ബിഷപ്പ് ഫ്രാങ്കോമുളയ്ക്കലിനെതിരെ പരാതി നല്‍കിയ കന്യാസ്ത്രീയേയും അവരെ പിന്തുണയ്ക്കുന്നവരെയും അധിക്ഷേപിച്ച് പി.സി ജോര്‍ജ്ജ് എം.എല്‍.എ രംഗത്തെത്തി. പന്ത്രണ്ട് തവണ സുഖിച്ച കന്യാസ്ത്രീ പതിമൂന്നാംതവണത്തേത് മാത്രം പീഡനമാക്കിയെന്ന ഗുരുതരമായ അധിക്ഷേപമാണ് വാര്‍ത്താസമ്മേളനത്തില്‍ പി.സി ജോര്‍ജ്ജ് നടത്തിയത്. കന്യാസ്ത്രിയെ അഭിസാരികയെന്ന് വിളിക്കാതിരിക്കാനാവില്ല. പരാതിക്കാരിയെ പിന്തുണച്ച കന്യാസ്ത്രീകളെയും സംശയിക്കണം. കന്യാസ്ത്രി എന്നാല്‍ കന്യകാത്വം ഉള്ളവളാണ്. കന്യാമറിയും പുരുഷന്റെ സഹായമില്ലാതെയാണ് കര്‍ത്താവിന് ജന്‍മം നല്‍കിയതെന്നാണ് വിശ്വാസം. അതുകൊണ്ടാണ് കന്യാമറിയം എന്ന് വിളിക്കുന്നതെന്നും പി.സി ജോര്‍ജ് പറഞ്ഞു.

ആദ്യം വിചാരിച്ചത് കന്യാസ്ത്രീക്ക് ബിഷപ്പിനെതിരെ വൈരാഗ്യം ഉണ്ടെന്നാണ്. പിന്നീട് കാര്യങ്ങള്‍ പഠിച്ചപ്പോള്‍ ബിഷപ്പിനേക്കാള്‍ വലിയ തട്ടിപ്പാണ് പരാതിക്കാരി നടത്തുന്നതെന്ന് മനസിലാക്കി. കന്യാസ്ത്രീക്ക് നീതി ലഭിക്കണമെന്ന് ആവശ്യപ്പെട്ട് കുറവിലങ്ങാട് മഠത്തിലെ അഞ്ച് കന്യാസ്ത്രീകളും മറ്റ് സഭാവിശ്വാസികളും ജോയിന്റ് ക്രിസ്ത്യന്‍ കൗണ്‍സിലിന്റെ നേതൃത്വത്തില്‍ കൊച്ചിയില്‍ ഹൈക്കോടതിക്ക് മുന്നില്‍ ഉപവാസ സമരം നടത്തുന്ന സമയത്ത് തന്നെ പി.സി ജോര്‍ജ് വാര്‍ത്താസമ്മേളനം വിളിച്ചതില്‍ ദുരൂഹതയുണ്ട്. പീഡനക്കേസുകളില്‍ ഇരകള്‍ക്കെതിരെ രംഗത്ത് വരുന്നത് പി.സി ജോര്‍ജിന്റെ ശൈലിയാണ്.

കൊച്ചിയില്‍ നടിയെ ആക്രമിച്ച സംഭവത്തില്‍ നടിയെ അപമാനിച്ചും ദിലീപിന് പരസ്യപിന്തുണ പ്രഖ്യാപിച്ചും പി.സി ജോര്‍ജ്ജ് രംഗത്തെത്തിയിരുന്നു. അതിനും മുമ്പ് കെ.ആര്‍ ഗൗരിയമ്മയെ അധിക്ഷേപിച്ച് പി.സി ജോര്‍ജ്ജ് ഒരു ചാനലിലൂടെ സംസാരിച്ചിരുന്നു. എന്നാല്‍ സഹോദരിക്ക് നീതി കിട്ടുന്നതിനാണ് തങ്ങള്‍ ഉപവാസ സമരം നടത്തുന്നതെന്ന് കന്യാസ്ത്രീകള്‍ അറിയിച്ചു.