ഇന്ത്യന്‍ കാര്‍ഷിക ഗവേഷണ കൗണ്‍സിലിന് (ഐ.സി.എ.ആര്‍) കീഴിലെ ബിരുദാനന്തര ബിരുദ കോഴ്‌സുകളിലേക്ക് പ്രവേശനത്തിന് കേരളത്തിലെ കേന്ദ്രങ്ങളില്‍ ആഗസ്റ്റ് 18ന് നടത്തിയ പരീക്ഷ ഹൈകോടതി റദ്ദാക്കി. കേരളത്തിലെ സെന്ററുകളിലൂടെ പ്രവേശന പരീക്ഷ എഴുതാന്‍ അപേക്ഷ നല്‍കിയവര്‍ക്ക് മാത്രമായി വീണ്ടും പരീക്ഷ നടത്താനും കോടതി ഉത്തരവിട്ടു.

കേരളം പ്രളയ ദുരന്തത്തിലായ സമയത്ത് പി.ജി പ്രവേശന പരീക്ഷ നടത്തിയത് ചോദ്യം ചെയ്ത് അപേക്ഷകരായ ചേര്‍ത്തല പട്ടണക്കാട് സ്വദേശി സി.ടി. അമല്‍, കണ്ണൂര്‍ സ്വദേശി ആദര്‍ശ്, ചാലക്കുടി സ്വദേശിനി ദിയ എന്നിവര്‍ നല്‍കിയ ഹരജികള്‍ പരിഗണിച്ചാണ് സിംഗിള്‍ബെഞ്ചിന്റെ ഉത്തരവ്. ജൂണ്‍ 22 ന് ഐ.സി.എ.ആര്‍ ഇതേ പ്രവേശന പരീക്ഷ ഓണ്‍ലൈനായി നടത്തിയിരുന്നു. എന്നാല്‍, സാങ്കേതിക പ്രശ്‌നങ്ങള്‍ ചൂണ്ടിക്കാട്ടി തമിഴ്‌നാട് സ്വദേശികളായ അപേക്ഷകര്‍ നല്‍കിയ ഹരജിയില്‍ മദ്രാസ് ഹൈകോടതി പരീക്ഷ റദ്ദാക്കി. തുടര്‍ന്നാണ് ഓഫ് ലൈനായി ആഗസ്റ്റ് 18 ന് പരീക്ഷ നടത്താന്‍ നിശ്ചയിച്ചത്.

കേരളത്തില്‍ തിരുവനന്തപുരത്തും കോഴിക്കോട്ടുമാണ് പരീക്ഷ സന്റെര്‍ അനുവദിച്ചത്. പ്രളയത്തെത്തുടര്‍ന്ന് കൊച്ചിയിലും സന്റെര്‍ അനുവദിച്ചെങ്കിലും കേരളത്തില്‍നിന്ന് അപേക്ഷിച്ചവരില്‍ 57 ശതമാനം പേര്‍ മാത്രമാണ് എഴുതിയതെന്ന് കോടതി കണ്ടെത്തി. ഈ സാഹചര്യത്തിലാണ് വീണ്ടും പരീക്ഷ നടത്താന്‍ സിംഗിള്‍ബെഞ്ച് ഉത്തരവിട്ടത്.കാര്‍ഷിക സര്‍വകലാശാലകളിലെ 25 ശതമാനം സീറ്റുകള്‍ ഇന്ത്യന്‍ കാര്‍ഷിക ഗവേഷണ കൗണ്‍സലിനുള്ളതാണെന്നും പലയിടത്തും പി.ജി ക്ലാസുകള്‍ തുടങ്ങിയെന്നും ചൂണ്ടിക്കാട്ടി അസിസ്റ്റന്റ് സോളിസിറ്റര്‍ ജനറല്‍ പുനഃപരീക്ഷ നടത്തുന്നതിനെ എതിര്‍ത്തു. പ്രവേശന നടപടികള്‍ വൈകിയിരിക്കെ പരീക്ഷ റദ്ദാക്കലും മറ്റുമായി കോടതിയുടെ ഇടപെടലുണ്ടായാല്‍ കാര്യങ്ങള്‍ ഇനിയും അവതാളത്തിലാകുമെന്നും അദ്ദേഹം ചൂണ്ടിക്കാട്ടി.

എന്നാല്‍, കേരളത്തിലെ പ്രളയത്തിന്റെ കാര്യം കൃഷി മന്ത്രി ഐ.സി.എ.ആറിന്റെ ശ്രദ്ധയില്‍പ്പെടുത്തിയിരുന്നതായി കോടതി ചൂണ്ടിക്കാട്ടി. പ്രളയ കാലത്ത് അപേക്ഷകര്‍ക്ക് പരീക്ഷ സന്റെറുകളില്‍ എത്തിച്ചേരാന്‍ പോലും കഴിയുമായിരുന്നില്ല. ഇക്കാര്യം കണക്കിലെടുത്ത് ഉചിതമായ നടപടി സ്വീകരിക്കാമായിരുന്നു. പരീക്ഷ നടത്താനുള്ള അധികാരം കൗണ്‍സിലിനുണ്ടെങ്കിലും വിദ്യാര്‍ഥികളുടെ താല്‍പര്യം പരിഗണിക്കണമെന്ന കടമ മറക്കരുതായിരുന്നെന്നും കോടതി വ്യക്തമാക്കി.