ശബരിമലയില്‍ പ്രായഭേദമെന്യേ സ്ത്രീകളെ പ്രവേശിപ്പിക്കണമെന്ന സുപ്രീംകോടതി വിധി നടപ്പാക്കുന്നതില്‍ നിലപാട് മയപ്പെടുത്തി തിരുവിതാംകൂര്‍ ദേവസ്വം ബോര്‍ഡ്. കോടതിവിധി നടപ്പാക്കുമെന്ന് ആദ്യം നിലപാടെടുത്ത ബോര്‍ഡ് പ്രസിഡന്റ് എ. പദ്മകുമാര്‍ ക്ഷേത്രാചാരം നിലനിര്‍ത്തി തീര്‍ഥാടനം പൂര്‍ത്തിയാക്കുകയാണ് ലക്ഷ്യമെന്ന് ബുധനാഴ്ച ചേര്‍ന്ന ബോര്‍ഡ് യോഗത്തിനുശേഷം പ്രതികരിച്ചു. സംസ്ഥാന വ്യാപകമായി നടന്നുകൊണ്ടിരിക്കുന്ന പ്രതിഷേധള്‍തന്നെയാണ് നിലപാട് മയപ്പെടുത്തിയതാന്‍ ദവസ്വം ബോര്‍ഡ് നിര്‍ബന്ധിതരാടതെന്നാണ് വിലയിരുത്തല്‍.

ശബരിമലക്ക് ദോഷകരമായി ഒന്നും ചെയ്യില്ലെന്നും ആചാരകാര്യങ്ങള്‍ നന്നായി പാലിക്കാന്‍ ശ്രമിക്കുമെന്നും പദ്മകുമാര്‍ പറഞ്ഞു. പ്രസിഡന്റ് പറഞ്ഞ കാര്യങ്ങളാണ് ശബരിമലയില്‍ നടപ്പാക്കുകയെന്ന് പിന്നീട് ദേവസ്വം മന്ത്രി കടകംപള്ളി സുരേന്ദ്രനും പറഞ്ഞു. ബോര്‍ഡ് യോഗം നടക്കുന്നതിനിടെ മന്ത്രിയുമായി നടത്തിയ കൂടിക്കാഴ്ചയ്ക്കു ശേഷമായിരുന്നു പ്രസിഡന്റിന്റെ വിശദീകരണം.

തുലാമാസപൂജയ്ക്ക് സ്ത്രീകള്‍ക്ക് ശബരിമലയില്‍ അധികസൗകര്യങ്ങള്‍ ഉണ്ടാകില്ല. പ്രയാര്‍ ഗോപാലകൃഷ്ണന്‍ പ്രസിഡന്റായിരുന്ന കാലത്തുള്ള ക്രമീകരണങ്ങള്‍ മാത്രമേ ഇത്തവണയും ഉണ്ടാകൂ. മുന്‍ ബോര്‍ഡുകളുടെ കാലത്ത് ശബരിമലയില്‍ എന്തുണ്ടായിരുന്നോ അതുപോരേ ഇപ്പോഴെന്നു പ്രസിഡന്റ് ചോദിച്ചു. പുതിയതായി കൂടുതലൊന്നും ചെയ്യാനില്ല.

സന്നിധാനത്ത് വനിതാപോലീസിനെയും വനിതാ ജീവനക്കാരെയും നിര്‍ത്തണോയെന്ന് ബോര്‍ഡ് ആലോചിച്ചിട്ടില്ല. പതിനെട്ടാംപടിയില്‍ വനിതാ പോലീസിനെ വിന്യസിക്കാന്‍ തീരുമാനിച്ചിട്ടില്ല. വനിതാപോലീസ് പമ്പയിലും നിലയ്ക്കലും മാത്രം മതിയെന്ന നിലപാടാണ് ബോര്‍ഡിന്. വനിതാ പോലീസിനെ ശബരിമലയില്‍ എത്തിക്കുന്നതുമായി ബന്ധപ്പെട്ട ഒരു ചര്‍ച്ചയും നടന്നിട്ടില്ല.

ക്ഷേത്രത്തിലെ ആചാരം സംരക്ഷിക്കാന്‍ ബോര്‍ഡിന് ബാധ്യതയുണ്ട്. അതുപോലെതന്നെയാണ് കോടതിവിധിയുടെ കാര്യവും. ആരുമായും ചര്‍ച്ചയ്ക്ക് താനും ബോര്‍ഡ് അംഗങ്ങളും തയ്യാറാണെന്നും പിടിവാശിയില്ലെന്നും പദ്മകുമാര്‍ പറഞ്ഞു.

ദേവസ്വം ബോര്‍ഡിനെ സംബന്ധിച്ച് കോടതിവിധി നടപ്പാക്കുന്നതില്‍ പ്രത്യേക താത്പര്യമോ താത്പര്യമില്ലായ്മയോ ഇല്ല. പ്രായഭേദമെന്യേ സ്ത്രീകള്‍ ശബരിമലയില്‍ വരണമെന്ന വാശി ബോര്‍ഡിനില്ല. ഇപ്പോഴത്തെ പ്രതിഷേധങ്ങളെല്ലാം ബോധപൂര്‍വം ഉണ്ടാക്കുന്നതാണ്. തീര്‍ഥാടനം ഭംഗിയാക്കാന്‍ എല്ലാം ഒറ്റയ്ക്കുനടത്തി ആളാകണമെന്ന് ബോര്‍ഡിന് ആഗ്രഹമില്ല. താന്‍ പ്രസിഡന്റായശേഷം പന്തളം കൊട്ടാരത്തിന് അര്‍ഹമായ പരിഗണന കൊടുത്തിട്ടുണ്ട്. തന്ത്രി കുടുംബവുമായും കൊട്ടാരവുമായും എല്ലാം ചര്‍ച്ച ചെയ്യാറുണ്ട്. എന്നാല്‍, അവര്‍ രാഷ്ട്രീയമായി ചിന്തിക്കുന്നതില്‍ യോജിക്കുന്നില്ല. അവരുമായി തര്‍ക്കത്തിനുമില്ല. ശബരിമലയെ സംബന്ധിച്ച് തന്ത്രിസമൂഹം പിതൃസ്ഥാനീയരാണ്. എന്തെങ്കിലും പ്രശ്‌നമുണ്ടായാല്‍ പരിഹരിക്കേണ്ടവരാണ് അവരെന്നും പദ്മകുമാര്‍ പറഞ്ഞു. ശബരിമലയില്‍ ഹൈക്കോടതി നിര്‍ദേശിക്കുന്നതുപ്രകാരമുള്ള കാര്യങ്ങള്‍ നടപ്പാക്കും.