ആ അപകട യാത്രയില്‍ ഒരു ദുരൂഹതയില്ല.കൊടുങ്ങല്ലൂരില്‍ വെച്ച് നടന്ന അപകടത്തില്‍ ഹനാന്റെ നട്ടെല്ലിന് പരിക്കേറ്റിരുന്നു.അപകടശേഷം ആശുപത്രിയിലായ ഹനാന്‍ തന്ന മനപ്പൂര്‍വ്വം അപകടപ്പെടുത്തിയതാണെന്ന് ആരോപിച്ചിരുന്നു. ഡ്രൈവറുടെ മൊഴികളില്‍ വൈരുധ്യമുണ്ടെന്നും തന്നെ മനപ്പൂര്‍വ്വം അപകടപ്പെടുത്താന്‍ ശ്രമിച്ചതാണെന്നുമാണ് ഹനാന്‍ പറഞ്ഞത്.താന്‍ പകുതി ഉറക്കത്തില്‍ ആയിരുന്നപ്പോള്‍ ഡ്രൈവര്‍ ആരെയോ ഫോണില്‍ കൂടെകൂടെ വിളിച്ചിരുന്നു. അവിടെയെത്തി, ഇവിടെയെത്തി എന്നൊക്കെ പറയുന്നത് തനിക്ക് കേള്‍ക്കാമായിരുനെന്നും ഹനാന്‍ പറഞ്ഞിരുന്നു.
എന്നാല്‍ ഹനാന്റെ ആരോപണങ്ങള്‍ക്ക് മറുപടി പറയുകയാണ് ഡ്രൈവര്‍ ജിതേഷ്. ഒരു മാധ്യമ അഭിമുഖത്തിലാണ് ജിതേഷ് അന്നത്തെ അപകടത്തെ കുറിച്ച് വ്യക്തമാക്കിയത്.
തന്റെ സഹോദരിക്കൊപ്പം ഇവന്റ് മാനേജ്‌മെന്റ് നടത്തിയിരുന്ന കുട്ടിയാണ് ഹനാന്‍. മൂന്ന് ഉദ്ഘാടന പരിപാടികള്‍ ഉള്ളതിനാല്‍ തന്റെ സ്വന്തം കാറ് ഹനാന് നല്‍കുമോയെന്നും കൂട്ടുപോകുമോയെന്നും സഹോദരി ചോദിച്ചു.
ഇതോടെയാണ് താന്‍ ഹനാനൊപ്പം പോയത്. തിരുവനന്തപുരത്തും വര്‍ക്കലയിലും കോഴിക്കോടും പരിപാടികള്‍ ഉണ്ടായിരുന്നു. എല്ലായിടത്തും ഓടിയെത്തിയപ്പോഴേക്കും നന്നായി ക്ഷീണിച്ചു. അങ്ങനെ കോഴിക്കോടുള്ള പരിപാടി കഴിഞ്ഞ് തിരിച്ച് മടങ്ങി വരുമ്പോള്‍ വണ്ടിയില്‍ തന്നെ ക്ഷീണം കാരം കിടന്നു. ഹനാനോട് ചോദിച്ചിട്ടാണ് ഉറങ്ങിയത്.
വണ്ടി മുന്‍പോട്ട് ഇടിച്ചപ്പോള്‍ ഹനാന്റെ നട്ടെല്ല് ഹാന്‍ഡ് ബ്രേക്കില്‍ ഇടിച്ചതാകണം. അതുവഴി വന്ന ആംബുലന്‍സ് ഡ്രൈവറുടെ സഹായത്തോടെയാണ് ഹനാനെ ആശുപത്രിയില്‍ എത്തിച്ചത്. ഹനാന്റെ പിതാവ് ആശുപത്രിയില്‍ വന്നപ്പോഴാണ് താന്‍ വീട്ടിലേക്ക് തിരിച്ചത്. എന്തിനാണ് തനിക്കെതിരെ ഹനാന്‍ ആരോപണം ഉന്നയിച്ചതെന്ന് ഇപ്പോഴും അറിയില്ലെന്നും ആരോപണം വേദനിപ്പിച്ചെന്നും ജിതേഷ് പറഞ്ഞു. താന്‍ മുന്‍പിലും ഹനാന്‍ പുറകിലുമാണ് കിടന്നത്. ക്ഷീണം മാറി അല്‍പം മുന്‍പോട്ട് വാഹനം എടുത്തപ്പോഴാണ് അപകടം നടന്നത്. ഒരാള്‍ കുറുകെ ചാടുകയായിരുന്നു. വാഹനം വെട്ടിച്ചപ്പോഴായിരുന്നു അപകടം സംഭവിച്ചതെന്നും ജിതേഷ് പറയുന്നു.