ചിത്തിരആട്ട വിശേഷത്തിന് ശബരിമലയില്‍ ആക്രമങ്ങള്‍ നടത്തിയവര്‍ക്കെതിരെ ഹൈക്കോടതി ദേവസ്വം ബെഞ്ച് സ്വമേധയാ കേസ് എടുത്തു. ശബരിമല സ്‌പെഷ്യല്‍ കമ്മീഷന്‍ മനോജിന്റെ റിപ്പോര്‍ട്ടിന്റെ അടിസ്ഥാനത്തിലാണ് കേസ്. ഇക്കാര്യത്തില്‍ ഒരാഴ്ചയ്ക്കുള്ളില്‍ റിപ്പോര്‍ട്ട് സമര്‍പ്പിക്കാന്‍ ദേവസ്വം ബോര്‍ഡിനോട് ആവശ്യപ്പെടുകയും ചെയ്തു. ദര്‍ശനത്തിനെത്തിയ സ്ത്രീകളെ പമ്പയിലും സന്നിധാനത്തും തടഞ്ഞത് സുപ്രീംകോടതി വിധിക്കെതിരാണെന്നും ശബരിമലയിലെ സ്ഥിതി അതീവ ഗുരുതരമാണെന്നും ആചാരലംഘനം നടന്നെന്നും ദേവസ്വം സ്‌പെഷ്യല്‍ കമ്മിഷണര്‍ ഹൈക്കോടതിയില്‍ നല്‍കിയ റിപ്പോര്‍ട്ടില്‍ വ്യക്തമാക്കിയിരുന്നു.

ഈ സ്ഥിതി തുടര്‍ന്നാല്‍ മണ്ഡലകാലം കലുഷിതമാകും. ദേശവിരുദ്ധ ശക്തികളും ക്രിമിനലുകളും നിലവിലെ സാഹചര്യം മുതലാക്കും. കാരണം ശബരിമലയ്ക്ക് കുറേ വര്‍ഷങ്ങളായി സുരക്ഷാഭീഷണിയുണ്ട്. രാഷ്ട്രീയ പാര്‍ട്ടികള്‍ നടത്തുന്ന പ്രക്ഷോഭങ്ങള്‍ക്ക് നിയന്ത്രണം ഏര്‍പ്പെടുത്തണം. പതിനെട്ടാംപടിയില്‍ ഇരുമുടിക്കെട്ടില്ലാതെ കയറിയത് ആചാരലംഘനമാണ്. തുടങ്ങിയ കാര്യങ്ങളും റിപ്പോര്‍ട്ടില്‍ ചൂണ്ടിക്കാട്ടിയിരുന്നു.

പന്തളം കൊട്ടാരം അംഗങ്ങള്‍ക്കും തന്ത്രിക്കും മറ്റ് ചില ഉദ്യോഗസ്ഥര്‍ക്കും മാത്രമാണ് ഇരുമുടിക്കെട്ടില്ലാതെ പതിനെട്ടാംപടി കയറാന്‍ അവകാശം. എന്നാല്‍ ആര്‍.എസ്.എസ് നേതാവ് വത്സന്‍ തില്ലങ്കേരിയും ദേവസ്വം ബോര്‍ഡ് അംഗം കെ.പി ശങ്കര്‍ ദാസും ഇരുമുടിയില്ലാതെ പതിനെട്ടാംപടി കയറിയിരുന്നു. ദേവസ്വം ബോര്‍ഡ് അംഗമെന്ന നിലയില്‍ ആചാരത്തിന്റെ ഭാഗമായാണ് താന്‍ ഇരുമുടിക്കെട്ടില്ലാതെ പതിനെട്ടാംപടി കയറിയതെന്ന് ശങ്കര്‍ദാസ് വ്യക്തമാക്കിയിരുന്നു. ഇത് സംഭന്ധിച്ച് മുന്‍ ദേവസ്വം പ്രസിഡന്റ് പ്രയാര്‍ ഗോപാലകൃഷ്ണന്‍ നല്‍കിയ ഹര്‍ജി നിലനില്‍ക്കില്ലെന്ന് ഹൈക്കോടതി വ്യക്തമാക്കിയിരുന്നു. 

ചിത്തിര ആട്ടവിശേഷസമയത്ത് അന്‍പത്തിരണ്ട് വയസുളള തൃശൂര്‍ സ്വദേശി ദര്‍ശനത്തിനെത്തിയപ്പോള്‍ ആര്‍.എസ്.എസ് നേതാവ് വത്സന്‍ തില്ലങ്കേരിയുടെ നേതൃത്വത്തില്‍ ഒരുകൂട്ടം ആളുകള്‍ ഇരുമുടിക്കെട്ടില്ലാതെ പതിനെട്ടാംപടി കയറിയിരുന്നു. പലരും പടിയില്‍ നിന്ന് ആക്രോശം നടത്തിയിരുന്നു. ഒടുവില്‍ പൊലീസ് ഇടപെട്ടാണ് ലളിത എന്ന സ്ത്രീയെ ശ്രീകോവിലിലെത്തിച്ചത്. അവരുടെ മകനെയും ഭര്‍ത്താവ് രവിയേയും ഒരു കൂട്ടം ഭക്തര്‍ ആക്രമിച്ചിരുന്നു. ഇക്കാര്യങ്ങളെല്ലാം പരിശോധിച്ച ശേഷമാണ് ഹൈക്കോടതിയില്‍ റിപ്പോര്‍ട്ട് സമര്‍പ്പിച്ചത്.