പ്രളയത്തിനു പിന്നാലെ സംസ്ഥാനം അതിരൂക്ഷമായ വരള്ച്ചയിലേക്ക് ; സെപ്റ്റംബര് 21വരെ തല്സ്ഥിതി തുടരുമെന്ന് കാലാവസ്ഥ നിരീക്ഷണ കേന്ദ്രം
പ്രളയത്തിനു പിന്നാലെ സംസ്ഥാനം അതിരൂക്ഷമായ വരള്ച്ചയിലേക്ക്. സംസ്ഥാനത്ത് ചൂടുകൂടുന്നതായാണു കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. ജലാശയങ്ങളിലെ വെള്ളത്തിന്റെ അളവ് ഗണ്യമായി കുറഞ്ഞതും മിക്ക നദികളിലെ നീരൊഴുക്ക് കുറഞ്ഞതും വേനല്ക്കാലത്തെപ്പോലെ പാടങ്ങള് വിണ്ടുകീറുന്നതുമെല്ലാം ജനങ്ങള്ക്കിടയില് ആശങ്ക ഉണ്ടാക്കിയിട്ടുണ്ട്.
ആലപ്പുഴ, കോട്ടയം, കോഴിക്കോട്, പാലക്കാട് ജില്ലകളിലാണ് ക്രമീതീതമായി താപനില ഉയര്ന്നിരിക്കുന്നത്. ഈ ജില്ലകളില് സാധാരണ വര്ഷങ്ങളിലെ സെപ്റ്റംബര് മാസങ്ങളില് അനുഭവപ്പെടുന്നതിനെക്കാള് രണ്ടു ശതമാനം വരെ ചൂട് കൂടിയതായി കാലവസ്ഥ നിരീക്ഷണ കേന്ദ്രം ഡയറക്ടര് കെ.സന്തോഷ് പറഞ്ഞു.
24.3 ഡിഗ്രി മുതല് 35 ഡിഗ്രിവരെയാണ് ഈ പ്രദേശങ്ങളിലിപ്പോഴുള്ള താപനില. മണ്സൂണ് ദുര്ബലമായതും വടക്കുപടിഞ്ഞാറന് കാറ്റുവീശുന്നതുമാണ് ചൂട് കൂടാന് കാരണം. സെപ്റ്റംബര് 21വരെ തല്സ്ഥിതി തുടരുമെന്ന പ്രവചനത്തിലാണ് നിരീക്ഷണ കേന്ദ്രം.
അതേസമയം കേരളത്തില് പ്രളയാനന്തരം വരള്ച്ച രൂക്ഷമാകുന്നതിനിടയില് എല്നിനോ പ്രതിഭാസം കേരളത്തിലും എത്തുമെന്ന് റിപ്പോര്ട്ട്. ഈ വര്ഷം അവസാനത്തോടെ പസിഫിക്കില് എല്നിനോ ശക്തമാകുമെന്നാണ് കണക്കുകൂട്ടല്. ഈ സാഹചര്യം സംജാതമായാല് വടക്കു കിഴക്കന് മണ്സൂണിലൂടെ ഇന്ത്യന് സംസ്ഥാനങ്ങളുടെ സ്ഥിതി കുടുതല് ഗുരുതരമാകും.
https://www.facebook.com/Malayalivartha
