കന്യാസ്ത്രീകള്‍ തെരുവില്‍ ഇറങ്ങിയതോടെ കളിമാറി. പോലീസും സര്‍ക്കാരും കടുത്ത സമ്മര്‍ദ്ദത്തില്‍. ഡിജിപി കേസില്‍ പുതുസാധ്യത തേടുന്നു. ജലന്തര്‍ ബിഷപ്പിനെതിരായ ലൈംഗിക പീഡനക്കേസ് െ്രെകംബ്രാഞ്ചിന് കൈമാറി അട്ടിമറിക്കാന്‍ നീക്കം. കേസ് െ്രെകംബാഞ്ചിന് നല്‍കുന്നതാണ് ഉചിതമെന്ന് കോട്ടയം ജില്ലാ പൊലീസ് മേധാവി സംസ്ഥാന പൊലീസ് മേധാവിയെ അറിയിച്ചു. രണ്ടാംഘട്ട അന്വേഷണത്തിന് ശേഷവും ബിഷപ്പിനെ അറസ്റ്റ് ചെയ്യണമെന്ന് അന്വേഷണ സംഘം നിലപാടെടുത്ത സാഹചര്യത്തിലാണ് നീക്കം. കന്യാസ്ത്രീ നല്‍കിയ മൊഴികള്‍ വാസ്തവമെന്നും ബിഷപ്പിന്റെ മൊഴികള്‍ പച്ചക്കള്ളമെന്നും അന്വേഷണത്തില്‍ കണ്ടെത്തി.
അന്വേഷണം മാറ്റുന്നതില്‍ എതിര്‍പ്പില്ലെന്ന് അന്വേഷണസംഘം അറിയിച്ചതിനെത്തുടര്‍ന്നാണ് ഇത്തരത്തില്‍ െ്രെകംബ്രാഞ്ചിലേക്ക് അന്വേഷണം നീങ്ങുന്നത്. നേരത്തെ ഡിജിപി ലോക്‌നാഥ് ബഹറ അന്വേഷണം മറ്റ് ഏജന്‍സികള്‍ക്ക് നല്‍കുന്നതിനെക്കുറിപ്പ് കോട്ടയം എസ്പിയോട് അന്വേഷിച്ചിരുന്നു. നിലവില്‍ പാലായുടെ കൂടെ അധിക ചുമതലയുള്ളതിനാല്‍ വൈക്കം ഡിവൈഎസ്പി ഇതിന് സമ്മതം മൂളുകയായിരുന്നുവെന്നാണ് സൂചന. അടുത്ത രണ്ട് ദിവസത്തിനുള്ളില്‍ അന്തിമ നിലപാട് എടുക്കുമെന്നാണ് റിപ്പോര്‍ട്ടുകള്‍.
അന്വേഷണത്തിന്റെ 70% പൂര്‍ത്തിയാക്കിയതായും തുടര്‍ന്നുള്ള അന്വേഷണം മാത്രം ക്രൈംബ്രാഞ്ച് നടത്തിയാല്‍ മതിയെന്നുമാണ് പോലീസിന്റെ നിലപാട് എന്ന റിപ്പോര്‍ട്ടുമുണ്ട്. ബിഷപ്പ് ഫ്രാങ്കോ മുളയ്ക്കലിന്റെ അറസ്റ്റ് അനിവാര്യമാണെന്നാണ് രണ്ടാംഘട്ട അന്വേഷണത്തിന് ശേഷവും വൈക്കം ഡിവൈഎസ്പിയുടെ നിലപാട്. കന്യാസ്ത്രീയുടെ മൊഴിയെ സാധൂകരിക്കുന്ന കുടുതല്‍ തെളിവുകളുടെ അടിസ്ഥാനത്തിലാണ് ഇത്. അട്ടപ്പാടി ധ്യാനകേന്ദ്രത്തിലെ വൈദികന്റെ പിന്തുണയാണ് പീഡനത്തെക്കുറിച്ച് പുറത്തുപറയാന്‍ കാരണമെന്ന് കന്യാസ്ത്രീ മൊഴി നല്‍കിയിരുന്നു. ധ്യാനത്തിനിടയില്‍ നടത്തിയ കുമ്പസാരത്തിലാണ് കന്യാസ്ത്രീ ഇക്കാര്യങ്ങള്‍ വൈദികനോട് തുറന്നു പറഞ്ഞത്.
ഫ്രാങ്കോയുടെ അറസ്റ്റ് വൈകുന്നതില്‍ പ്രതിഷേധിച്ച് കുറവിലങ്ങാട് മഠത്തിലെ അഞ്ച് കന്യാസ്ത്രീകള്‍ ഇന്നലെ മുതല്‍ ശക്തമായ പ്രതിഷേധ പരിപാടികള്‍ക്കാണ് തുടക്കമിട്ടിരിക്കുന്നത്. കൊച്ചിയില്‍ ഹൈക്കോടതി ജംഗ്ഷനിലെ വഞ്ചി സ്‌ക്വയറിലാണ് ഇവരുടെ സമരപരിപാടികള്‍ ശക്തമായി മുന്നോട്ട് പൊയിക്കൊണ്ടിരിക്കുന്നത്. ബിഷപ്പ് ഫ്രാങ്കോ മുളയ്ക്കലിനെതിരെ കന്യാസ്ത്രീ പീഡന പരാതി നല്‍കിയിട്ട് എഴുപത്തഞ്ച് ദിവസം പിന്നിടുന്ന സാഹചര്യത്തിലാണ് കേസില്‍ പുതിയ വഴിത്തിരിവിന് സാധ്യതയുണ്ടായിരിക്കുന്നത്. സര്‍ക്കാരിനും സഭയ്ക്കുമെതിരെ നിരവധി പേരാണ് രംഗത്തെത്തിയിരിക്കുന്നത്. സമരം തെരുവില്‍ എത്തിയതോടെ അനങ്ങാപ്പാറ നയം കാണിച്ചാല്‍ സര്‍ക്കാരിനത് അവമതിപ്പുണ്ടാക്കും എന്നാല്‍ നിലച്ച അന്വേഷണം വീണ്ടും നടത്തിക്കൊണ്ടിരിക്കുകയാണെന്ന് കാണിച്ചാല്‍ തത്ക്കാലം പിടിച്ചു നില്‍ക്കാമെന്നാണ് പോലീസിന്റെ കണക്കുകൂട്ടല്‍.