ബിഷപ്പ് ഫ്രാങ്കോ മുളക്കലിനെ അറസ്റ്റ് ചെയ്യണമെന്ന് ആവശ്യപ്പെട്ട് കൊച്ചിയില്‍ ഹൈക്കോടതി പരിസരത്ത് കന്യാസ്ത്രീകള്‍ നടത്തുന്ന സമരം ഒന്‍പതു ദിവസം പിന്നിട്ടു. സമരം സംസ്ഥാനത്തിന്റെ വിവിധ ഭാഗങ്ങളിലേക്ക് വ്യാപിപ്പിക്കുന്നു. ബിഷപ്പിന്റെ അറസ്റ്റുണ്ടാകും വരെ സമരത്തില്‍ നിന്ന് പിന്നോട്ടില്ലെന്ന നിലപാടിലാണ് സേവ് അവര്‍ സിസ്റ്റേഴ്‌സ് ആക്ഷന്‍ കൗണ്‍സില്‍.

സമരം ചെയ്യുന്ന കന്യാസ്ത്രിമാര്‍ക്ക് പിന്തുണ അറിയിച്ച്‌ കെആര്‍ ഗൗരിയമ്മയുടെ സന്ദേശം സമരപന്തലില്‍ വായിച്ചു. നീതിക്കുവേണ്ടിയുള്ള നിങ്ങളുടെ പോരാട്ടത്തില്‍ നേരിട്ട് പങ്കെടുക്കണമെന്ന് ആഗ്രഹമുണ്ടെങ്കിലും ആരോഗ്യം അനുവദിക്കിന്നില്ലെന്ന് കത്തില്‍ ഗൗരിയമ്മ എഴുതി. കേരളസര്‍ക്കാര്‍ ഉചിതമായ അന്വേഷണം നടത്തി കുറ്റവാളി എത്ര ഉന്നതനായാലും നിയമത്തിന്റെ മുന്നില്‍ കൊണ്ടുവരികതന്നെ ചെയ്യുമെന്ന് വിശ്വസിക്കുന്നതായും ഗൗരിയമ്മ കന്യാസ്ത്രീകള്‍ക്കുള്ള സന്ദേശത്തില്‍ കുറിച്ചു.

ഒന്‍പതു ദിവസം പിന്നിട്ട സമരത്തിന് ഐക്യദാര്‍ഢ്യം പ്രഖ്യാപിച്ച്‌ ഇന്നും നിരവധി പേരാണ് സമരപ്പന്തലിലെത്തിയത്. കവി കുരീപ്പുഴ ശ്രീകുമാര്‍, ആലങ്കോട് ലീലാകൃഷണന്‍ കെഎം ഷാജഹാന്‍, ഷാനിമോള്‍ ഉസ്മാന്‍ തുടങ്ങിയവര്‍ കന്യാസ്ത്രികളെ സന്ദര്‍ശിച്ചു.