ഒരു വ്യക്തിക്ക് അഞ്ചേക്കര്‍ വയലില്‍ കൂടുതല്‍ വിത്തുകൃഷിയിറക്കാന്‍ പാടില്ലെന്ന ഉത്തരവാണ് കര്‍ഷകരെ പ്രതിസന്ധിയിലാക്കുന്നത്. വിത്തുകര്‍ഷകരെ പ്രതിസന്ധിയിലാക്കി കൃഷി ഡയറക്ടറേറ്റ് ഉത്തരവ് പുറത്തിറക്കി. നേരത്തേ പരിധിയില്ലാതെ വിത്തുകൃഷിയിറക്കാമായിരുന്നു. വിത്തുക്ഷാമം നേരിടുന്ന സാഹചര്യത്തില്‍ എന്തടിസ്ഥാനത്തിലാണ് ഇത്തരമൊരു ഉത്തരവെന്ന് മനസ്സിലാകുന്നില്ലെന്ന് കര്‍ഷകസംഘടനകള്‍ പറയുന്നു. വകുപ്പ് മന്ത്രി അറിയാതെയാണ് ഉത്തരവെന്നും ആക്ഷേപമുണ്ട്.

ഉത്തരവ് നടപ്പാകുന്നത് കടുത്ത നെല്‍വിത്തുക്ഷാമത്തിലേക്ക് വഴിതെളിക്കും. സംസ്ഥാനത്ത് ആവശ്യമായ വിത്തിന്റെ 95 ശതമാനം ഉല്‍പാദിപ്പിക്കുന്നത് പാലക്കാട് ജില്ലയിലാണ്. ജില്ലയിലെ പല കര്‍ഷകരും പൂര്‍ണമായും വിത്തുമാത്രം കൃഷി ചെയ്യുന്നവരാണ്. പ്രളയത്തില്‍ മറ്റ് ജില്ലകളിലെ നെല്‍കൃഷി പൂര്‍ണമായും നശിച്ചതിനാല്‍ വിത്തിന് കടുത്തക്ഷാമമാണ് അനുഭവപ്പെടുക. ഇത് മുന്നില്‍കണ്ട് മറ്റ് ജില്ലകളില്‍നിന്നും വിത്ത് ആവശ്യപ്പെടുന്നുണ്ട്. വിത്ത് സംഭരണവില 40 രൂപയാക്കി ഉയര്‍ത്തണമെന്ന് രജിസ്‌ട്രേഡ് നെല്‍വിത്ത് ഉല്‍പാദക ഏകോപനസമിതി ആവശ്യപ്പെട്ടു.

നിലവില്‍ കര്‍ഷകരില്‍നിന്ന് നേരിട്ട് സംഭരിക്കുമ്പോള്‍ 28.70 രൂപയും സംസ്‌കരണകേന്ദ്രത്തില്‍ എത്തിക്കുമ്പോള്‍ 31.70 രൂപയുമാണ് ലഭിക്കുന്നത്. ഒരു കിലോ നെല്ലിന്റെ താങ്ങുവില 25.30 രൂപയാണ്. ഇതും വിത്തിന്റെ സംഭരണവിലയും തമ്മിലുള്ള വ്യത്യാസം 3.40 രൂപ മാത്രമാണ്.