പ്രളയബാധിതരെയും പ്രളയത്തില്‍ മരിച്ചവരെയും പരിഹസിക്കുകയും അധിക്ഷേപിക്കുകയും ചെയ്ത മന്ത്രി എം.എം മണിക്ക് സ്ഥാനത്ത് തുടരാന്‍ അര്‍ഹതയില്ലന്ന് കെ.പി.സി.സി രാഷ്ട്രീയ കാര്യ സമിതി അംഗം ബെന്നി ബെഹനാന്‍. സ്ഥിരമായി വിടുവായത്തം പറഞ്ഞ് കേരളീയരെ അപമാനിക്കുന്ന മണിയെ നിയന്ത്രിക്കാന്‍ പാര്‍ട്ടി തയാറാകണം. പൊതുജീവിതത്തില്‍ പ്രവര്‍ത്തിക്കുന്ന ഒരാള്‍ ഒരിക്കലും പറയാന്‍ പാടില്ലാത്തതാണ് പ്രളയം ഉണ്ടായാല്‍ ആളുകള്‍ മരിക്കും എന്ന പ്രസ്താവന. പ്രസ്താവന പിന്‍വലിച്ച് കേരളീയ സമൂഹത്തോട് മാപ്പ് പറയാന്‍ മണി തയാറാകണമെന്നും അദ്ദേഹം ആവശ്യപ്പെട്ടു. വിദ്യാഭ്യാസവും വിവേകവും ഔചിത്യവും ഇല്ലാത്ത ഒരാള്‍ സി പി എം പ്രവര്‍ത്തകന്‍ ആകുന്നതില്‍ വിരോധമില്ല. പക്ഷേ അങ്ങനെയുള്ള ഒരാളെ മന്ത്രിയാക്കി കേരളീയരുടെ തലയില്‍ അടിച്ചേല്‍പ്പിക്കരുതെന്നും ബെന്നി ബെഹനാന്‍ പറഞ്ഞു.