ശബരിമലയില്‍ യുവതികളെ പ്രവേശിപ്പിച്ച സുപ്രീംകോടതി ഉത്തരവിനെതിരെ സമര്‍പ്പിച്ച റിവ്യൂഹര്‍ജി പരിഗണിച്ച് തുറന്ന കോടതിയില്‍ വാദം കേള്‍ക്കാമെന്ന പുതിയ ഉത്തരവ് സ്വാഗതാര്‍ഹമാണെന്ന് തന്ത്രി കണ്ഠരര് രാജീവര്‍. അയ്യപ്പന്റെ അനുഗ്രഹമാണ്. ഭക്തരുടെ പ്രാര്‍ത്ഥന അയ്യപ്പന്‍ കേട്ടു. പ്രളയം, യുവതി പ്രവേശനത്തെ തുടര്‍ന്നുണ്ടായ സംഘര്‍ഷങ്ങള്‍ എന്നീ സംഭവങ്ങളില്‍ ശബരിമല വല്ലാത്ത അവസ്ഥയിലായിരുന്നു. ശബരിമലയുടെ ചരിത്രത്തില്‍ ഇങ്ങിനെയൊരു അവസ്ഥ ഉണ്ടായിട്ടില്ല. തല്‍ക്കാലം അയ്യപ്പന്‍ രക്ഷിച്ചു. എല്ലാം ഭക്തരുടെ പ്രാര്‍ത്ഥനയാണ്. എല്ലാവരോടും നന്ദി രേഖപ്പെടുത്തുന്നെന്നും അദ്ദേഹം ചെങ്ങന്നൂരില്‍ പ്രതികരിച്ചു.

ശബരിമലയില്‍ യുവതികളെത്തിയാല്‍ നട അടയ്ക്കുമെന്ന് തന്ത്രി നേരത്തെ വ്യക്തമാക്കിയിരുന്നു. മണ്ഡലകാലത്ത് ദര്‍ശനത്തിനായി പത്തിനും 50നും ഇടയില്‍ പ്രായമുള്ള 550 വനിതകള്‍ പൊലീസിന്റെ വെബ്‌സൈറ്റില്‍ രജിസ്റ്റര്‍ ചെയ്തിട്ടുണ്ടെന്ന റിപ്പോര്‍ട്ട് വന്നതിന് പിന്നാലെയാണ് അദ്ദേഹം ഇക്കാര്യം വ്യക്തമാക്കിയത്. യുവതികള്‍ ദര്‍ശനം നടത്തിയാല്‍ താക്കോല്‍ ദേവസ്വത്തിന് കൈമാറുമെന്നാണ് അദ്ദേഹം പറഞ്ഞത്. യുവതികള്‍ ശ്രീകോവിലെത്തിയാല്‍ നട അടയ്ക്കുമെന്ന് തന്ത്രി പറഞ്ഞത് വിവാദമായിരുന്നു. 

ക്ഷേത്രാചാരം സംരക്ഷിക്കാന്‍ തന്ത്രി ബാധ്യസ്ഥനാണ്. അത് റിറവേറ്റും. ഇല്ലെങ്കില്‍ താക്കോല്‍ കൈമാറി പടിയിറങ്ങും. തന്ത്രിയുടെ വാക്കിന് വിലയില്ലെങ്കില്‍ തുടരുന്നതില്‍ അര്‍ത്ഥമില്ലെന്നാണ് തന്ത്രി പറഞ്ഞത്. തന്ത്രിസ്ഥാനം വഹിക്കുന്നയാള്‍ക്ക് ഒഴിയാനാവില്ല, ആര്‍ക്കെങ്കിലും തന്ത്രിയെ ഒഴിവാക്കാനും പറ്റില്ല. പ്രതിഷ്ഠാ കര്‍മങ്ങള്‍ക്ക് ശേഷം മൂര്‍ത്തിയുടെ പിതാവ് എന്ന നിലയില്‍ ലഭിക്കുന്നതാണ്. തന്ത്രി ദേവനെ കുഞ്ഞായാണ് കാണുന്നത്. അതിനാലാണ് തന്ത്രി പിതൃസ്ഥാനീയനാകുന്നതെന്നും രാജീവര് പറഞ്ഞിരുന്നു.