞ്ഞു. പിന്നീട് രാവിലെ വിളിച്ചുണര്‍ത്താന്‍ ചെന്നപ്പോഴാണ് തൂങ്ങിമരിച്ച നിലയില്‍ കണ്ടെത്തിയത്. രിന്‍സിയുടെ സഹോദരന്‍ രജിന്‍ വിദേശത്താണ്. ഇയാള്‍ എത്തിയതിന് ശേഷം നാളെ മൃതദേഹം സംസ്‌ക്കരിക്കും. നേമം അമ്പലത്ത് വിള വീട്ടില്‍ അബ്ദുള്‍ റഹിംറഫീക്ക ദമ്പതികളുടെ മകള്‍ രിന്‍സിയാണ് മരിച്ചത്. രിന്‍സിയുടെ മൂത്ത സഹോദരി ഫാത്തിമ രഹ്ന മൂന്ന് മാസങ്ങള്‍ക്ക് മുന്‍പാണ് പനവിള ജംഗ്ഷനിലുള്ള ഹോസ്റ്റലിന്റെ മുകളില്‍ നിന്നും ചാടി ജീവനൊടുക്കിയിരുന്നു. 

സഹോദരിയുടെ മരണത്തോടെ രിന്‍സി വിഷാദരോഗത്തിന് അടിമപ്പെട്ടിരുന്നുവെന്നാണ് സൂചന. ലിംഗമാറ്റ ശസ്ത്രക്രിയക്ക് വീട്ടുകാര്‍ വിസമ്മതിച്ചതിനാലാണ് രിന്‍സിയുടെ സഹോദരിയായ ഫാത്തിമ രഹ്ന ഹോസ്റ്റല്‍ കെട്ടിടത്തില്‍ നിന്നും ചാടി ആത്മഹത്യ ചെയ്തത്. ഭിന്ന ലിംഗക്കാരുടെ സംഘടനയില്‍ അംഗവും സജീവ പ്രവര്‍ത്തകയുമായിരുന്നു ഫാത്തിമ. ഫാത്തിമ രഹ്ന പി.എസ്.സി കോച്ചിങ് ക്ലാസിന് പോവുകയായിരുന്നു. മകളുടെ സ്വഭാവത്തില്‍ മാറ്റം കണ്ടതോടെ വീട്ടുകാര്‍ പലപ്പോഴും ഉപദേശിച്ചെങ്കിലും ഫലം കണ്ടിരുന്നില്ല. തനിക്ക് ആണാകണമെന്നും അതിന് വീട്ടുകാരുടെ സമ്മതം വേണമെന്നും രഹ്ന ആവശ്യപ്പെട്ടിരുന്നു. വീട്ടുകാര്‍ അനുവദിക്കാത്തത് മൂലം പെണ്‍കുട്ടി നല്ല മനോവിഷമത്തിലായിരുന്നുവെന്നും ഇതാണ് ആത്മഹത്യക്ക് പ്രേരണയായതെന്നുമാണ് പൊലീസ് നല്‍കുന്ന സൂചന.