തന്നെ പരിഹസിച്ച റവന്യൂ സെക്രട്ടറി പി.എച്ച്.കുര്യന് കൃഷിമന്ത്രി വി.എസ്.സുനില്‍കുമാരിന്റെ മറുപടി. കുര്യന്‍ ഉദ്യോഗസ്ഥന് വേണ്ട അച്ചടക്കം പാലിച്ചില്ല. മുഖ്യമന്ത്രിയെ വിവരം അറിയിക്കും. നെല്‍കൃഷി വര്‍ധിപ്പിക്കുക എന്നതാണ് സര്‍ക്കാര്‍ നയം. ഉദ്യോഗസ്ഥര്‍ വ്യക്തിപരമായ അഭിപ്രായം സര്‍ക്കാരിന് കുറിപ്പായാണ് നല്‍കേണ്ടതെന്നും സുനില്‍കുമാര്‍ തൃശൂരില്‍ പറഞ്ഞു. സര്‍ക്കാരിന്റെ നയം നടപ്പാക്കാനാണ് പി. എച്ച്. കുര്യനെ ചുമതലപ്പെടുത്തിയിരിക്കുന്നതെന്ന് സിപിഐ സംസ്ഥാന സെക്രട്ടറി കാനം രാേജന്ദ്രന്‍ പറഞ്ഞു. പ്രകടനപത്രികയില്‍ പറഞ്ഞിരിക്കുന്ന കാര്യങ്ങള്‍ സര്‍ക്കാര്‍ നടപ്പാക്കും. കൃഷിയെക്കുറിച്ച് നടത്തിയ പരാമര്‍ശം കുര്യന്റെ വ്യക്തിപരമായ അഭിപ്രായമെന്നും താന്‍ അഭിപ്രായം പറയുന്നില്ലെന്നും കാനം രാജേന്ദ്രന്‍ കോഴിക്കോട് പറഞ്ഞു.
നെല്‍കൃഷിയുടെ വിസ്തൃതി കൂട്ടുന്നത് മന്ത്രിക്ക് എന്തോ മോക്ഷംപോലെയാണെന്ന അഡീഷണല്‍ ചീഫ് സെക്രട്ടറി പി.എച്ച്. കുര്യന്റെ പരിഹാസത്തിനു മറുപടിയുമായി കൃഷിമന്ത്രി വി.എസ്. സുനില്‍കുമാര്‍ രംഗത്ത്. ഒരു ഉദ്യോഗസ്ഥന്‍ സര്‍ക്കാരിനെതിരേ നിലപാട് സ്വീകരിക്കുന്നത് ശരിയല്ല. നെല്‍കൃഷി വ്യാപിപ്പിക്കലാണ് സര്‍ക്കാരിന്റെ ലക്ഷ്യമെന്നും അദ്ദേഹം മാധ്യമങ്ങളോട് പറഞ്ഞു. ഇടതുപക്ഷ സര്‍ക്കാരിന് വ്യക്തമായ രാഷ്ട്രീയനയമുണ്ട്. സര്‍ക്കാരിലെ ചില ഉന്നത ഉദ്യോഗസ്ഥര്‍ക്ക് മനസില്‍ പല നയങ്ങളും കാണും. എന്നാല്‍ അത് ഇവിടെ നടപ്പാകില്ല. സര്‍ക്കാര്‍ ചിലവില്‍ ഉദ്യോഗസ്ഥര്‍ മണ്ടത്തരം വിളിച്ചു പറഞ്ഞ് നടക്കരുതെന്നും സുനില്‍കുമാര്‍ കൂട്ടിച്ചേര്‍ത്തു. നിരുത്തരവാദപരമായി പ്രസ്താവന നടത്തിയ കുര്യനെതിരേ റിപ്പോര്‍ട്ട് നല്‍കിയതായും സുനില്‍കുമാര്‍ പറഞ്ഞു. കഴിഞ്ഞ ദിവസമാണ് പി.എച്ച്. കുര്യന്‍ സുനില്‍ കുമാറിനെ പരിഹസിച്ച് രംഗത്തെത്തിയത്. പിഎച്ച് കുര്യന്‍അച്ചടക്കം പാലിച്ചില്ലെന്നും സര്‍ക്കാര്‍ ഉദ്യോഗസ്ഥന്‍ എന്ന നിലയില്‍ പറയാന്‍ പാടില്ലാത്തതാണ് അദ്ദേഹം പറഞ്ഞതെന്നും മന്ത്രി മാധ്യമങ്ങളോട് പറഞ്ഞു. അഡീ. ചീഫ് സെക്രട്ടറിക്കെതിരെ മുഖ്യമന്ത്രിക്ക് പരാതി നല്‍കുമെന്നും സുനില്‍ കുമാര്‍ പറഞ്ഞു.