പ്രളയം ഉണ്ടായിട്ടും പവര്‍കെട്ടെന്ന് മന്ത്രി. പ്രളയം ഉണ്ടായാല്‍ കുറേപ്പേര്‍ മരിക്കും കുറേപ്പേര്‍ അതിജീവിക്കും എന്ന് കഴിഞ്ഞദിവസം മന്ത്രി പറഞ്ഞിരുന്നു. സര്‍വ്വതും തകര്‍ന്ന് ജീവനും ജീവിതവും നഷ്ടപ്പെട്ടവരോട് മണിയുടെ കൊഞ്ഞനം കുത്തല്‍. ഇതിനെതിരെ സോഷ്യല്‍ മീഡിയയില്‍ വന്‍ പ്രതിഷേധം ഉയര്‍ന്നിരുന്നു. തുടര്‍ന്ന് മന്ത്രി തുടര്‍ച്ചയായി കടുത്ത പരാമര്‍ശങ്ങളുമായി രംഗത്ത് വന്നിരിക്കുകയാണ്. പമ്പ കരകവിയാന്‍ കാരണം ഡാം തുറന്നതാണെന്ന് പറഞ്ഞ രാജു എബ്രഹാമിനെ പാരട്ടി ശാസിച്ചിരുന്നു. സജി ചെറിയാനും ഇതായിരുന്നു അവസ്ഥ. എന്നാല്‍ മന്ത്രി ഇതൊന്നും കാണുന്നില്ല.
അണക്കെട്ടുകള്‍ തുറന്ന് വിട്ടത് കൊണ്ട് സംസ്ഥാനത്ത് ആരും മരിച്ചിട്ടില്ലെന്ന് മന്ത്രി എം.എം. മണി. ഡാം സുരക്ഷാ വിഭാഗത്തിന് വീഴ്ച ഉണ്ടായിട്ടുണ്ടെങ്കില്‍ പരിശോധിക്കും. ഡാമില്‍ അധികമായി എത്തിയ ജലത്തില്‍ ഒരു ഭാഗം മാത്രമാണ് ഒഴുക്കി വിട്ടതെന്ന് മന്ത്രി വ്യക്തമാക്കി. വൈദ്യുതി നിയന്ത്രത്തിന് കാരണം ഡാമുകളില്‍ ജലമില്ലാത്തത് അല്ല. പവര്‍ ഹൗസുകളിലെ കേടുപാടുകള്‍ കൊണ്ട് ഉത്പാദന കുറവ് ഉണ്ടായതാണ്. കേന്ദ്രപൂളില്‍ നിന്ന് വൈദ്യുതി ലഭിക്കുന്നത് സംബന്ധിച്ച് തീരുമാനമായില്ല. വൈദ്യുത ബോര്‍ഡിന് 850 കോടിയുടെ നഷ്ടം പ്രളയത്തില്‍ ഉണ്ടായിട്ടുണ്ട്. സംസ്ഥാനത്ത് 350 മെഗാവാട്ടിന്റെ കുറവ് നിലവില്‍ നേരിടുന്നുണ്ടെന്നും മന്ത്രി മാധ്യമപ്രവര്‍ത്തകരോട് വ്യക്തമാക്കി.