ഉത്തരവുകളൊന്നുമിലില്ലാതെ കൊല്ലം നഗരത്തിലെ തണല് മരങ്ങള് മുറിക്കാനെത്തിയ ഉദ്യോഗസ്ഥര്ക്കെതിരെ മാധ്യമപ്രവര്ത്തകന്റെ ഒറ്റയാള് പോരാട്ടം
ഉത്തരവുകളൊന്നുമിലില്ലാതെ മരം മുറിക്കാനെത്തിയ ഉദ്യോഗസ്ഥരെ ന്യൂസ്ഫോട്ടോഗ്രാഫര് തടഞ്ഞു. ദേശാഭിമാനി ഫോട്ടോഗ്രാഫര് ആര്. സഞ്ജീവിന്റെ പ്രതിഷേധത്തിന് മുന്നില് മുട്ടുമടക്കി ഒടുവില് ഉദ്യോഗസ്ഥര് മടങ്ങി. ശനിയാഴ്ച്ച പകല് പതിനൊന്നോടെയാണ് സംഭവങ്ങള്ക്ക് തുടക്കം. കൊല്ലം ടൗണ് യു.പി സ്കൂളിന് മുന്നില് തണലേകി നിന്നിരുന്ന കൂറ്റന് മരം ചുവടെ വെട്ടിമാറ്റാന് മരം മുറിക്കാരുമായി രണ്ട് പിഡബഌയൂ ഉദ്യോഗസ്ഥര് എത്തി.. വിവരമറിഞ്ഞ് അസൈന്മെന്റിന്റെ ഭാഗമായി സ്ഥലത്തെത്തിയ സഞ്ജീവ് തന്റെ പ്രതിഷേധം അറിയിച്ചപ്പോള് കളക്ടറോട് പോയി പറയാനായിരുന്നു മറുപടി.
മരം മുറിക്കുന്നെങ്കില് തന്റെ തലയിലൂടെ മുറിച്ചിടട്ടെ എന്ന നിലപാടുമായി മരത്തിന് താഴെ ഇദ്ദേഹം നിലയുറപ്പിച്ചതോടെ വെസ്റ്റ് സി.ഐ ബിജുവിന്റെ നേതൃത്വത്തില് പോലീസും സ്ഥലത്തെത്തി. തുടര്ന്ന് നടത്തിയ ചര്ച്ചയില് മരം ചുവടെ വെട്ടിമാറ്റാതെ റോഡിലേക്ക് നില്ക്കുന്ന ഉണങ്ങിയ രണ്ട് ശിഖരങ്ങള് മാത്രം മുറിക്കുകയുള്ളു എന്ന അധികൃതരുടെ ഉറപ്പില് സമരം അവസാനിപ്പിച്ചു. തുടര്ന്ന് പറഞ്ഞ കൊമ്പുകള് മാത്രം മുറിച്ച് അവര് മടങ്ങി. പ്രളയത്തിന്റെ പേര് പറഞ്ഞ് കഴിഞ്ഞ കുറെ ദിവസങ്ങളായി കൊല്ലം നഗരത്തില് തണലേകി നിന്നിരുന്ന മരങ്ങളെല്ലാം വെട്ടി ഇല്ലാതാക്കിയ അധികൃതരുടെ നടപടി ഒരു തരത്തിലും അംഗീകരിക്കില്ലെന്നും ഇനിയും മുറിക്കാന് ശ്രമമുണ്ടായാല് ചെറുക്കുമെന്നും സഞ്ജീവ് പറഞ്ഞു.
https://www.facebook.com/Malayalivartha
