ശബരിമലയില്‍ പ്രായഭേദമന്യേ സ്ത്രീകള്‍ക്ക് കയറാമെന്ന വിധി സുപ്രീം കോടതി സ്‌റ്റേ ചെയ്തിട്ടില്ലെന്ന് മുഖ്യമന്ത്രി പിണറായി വിജയന്‍. പത്തിനും അമ്പതിനും ഇടയിൽ പ്രായമുള്ള യുവതികൾക്ക് ശബരിമലയിൽ പ്രവേശിക്കാം എന്ന നേരത്തെയുള്ള സുപ്രീം കോടതി വിധി അതുപോലെ നിലനിൽക്കുന്നു. പുനഃപരിശോധന ഹര്‍ജികള്‍ തുറന്ന കോടതിയില്‍ കേള്‍ക്കുമെന്നാണ് കോടതി പറഞ്ഞിട്ടുള്ളത്. അതിന് വേറെ അര്‍ത്ഥമൊന്നുമില്ലല്ലോയെന്നും നിയമവിദഗ്ധരുമായി ആലോചിച്ച്‌ ഇക്കാര്യത്തില്‍ നടപടി സ്വീകരിക്കുമെന്നും മുഖ്യമന്ത്രി പ്രതികരിച്ചു.

ശബരിമല യുവതി പ്രവേശനത്തിനെതിരായ പുനഃപരിശോധന ഹര്‍ജികള്‍ തുറന്ന കോടതിയില്‍ വാദം കേള്‍ക്കാന്‍ സുപ്രിം കോടതി തീരുമാനിച്ചു. ജനുവരി 22നാണ് കേസില്‍ വാദം കേള്‍ക്കുക. ചീഫ് ജസ്റ്റിസ് രഞ്ജന്‍ ഗൊഗോയിയുടെ നേതൃത്വത്തിലുള്ള അഞ്ചംഗ ഭരണഘടനാ ബെഞ്ചിന്റേതാണ് തീരുമാനം.

ശബരിമല യുവതീപ്രവേശനവുമായി ബന്ധപ്പെട്ട പുന:പരിശോധന ഹര്‍ജികളില്‍ വാദം കേള്‍ക്കാന്‍ തീരുമാനിച്ച സാഹചര്യത്തില്‍ സര്‍ക്കാര്‍ ആലോചിച്ച്‌ തീരുമാനമെടുക്കുമെന്ന് സി.പി.എം. സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു.സുപ്രീംകോടതിയുടെ തീരുമാനം പരിശോധിച്ച്‌ ഉചിതമായ തീരുമാനമെടുക്കുമെന്നും, സുപ്രീംകോടതിയുടെ പുതിയ തീരുമാനം സര്‍ക്കാരിനെ പ്രതിസന്ധിയിലാക്കുന്നതല്ലെന്നും അദ്ദേഹം പറഞ്ഞു.
യുവതീപ്രവേശനവുമായി ബന്ധപ്പെട്ട വിധി പുന:പരിശോധിക്കാനാണ് സുപ്രീംകോടതി തീരുമാനിച്ചിരിക്കുന്നത്. അതിനാല്‍ പുതിയ സാഹചര്യവും നേരത്തെയുള്ള സാഹചര്യവും ഒന്നുതന്നെയാണ്. എല്ലാകാര്യങ്ങളും സര്‍ക്കാര്‍ പരിശോധിക്കുംകോടിയേരി വ്യക്തമാക്കി.

അതേസമയം ശബരിമലയില്‍ യുവതികളെ പ്രവേശിപ്പിച്ച സുപ്രീംകോടതി ഉത്തരവിനെതിരെ സമര്‍പ്പിച്ച റിവ്യൂഹര്‍ജി പരിഗണിച്ച് തുറന്ന കോടതിയില്‍ വാദം കേള്‍ക്കാമെന്ന പുതിയ ഉത്തരവ് സ്വാഗതാര്‍ഹമാണെന്ന് തന്ത്രി കണ്ഠരര് രാജീവര്‍. അയ്യപ്പന്റെ അനുഗ്രഹമാണ്. ഭക്തരുടെ പ്രാര്‍ത്ഥന അയ്യപ്പന്‍ കേട്ടു. പ്രളയം, യുവതി പ്രവേശനത്തെ തുടര്‍ന്നുണ്ടായ സംഘര്‍ഷങ്ങള്‍ എന്നീ സംഭവങ്ങളില്‍ ശബരിമല വല്ലാത്ത അവസ്ഥയിലായിരുന്നു. ശബരിമലയുടെ ചരിത്രത്തില്‍ ഇങ്ങിനെയൊരു അവസ്ഥ ഉണ്ടായിട്ടില്ല. തല്‍ക്കാലം അയ്യപ്പന്‍ രക്ഷിച്ചു. എല്ലാം ഭക്തരുടെ പ്രാര്‍ത്ഥനയാണ്. എല്ലാവരോടും നന്ദി രേഖപ്പെടുത്തുന്നെന്നും അദ്ദേഹം ചെങ്ങന്നൂരില്‍ പ്രതികരിച്ചു.