തിരുവനന്തപുരം: സംസ്ഥാന ചാനലൈസിംഗ് ഏജന്‍സികളില്‍ ഏറ്റവും മികച്ച പ്രവര്‍ത്തനം കാഴ്ച്ച വച്ച ലെവല്‍ (2) സ്ഥാപനങ്ങളില്‍ ഒന്നാം സ്ഥാനത്തിന് കേരള സംസ്ഥാന വനിതാ വികസന കോര്‍പ്പറേഷന്‍ അര്‍ഹമായതായി ആരോഗ്യ, സാമൂഹ്യനീതി, വനിതാ ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്‍. ദേശീയ പട്ടികജാതി ധനകാര്യ വികസന കോര്‍പ്പറേഷന്‍ (NSCFDC) നടത്തിയ നാഷണല്‍ അവാര്‍ഡ് ഫോര്‍ പെര്‍ഫോര്‍മെന്‍സ് എക്‌സലന്‍സിലാണ് കേരള സംസ്ഥാന വനിതാ വികസന കോര്‍പ്പറേഷന്‍ ഒന്നാം സ്ഥാനം കരസ്ഥമാക്കിയത്.

ഈ സര്‍ക്കാര്‍ അധികാരത്തിലെത്തിയ ശേഷം പുതുതായി രൂപീകരിച്ച വനിതാ ശിശുവികസന വകുപ്പിന്റെ മികച്ച പ്രവര്‍ത്തനങ്ങള്‍ക്കുള്ള അംഗീകാരം കൂടിയാണിതെന്ന് മന്ത്രി പറഞ്ഞു. മികച്ച പ്രവര്‍ത്തനം കാഴ്ചവച്ച വനിതാ വികസന കോര്‍പറേഷനെ മന്ത്രി അഭിനന്ദിച്ചു.

ന്യൂനപക്ഷ/പിന്നോക്ക/പട്ടികജാതി/പൊതു വിഭാഗത്തിലെ വനിതകള്‍ക്ക് സ്വയം തൊഴില്‍ വിദ്യാഭ്യാസ വായ്പകള്‍ നല്‍കുന്നതില്‍ മുന്‍വര്‍ഷങ്ങളെക്കാള്‍ അതിശയകരമായ പുരോഗതി കൈവരിക്കുന്നതിന് കോര്‍പ്പറേഷന് കഴിഞ്ഞിട്ടുണ്ട്. കോര്‍പ്പറേഷന്റെ കഴിഞ്ഞ 30 വര്‍ഷത്തെ പ്രവര്‍ത്തന ചരിത്രത്തിലെ നാഴികകല്ലാണ് കോര്‍പ്പറേഷന്റെ കഴിഞ്ഞ രണ്ട് വര്‍ഷത്തെ പ്രവര്‍ത്തനം.

എല്ലാ വിഭാഗത്തിലെയും വനിതകളുടെ പ്രശ്‌നങ്ങള്‍ ഒരു പോലെ അഭിസംബോധന ചെയ്യുന്നതിനുള്ള സര്‍ക്കാര്‍ താല്പര്യം വനിതാ വികസന കോര്‍പ്പറേഷനിലൂടെ സാധ്യമാക്കുന്നതിന് കഴിഞ്ഞിട്ടുണ്ട്. ശരാശരി വായ്പ വിതരണം 35 കോടി രൂപയായിരുന്ന കോര്‍പ്പറേഷനില്‍ 2017-18 സാമ്പത്തിക വര്‍ഷത്തില്‍ മാത്രം 114 കോടി രൂപ വനിതകള്‍ക്ക് വായ്പയായി നല്‍കാന്‍ കഴിഞ്ഞത് വനിതാശിശുവികസന വകുപ്പിന്റെ വലിയ വിജയമാണ്. സ്ഥാപനത്തിന്റെ വളര്‍ന്നു വരുന്ന പ്രവര്‍ത്തനങ്ങളുടെ ഭാഗമായി 2016-17, 2017-18 സാമ്പത്തിക വര്‍ഷങ്ങളില്‍ 14.59 കോടി രൂപ പട്ടികജാതി വിഭാഗത്തില്‍പ്പെട്ട 737 വനിതകള്‍ക്ക് വായ്പയായി നല്‍കുന്നതിന് സ്ഥാപനത്തിന് കഴിഞ്ഞിട്ടുണ്ട്. പ്രസ്തുത നേട്ടമാണ് കോര്‍പ്പറേഷനെ ഒന്നാം സ്ഥാനത്തിന് അര്‍ഹമാക്കിയത്.

നേട്ടത്തിനുള്ള അംഗീകാരമായി എന്‍.എസ്.സി.എഫ്.ഡി.സി. ഏഴ് ലക്ഷം രൂപ കോര്‍പ്പറേഷന് കൈമാറിയിട്ടുണ്ട്. ഇത്തരം നേട്ടങ്ങള്‍ കോര്‍പ്പറേഷന്റെ മുന്നോട്ടുള്ള പ്രയാണത്തിനും സമ്പൂര്‍ണ്ണ സ്ത്രീ ശാക്തീകരണമെന്ന സര്‍ക്കാര്‍ ലക്ഷ്യത്തിനും ശക്തി പകരുന്നതാണ്.