കാമുകനൊപ്പം ജീവിക്കാൻ വീടുവിട്ടിറങ്ങിയ വീട്ടമ്മ കാരണം സമാധാനം നഷ്ടപ്പെട്ടത് കോവളം പോലീസുകാർക്ക് ആയിരുന്നു. ഭർത്താവിനെയും രണ്ടു കുട്ടികളെയും ഉപേക്ഷിച്ചു ഭാര്യയും മൂന്ന് മക്കളുമുള്ള കാമുകനെ‌ാപ്പം പോയ യുവതിയെ തിരികെ ഭർത്താവിനൊപ്പം അയയ്ക്കാനുള്ള ശ്രമത്തിനിടെ യുവതി കോടതിയ്ക്കുള്ളിൽ ബോധം കെട്ടു വീണു. ആശുപത്രി വാസമുൾപ്പെടെ പണി കിട്ടിയത് പൊലീസിന്. ഒടുവിൽ ഒരുവിധം അനുനയത്തിലായ യുവതി ഭർത്താവിനു പകരം അമ്മയോടൊപ്പം പോയി. കഴിഞ്ഞ ദിവസമായിരുന്നു നാടകീയ സംഭവങ്ങൾ അരങ്ങേറിയത്.

പ്രദേശ വാസിയുടെ ഭാര്യയെ കാണാനില്ലെന്ന പരാതി അന്വേഷിച്ചപ്പോൾ യുവതി ഫെയ്സ്ബുക്ക് സൗഹൃദത്തിലൂടെ കണ്ടെത്തിയ കാമുകനേ‌ാടൊപ്പം കോഴിക്കോട്ടും തുടർന്നു കോയമ്പത്തൂരിലും പോയതായി വിവരം കിട്ടി. യുവതിയെ കണ്ടെത്തി കോടതിയിൽ എത്തിച്ചപ്പോഴായിരുന്നു നാടകീയ രംഗങ്ങൾ. ഭാര്യയും മൂന്നു മക്കളുമുള്ള കാമുകനൊപ്പം വിടാനാവില്ലെന്നും ഭർത്താവിനൊപ്പം പോകണമെന്നും ജഡ്ജി നിർദ്ദേശിച്ചപ്പോഴായിരുന്നു യുവതി ചേംബറിൽ കുഴഞ്ഞു വീണത്.

ആശുപത്രിയിൽ ഡ്രിപ് തീരുന്നതു വരെ വനിതാ പൊലീസ് ഉൾപ്പെടെ കാവലിരുന്നു. പിന്നീട് കൗൺസലിങ്ങിലൂടെ അനുനയപ്പെട്ടുവെങ്കിലും ഭർത്താവിനൊപ്പം പോകില്ലെന്ന കടുത്ത നിലപാടെടുത്ത യുവതിയെ അമ്മയോടൊപ്പം പോകാൻ അനുവദിക്കുക ആയിരുന്നുവെന്നു കോവളം പൊലീസ് പറഞ്ഞു.