പൊലീസിന്റെ മുമ്പില്‍ കേന്ദ്രമന്ത്രി ഒന്നുമല്ലാതായി... കേന്ദ്രമന്ത്രി പൊന്‍ രാധാകൃഷ്‌ണെന്റ വാഹനം പമ്പയില്‍ തടഞ്ഞതിന്റെ പേരില്‍ തര്‍ക്കം മുറുകുന്നു. എസ്.പി.മാരായ യതീഷ് ചന്ദ്രയ്‌ക്കെതിരേയും ഹരിശങ്കറിനെതിരേയും നടപടി വേണമെന്ന ആവശ്യവുമായി ബിജെപി കേന്ദ്രത്തിലേക്ക്. പ്രതിഷേധകരുടെ വാഹനമെന്ന് തെറ്റിദ്ധരിച്ച് കേന്ദ്രമന്ത്രി പൊന്‍ രാധാകൃഷ്ണന്റെ വാഹനം പൊലീസ് പമ്പയില്‍ തടഞ്ഞുവെന്ന തര്‍ക്കം റിപ്പോര്‍ട്ട് ചെയ്ത ചാനല്‍ വാര്‍ത്തകള്‍ കണ്ടാണ് കേരളം ഇന്ന് ഉണര്‍ന്നത്.

അര്‍ദ്ധ രാത്രിയില്‍ നടന്ന സംഭവം കേരള മറിഞ്ഞത് ഇന്ന് രാവിലെയാണ്. ഇത് ഭക്തജനങ്ങളില്‍ വല്ലാതെ ആശങ്കയുണ്ടാക്കി. ഇന്നലെ രാവിലെ വലിയ പരിവാരത്തോടെ ശബരിമലയിലേക്ക് വന്ന മന്ത്രി പൊന്‍ രാധാകൃഷ്ണന്റെ ദയനീയ പരാജയമാണ് പിന്നീട് കണ്ടത്. പ്രോട്ടോകോളില്‍ വളരെ താഴെയുള്ള രണ്ട് എസ്പിമാരാണ് മന്ത്രിയോട് തര്‍ക്കിച്ച് സംസാരിച്ചത്. വീരശൂരപരാക്രമിയായി വന്ന മന്ത്രിയും ബി.ജെ.പി സംസ്ഥാന ജനറല്‍സെക്രട്ടറി എ.എന്‍ രാധാകൃഷ്ണനും വിനീത വിധേയരായി മടങ്ങേണ്ടിവന്നു.

കേന്ദ്രമന്ത്രി ജൂനിയറായ എസ്.പിയുമായി സംസാരിച്ചത് തന്നെ അദ്ദേഹത്തിന്റെ പദവിക്ക് ചേര്‍ന്നതല്ലെന്ന ആക്ഷേപവും ഉയരുന്നുണ്ട്. ഡി.ജി.പിയുമായോ, ദേവസ്വം മന്ത്രിയുമായോ, മുഖ്യമന്ത്രിയുമായോ ആണ് പൊന്‍രാധാകൃഷ്ണന്‍ സംസാരിക്കേണ്ടിയിരുന്നത്. എന്നാല്‍ കെ.സുരേന്ദ്രനെ അറസ്റ്റ് ചെയ്തതിലുള്ള രോഷം തീര്‍ക്കുകയാണ് മന്ത്രിക്കൊപ്പം വന്ന എ.എന്‍ രാധാകൃഷ്ണന്‍ ചെയ്തത്. എസ്.പിയെ പ്രകോപിപ്പിച്ച് പ്രശ്‌നങ്ങള്‍ സൃഷ്ടിക്കുകയായിരുന്നു രാധാകൃഷ്ണന്റെ ലക്ഷ്യം. എന്നാല്‍ രാധാകൃഷ്ണന് മറുപടി നല്‍കാന്‍പോലും എസ്.പി കൂട്ടാക്കിയില്ല. മന്ത്രിയുടെ വാഹനം കടത്തിവിടാമെന്ന് പറഞ്ഞെങ്കിലും മന്ത്രി കെ.എസ്.ആര്‍.ടി.സി ബസില്‍ പമ്പയിലേക്ക് പോയി. ശബരിമലയിലെ പ്രശ്‌നങ്ങളും നിയന്ത്രണങ്ങളും അറിയാത്തത് കൊണ്ടല്ല മന്ത്രി തന്റെ കൂടെ വന്ന സ്വകാര്യവാഹനങ്ങള്‍ കടത്തിവിടണമെന്ന് ആവശ്യപ്പെട്ടത് എന്ന് വ്യക്തമാണ്. എസ്.പിയെ കുരുക്കുകയായിരുന്നു ലക്ഷ്യം.

എന്നാല്‍ ബുദ്ധിമാനായ എസ്.പി കേന്ദ്രമന്ത്രിയെ വെട്ടിലാക്കിയതോടെയാണ് അദ്ദേഹവും എ.എന്‍ രാധാകൃഷ്ണനും സ്ഥലം കാലിയാക്കിയത്. പമ്പയിലെ നിലവിലെ സാഹചര്യത്തില്‍ സ്വകാര്യവാഹനങ്ങള്‍ക്ക് പാര്‍ക്ക് ചെയ്യാനുള്ള സൗകര്യമില്ലെന്നും സാര്‍ ഉത്തരവിട്ടില്‍ കടത്തിവിടാമെന്നും എസ്.പി പറഞ്ഞതോടെ മന്ത്രി പതിയെ പിന്‍മാറുകയായിരുന്നു. തന്റെ അധികാരപരിധിയിലില്ലാത്ത പ്രദേശത്ത് നിയമലംഘിച്ച് വാഹനങ്ങള്‍ കടത്തിവിടണമെന്ന് കേന്ദ്രമന്ത്രി ആവശ്യപ്പെടുകയാണ് ചെയ്തത്. ഇത് വ്യക്തമായി അറിയാവുന്നത് കൊണ്ടാണ് സര്‍ക്കാരും ഐ.പി.എസ് അസോസിയേഷനും എസ്.പിക്ക് പിന്തുണ നല്‍കിയത്.