സ്ത്രീകള്‍ക്കെതിരെയുള്ള അനീതിക്കും അക്രമത്തിനുമെതിരെ വാ തോരാതെ പ്രസംഗിക്കുന്ന വിപ്ലവ പാര്‍ട്ടിയുടെ ഇരട്ടത്താപ്പുകള്‍ പുറത്ത്. പികെ ശശി ഉള്‍പ്പെട്ട പീഡനത്തിലും കന്യാസ്ത്രീകളുടെ സമരത്തിലും ഡിവൈഎഫ്‌ഐ ഉള്‍പ്പെടെയുള്ള സംഘടനകളുടെ മൗനം ഏറെ ചര്‍ച്ചചെയ്യപ്പെട്ടിരുന്നു. കന്യാസ്ത്രീകളുടെ സമരത്തില്‍ ഇടപെടേണ്ട സാഹചര്യം നിലവില്‍ ഇല്ലെന്ന് എം. സ്വരാജ്. തൃശൂരില്‍ ഡിവൈഎഫ്‌ഐ ജില്ലാ സമ്മേളന ഉദ്ഘാടനത്തിനെത്തിയപ്പോള്‍ മാധ്യമപ്രവര്‍ത്തകരോടു സംസാരിക്കുകയായിരുന്നു സ്വരാജ്.
നിലവില്‍ കന്യാസ്ത്രീകള്‍ നടത്തുന്ന സമരത്തില്‍ ഡിവൈഎഫ്‌ഐ ഇടപെടേണ്ട സാഹചര്യമില്ലെന്ന് എം. സ്വരാജ് എംഎല്‍എ. കേസ് അട്ടിമറിക്കപ്പെട!ുന്ന സാഹചര്യമുണ്ടായാല്‍ ഇടപെടേണ്ടിവന്നേക്കാം. കന്യാസ്ത്രീകളുടെ സമരം സഭയിലും പൊതുസമൂഹത്തിലും വലിയ ചലനം സൃഷ്ടിക്കും.
സാമുദായിക പ്രീണനമോ വോട്ടുബാങ്ക് രാഷ്ട്രീയമോ ഇക്കാര്യത്തില്‍ ഡിവൈഎഫ്‌ഐയുടെ മുന്നിലില്ല. പി.കെ. ശശിക്കെതിരെ യുവതി പാര്‍ട്ടിക്കു നല്‍കിയ പരാതി സംഘടനാ നടപടി ആവശ്യപ്പെട്ടുള്ളതാണ്. നിയമ നടപടി ആവശ്യപ്പെട്ടുള്ളതല്ല. പാര്‍ട്ടി ഇക്കാര്യം അന്വേഷിക്കുന്നുണ്ടെന്നും അദ്ദേഹം പറഞ്ഞു.
എന്നാല്‍ സിപിഎമ്മിനെ പ്രതിരോധത്തിലാഴ്ത്തി പാര്‍ട്ടിക്കുള്ളില്‍ തലപ്പൊക്കിയ ലൈംഗികാരോപണം ഇപ്പോള്‍ ചവിട്ടിത്താഴ്ത്തിയിരിക്കുകയാണ്. പെണ്‍കുട്ടിയെക്കൊണ്ട് ശശിക്കെതിരെ പോലീസില്‍ പരാതി കൊടുപ്പിക്കാതിരിക്കാന്‍ കഴിഞ്ഞത് പാര്‍ട്ടിയുടെ വിജയമായിരുന്നു. അതുകൊണ്ട് നടന്ന പീഡനം പാര്‍ട്ടിയില്‍ ഒതുക്കാന്‍ കഴിഞ്ഞു. കൂടാതെ പാര്‍ട്ടി അന്വേഷണമെന്ന പുകമറയും.
പികെ ശശിക്കെതിരെ ഡിവൈഎഫ് ഐ വനിതാ നേതാവാണ് ആരോപണം ഉന്നയിച്ചത്. അതേസമയം ഈ വിഷയത്തില്‍ സിപിഎം നേതൃത്വം രണ്ടു തട്ടിലാണ്. കേന്ദ്ര നേതൃത്വത്തില്‍ സീതാറാം യെച്ചൂരി ശശിക്കെതിരെ കടുത്ത നടപടിയെടുക്കണമെന്ന് ആവശ്യപ്പെട്ടിട്ടുണ്ട്. എന്നാല്‍ പരാതിയേ ലഭിച്ചിട്ടില്ലെന്നാണ് പ്രകാശ് കാരാട്ടിന്റെ വാദം. ബൃന്ദാകാരാട്ടിനടക്കം പെണ്‍കുട്ടി പരാതി നല്‍കിയിട്ടും നടപടി ഉണ്ടായില്ല. എന്നിട്ടും പരാതി ഉണ്ടെന്നും അതില്‍ നടപടിയെടുക്കണമെന്നും ശക്തമായി വാദിച്ചത് യെച്ചൂരി കാരണമായിരുന്നു. അതുകൊണ്ട് പരാതി ഉണ്ടെന്ന കാര്യമെങ്കിലും പുറത്തുവന്നു അത്രമാത്രം. കന്യാസ്ത്രീ സമരത്തില്‍ ഇടപെടരുതെന്ന് മുകളില്‍ നിന്നും നേരത്തെ തന്നെ നിര്‍ദ്ദേശം ഡിവൈഎഫ്‌ഐ അടക്കം വിപ്ലവ സംഘടനകള്‍ക്ക് നല്‍കിയിരുന്നു.