ബിഷപ്പ് ഫ്രാങ്കോ മുളയ്ക്കലിന്റെ അറസ്റ്റിനെപ്പറ്റിയുള്ള ചര്‍ച്ചകള്‍ സജീവമാണ്. ബലാത്സംഗക്കേസില്‍ ബിഷപ്പിനെ അറസ്റ്റ് ചെയ്യുന്നതു സഭയുടെ അതൃപ്തിക്കു കാരണമാകുമെന്നു സര്‍ക്കാരിനും സി.പി.എമ്മിനും ആശങ്ക. ഇതു പ്രതിപക്ഷം മുതലെടുത്താല്‍ ലോക്‌സഭാ തെരഞ്ഞെടുപ്പില്‍ വലിയ തിരിച്ചടിയാകുമെന്നും പാര്‍ട്ടി നേതൃത്വം കണക്കുകൂട്ടുന്നു. രാജ്യത്തെ പ്രബലസഭയുടെ ബിഷപ്പിനെ അറസ്റ്റ് ചെയ്യുന്നതു വൈകാരികപ്രശ്‌നമായി മാറാന്‍ സാധ്യതയുണ്ടെന്നാണ് ഇന്റലിജന്‍സ് റിപ്പോര്‍ട്ട്. അതു മുതലെടുക്കാന്‍ പ്രതിപക്ഷ പാര്‍ട്ടികളും തയാറെടുക്കുകയാണ്.

ലോക്‌സഭാ തെരഞ്ഞെടുപ്പ് ആസന്നമായ സാഹചര്യത്തില്‍ കേരളത്തിലെ പ്രബല സമുദായത്തെ പിണക്കുന്നതു നല്ലതല്ലെന്ന വിലയിരുത്തലാണു സര്‍ക്കാരിനെയും സി.പി.എമ്മിനെയും ആശങ്കയിലാക്കുന്നത്. ഇന്ത്യന്‍ ശിക്ഷാനിയമം 376 പ്രകാരം കേസെടുത്തതിനാല്‍ അറസ്റ്റ് അനിവാര്യമാണ്. കോടതിയില്‍നിന്നേ ജാമ്യമെടുക്കാന്‍ കഴിയൂ. ഇതൊഴിവാക്കാന്‍ കോടതിയില്‍നിന്നു തന്നെ ഒരു പരിഹാരമാണു സര്‍ക്കാര്‍ ആഗ്രഹിക്കുന്നത്. അറസ്റ്റിനെതിരേ സഭയുടെ സമ്മര്‍ദവും സര്‍ക്കാരിനുമേലുണ്ട്. മതിയായ തെളിവില്ലാതെ അടുത്ത നടപടിയെടുത്താല്‍ സമാനസംഭവങ്ങള്‍ ആവര്‍ത്തിക്കാന്‍ ഇടയാക്കുമെന്നാണു സഭയുടെ നിലപാട്. 

സഭകള്‍ക്കുള്ളിലെ ചെറിയ പ്രശ്‌നംപോലും ഊതിപ്പെരുപ്പിച്ചു തെരുവിലേക്കു നീങ്ങുന്ന സ്ഥിതി വരും. പ്രശ്‌നം തെരുവിലെത്തുമ്പോള്‍ സാമൂഹികവിരുദ്ധര്‍ ഏറ്റെടുത്തു സര്‍ക്കാരിനെതിരായ അട്ടിമറിയായി തിരിച്ചുവിടുമെന്നും സഭാവൃത്തങ്ങള്‍ വാദിക്കുന്നു. ഈ സാഹചര്യത്തില്‍ കരുതലോടെയുള്ള തീരുമാനം വേണമെന്നാണു സഭകളുടെ പൊതുവികാരം. ബിഷപ്പിനെ പീഡനക്കേസില്‍ അറസ്റ്റ് ചെയ്യുന്നത് ഇവിടെ ആദ്യസംഭവമാകുമെന്നതിനാല്‍ ഇക്കാര്യത്തില്‍ സര്‍ക്കാരിന്റെ നയപരമായ തീരുമാനവും ആവശ്യമാണ്. അതേസമയം, തിടുക്കത്തില്‍ അറസ്റ്റ് തീരുമാനം ഉണ്ടാവില്ലെന്നും മുഖ്യമന്ത്രി തിരിച്ചെത്തുംവരെ കാത്തിരിക്കാനുമാണ് അന്വേഷണസംഘത്തിന്റെ തീരുമാനമെന്നും അറിയുന്നു. അതുവരെ അന്വേഷണം നീട്ടിക്കൊണ്ടുപോകാനാവും. എന്നാല്‍, അപ്രതീക്ഷിതമായി ഇന്ന് അറസ്റ്റ് നടത്തി സര്‍ക്കാരിന്റെ പ്രതിച്ഛായ ഉയര്‍ത്തണമെന്ന വാദവുമുണ്ട്.