ശബരിമല ദര്ശനത്തിനെത്തിയ തൃശൂര് സ്വദേശി ലളിതയെ മര്ദ്ദിച്ച സംഭവത്തിന്റെ ഗൂഢാലോചന കേസില് കെ.സുരേന്ദ്രനും വത്സന്തില്ലങ്കേരിയും അടക്കം അഞ്ച് പേര് പ്രതികള്, ജാമ്യമില്ലാവകുപ്പാണ് ചുമത്തിയിരിക്കുന്നത്, അറസ്റ്റിലായാല് ഇവരെല്ലാം ഒരു ജയിലില് കഴിയേണ്ടിവരും
ശബരിമലയിലെ അക്രമസംഭവങ്ങളുമായി ബന്ധപ്പെട്ട് ബി.ജെ.പി സംസ്ഥാന ജനറല് സെക്രട്ടറി കെ.സുരേന്ദ്രനും ആര്.എസ്.എസ് നേതാവ് വത്സന് തില്ലങ്കേരിയും അടക്കമുള്ള അഞ്ച് നേതാക്കള്ക്കെതിരെ ജാമ്യമില്ലാ വകുപ്പ് ചുമത്തി കേസ് എടുത്തു. ചിത്തിര ആട്ടവിശേഷവുമായി ബന്ധപ്പെട്ട് ശബരിമല ദര്ശനത്തിനെത്തിയ തൃശൂര് സ്വദേശി ലളിതാ ദേവിയെ ആക്രമിച്ചതിനാണ് കേസ്. സംഭവത്തില് സുരേന്ദ്രനും തില്ലങ്കേരിയും വി.വി രാജേഷും പ്രകാശ് ബാബുവും ആര്.രാജേഷും ഡൂഢാലോചന നടത്തിയെന്നാണ് പൊലീസ് കേസ്. കഴിഞ്ഞയാഴ്ച ആര്. രാജേഷിന്റെ നേതൃത്വത്തിലാണ് സന്നിധാനത്തെ നടപ്പന്തല് കയ്യേറി നാമജപം നടത്തിയത്. തുടര്ന്ന് ഇയാള് റിമാന്ഡിലായിരുന്നു.
മകന്റെ മകന്റെ ചോറൂണിനായി സന്നിധാനത്ത് എത്തിയതായിരുന്നു 52 കാരിയായ ലളിതയും ഭര്ത്താവ് രവീന്ദ്രനും. പ്രായത്തില് സംശയം തോന്നിയ ആര്.എസ്.എസ് പ്രവര്ത്തകര് ലളിതയെ വളഞ്ഞിട്ട് ആക്രമിക്കുകയായിരുന്നു. തിരിച്ചറിയല് രേഖ കാണിച്ചെങ്കിലും അത് മരുമകളുടേതായിപ്പോയി ഇതോടെ അക്രമികള് തേങ്ങ ഉള്പ്പെടെ ലളിതയുടെ നേര്ക്കെറിഞ്ഞു. ലളിതയുടെ മകനെയും ആക്രമിച്ചു. ഇരുമുടിക്കെട്ടില്ലെന്ന് പറഞ്ഞായിരുന്നു അക്രമം. പൊലീസ് ഇടപെട്ടാണ് പ്രശ്നം പരിഹരിച്ചത്. ഈ സമയം ആര്.എസ്.എസ് നേതാവ് വത്സന് തില്ലങ്കേരി അടക്കം ഇരുമുടിക്കെട്ടില്ലാതെ പതിനെട്ടാംപടിയിലേക്ക് കയറിയിരുന്നു. പ്രവര്ത്തകര് ആക്രമാസക്തമായതോടെ പൊലീസ് മൈക്ക് ഉപയോഗിച്ചാണ് വത്സന് തില്ലങ്കേരി അവരെ അനുനയിപ്പിച്ചത്.
കെ. സുരേന്ദ്രനെതിരെ ആദ്യം കേസെടുത്തിരുന്നു. സുരേന്ദ്രനെതിരെ ജാമ്യമില്ലാ വകുപ്പായ 120 ബി ചുമത്തി കോടതിയില് റിപ്പോര്ട്ട് നല്കി. ഇതോടെ റിമാന്ഡില് കഴിയുന്ന സുരേന്ദ്രന് വെട്ടംകാണണമെങ്കില് കുറേ കാലമെടുക്കും. കേസില് ആദ്യം അറസ്റ്റിലായ പ്രതി സൂരജിന്റെ ഫേസ്ബുക്ക് പോസ്റ്റില് നിന്ന് ഗൂഢാലോചന വ്യക്തമാണെന്നും പൊലീസ് അറിയിച്ചു. വിശ്വാസികളെന്ന വ്യാജേന എത്തിയ അക്രമികള്ക്കൊപ്പം നിന്ന് പോലീസിനും സര്ക്കാര് നിലപാടുകള്ക്കും എതിരെ സുരേന്ദ്രന് ശബ്ദിച്ചിരുന്നു. കോടതി വിധി നടപ്പാക്കാന് എത്തിയ അധികൃതരെയും പൊലീസിനെയും തടയാനായി ഭക്തരെ സംഘടിപ്പിച്ചവരില് കെ സുരേന്ദ്രനുമുണ്ടായിരുന്നു.
ചിത്തിര ആട്ടത്തിന് അക്രമങ്ങള്ക്ക് നേതൃത്വം നല്കിയവരെ മണ്ഡലകാലത്ത് മലകയറ്റില്ലെന്ന് പൊലീസ് തീരുമാനിച്ചിരുന്നു. അതിന്റെ ഭാഗമായാണ് കഴിഞ്ഞയാഴ്ച നിലയ്ക്കല് വെച്ച് മുന്കരുതല് അറസ്റ്റ് രേഖപ്പെടുത്തിയത്. അറസ്റ്റ് തടാന് ശ്രമിച്ചതോടെ നിരോധനാജ്ഞലംഘിച്ചതിനും കേസ് എടുത്തു. ആ കേസില് സുരേന്ദ്രന് ജാമ്യം അനുവദിച്ചിരുന്നു. എന്നാല് കണ്ണൂരില് ഡിവൈഎസ്പിയെ ഭീഷണിപ്പെടുത്തിയ കേസില് ജാമ്യമില്ലാ വാറന്റ് ഉള്ളതിനാല് പുറത്തിറങ്ങാനായില്ല. അതിന് പിന്നാലെയാണ് പുതിയ കേസ് എടുത്തത്.
https://www.facebook.com/Malayalivartha
