ശബരിമലയില് സ്ത്രീകളെ കയറ്റുവാന് വേണ്ടി പുരോഗമന വാദികളും ദേവസ്വം പ്രസിഡന്റും രംഗത്ത് വരുമ്പോള് തന്നെ ആരും അറിയാതെ മറ്റൊരു വിവേചനം; പിന്നാക്കക്കാരന് വിഷ്ണുനാരായണന് ശബരിമലയിലെ മേല്ശാന്തി ആവണ്ടെന്ന് ദേവസ്വം
ശബരിമലയില് സ്ത്രീകളെ കയറ്റുവാന് വേണ്ടി പുരോഗമന വാദികളും ദേവസ്വം പ്രസിഡന്റും ശക്തമായ നിലപാടെടുക്കുമ്പോള് വേദനയോടെ വിഷ്ണു. ശബരിമല മേല്ശാന്തി നിയമനത്തിനു സമര്പ്പിച്ച പിന്നാക്കക്കാരന്റെ അപേക്ഷ വേണ്ടപ്പെട്ടവനല്ലെന്ന കാരണത്താല് തിരുവിതാംകൂര് ദേവസ്വം ബോര്ഡ് നിരസിച്ചു.
മലയാള ബ്രാഹ്മണനല്ലാത്തതിനാല് നിരസിക്കുന്നു എന്ന ദേവസ്വം സെക്രട്ടറി എസ്. ജയശ്രീയുടെ റിജക്ഷന് മെമ്മോ ചൊവ്വാഴ്ച കോട്ടയം സ്വദേശി സി.വി. വിഷ്ണുനാരായണന് ലഭിച്ചു. ആക്ഷേപമുണ്ടെങ്കില് ഇന്ന് വൈകിട്ട് അഞ്ചിനകം സമര്പ്പിക്കണമെന്നും നിര്ദ്ദേശിച്ചിട്ടുണ്ട്. നാളെയും മറ്റന്നാളുമാണ് ഇന്റര്വ്യൂ.
കോട്ടയത്ത് എസ്.എന്.ഡി.പി യോഗം പള്ളം ശാഖയിലെ സുബ്രഹ്മണ്യസ്വാമി ക്ഷേത്രത്തില് മേല്ശാന്തിയാണ് വിഷ്ണുനാരായണന്. കഴിഞ്ഞ വര്ഷവും അപേക്ഷിച്ചിരുന്നെങ്കിലും നിരസിച്ചിരുന്നില്ല. അഭിമുഖത്തിന് വിളിച്ചതുമില്ല. ഇത് സംബന്ധിച്ച കേസ് ഇപ്പോഴും ഹൈക്കോടതിയിലുണ്ട്. ജന്മബ്രാഹ്മണ്യം ഒഴികെ ബോര്ഡ് നിഷ്കര്ഷിച്ച എല്ലാ യോഗ്യതകളും പാലിക്കുന്നയാളാണ് ഇദ്ദേഹം.
ദേവസ്വം ബോര്ഡുകളിലെ ശാന്തി നിയമനങ്ങളില് ജാതിവിവേചനം പാടില്ലെന്ന് സുപ്രീംകോടതി 2002ല് ഉത്തരവിട്ടതാണ്. 2014ല് ഉമ്മന്ചാണ്ടി സര്ക്കാരും എല്ലാ ദേവസ്വം ബോര്ഡുകള്ക്കും ഈ നിര്ദ്ദേശം നല്കിയിരുന്നു.
ശബരിമലയില് യുവതീപ്രവേശനം അനുവദിക്കണമെന്ന സുപ്രീംകോടതി വിധി നടപ്പാക്കാന് ആവേശംകാട്ടിയ ദേവസ്വം ബോര്ഡും സര്ക്കാരും മേല്ശാന്തി നിയമനകാര്യത്തില് നിഷേധം തുടരുകയാണ്.
വിഷ്ണുനാരായണന്റെ അപേക്ഷ നിരസിച്ച കാര്യം അറിയില്ല. അന്വേഷിച്ച് മറുപടി പറയാം. കാലങ്ങളായി തുടര്ന്നുവരുന്ന കീഴ് വഴക്കവും കോടതികാര്യങ്ങളും പരിശോധിക്കണം.
https://www.facebook.com/Malayalivartha
