ശബരിമല യുവതി പ്രവേശനവുമായി ബന്ധപ്പെട്ട് പിടിയിലായ കെ സുരേന്ദ്രന് പിന്നാലെ ബി ജെ പി സംസ്ഥാന ജനറൽ സെക്രട്ടറി എഎന്‍ രാധാകൃഷ്ണനേയും കുരുക്കാനൊരുങ്ങി കേരളപോലീസ്. സിറ്റി പോലീസ് കമ്മീഷണർ യതീഷ് ചന്ദ്രയുടെ ഓഫീസിലേക്ക് ബിജെപി നേതൃത്വത്തിൽ നടത്തിയ മാർച്ചിനെതിരെ എ.എൻ രാധാകൃഷ്ണൻ ഉൾപ്പടെ നാൽപ്പതോളം പേർക്കെതിരെ കേസെടുത്തു.

ശനിയാഴ്ച്ച രാവിലെയാണ് യതീഷ് ചന്ദ്രക്കെതിരെ നടപടി എടുക്കണമെന്ന് ആവശ്യപ്പെട്ട് ബിജെപിയുടെ നേതൃത്വത്തില്‍ സിറ്റി പോലീസ് കമ്മീഷ്ണര്‍ ഓഫീസിലേക്ക് മാര്‍ച്ച്‌ സംഘടിപ്പിച്ചത്. മാര്‍ച്ചിന് നേതൃത്വം നല്‍കിയ ബിജെപി നേതാവ് എന്‍ രാധാകൃഷ്ണന്‍, ജില്ലാ സെക്രട്ടറി നാഗേഷ് എന്നിവര്‍ ഉള്‍പ്പടെ നാൽപതോളം പേര്‍ക്കെതിരേയാണ് കേസ് എടുത്തിട്ടുള്ളത്. സംഘം ചേരല്‍, കലാപ ശ്രമം, പൊതുഗതാഗതം തടസ്സപ്പെടുത്തല്‍ എന്നിവയാണ് ഇവര്‍ക്കുമേല്‍ ചുമത്തിയ കുറ്റങ്ങള്‍.

നിലക്കലിൽ കേന്ദ്രമന്ത്രി ഉൾപ്പെടെയുള്ളവരോട് യതീഷ് ചന്ദ്ര മോശമായി പെരുമാറി എന്നാരോപിച്ചാണ് ബിജെപി തൃശൂരിൽ അദ്ദേഹത്തിന്റെ ഓഫിസിലേക്കു മാർച്ച് നടത്തിയത്. എന്നാൽ തേക്കിൻകാട് മൈതാനിയിൽ നിന്ന്‌ തുടങ്ങിയ മാർച്ച് കമ്മീഷണർ ഓഫീസിനു മുന്നിൽ പൊലീസ് തടയുകയായിരുന്നു.

അതേസമയം മുഖ്യമന്ത്രിയ്ക്ക് പിന്നാലെ യതീഷ് ചന്ദ്രയെ പിന്തുണച്ചു കൂടുതൽ മന്ത്രിമാർ രംഗത്തെത്തിയിട്ടുണ്ട്. പൊലീസിനെ പേടിപ്പിച്ച പൊൻ രാധാകൃഷ്ണന് കേന്ദ്ര മന്ത്രിയായിരിക്കാൻ അർഹതയില്ലെന്ന് മന്ത്രി ഇ പി ജയരാജൻ പറഞ്ഞു. ഡിജി പിയുടെ ഒറീസയിലെ വീട്ടുകാരെ വരെ ആർ എസ് എസ് ഭീഷണിപ്പെടുത്തുകയാണെന്നും ജയരാജൻ ആരോപിച്ചു. യതീഷ് ചന്ദ്രയെ പിന്തുണച്ച് ആരോഗ്യമന്ത്രി കെ കെ ശൈലജയും രംഗത്തെത്തി.

പോലീസ് കസ്റ്റഡിയിലുള്ള ബി.ജെ.പി ജനറല്‍ സെക്രട്ടറി കെ. സുരേന്ദ്രന്റെ ജാമ്യാപേക്ഷ റാന്നി ഫസ്റ്റ്ക്ലാസ് മജിസ്ട്രേറ്റ് കോടതി തള്ളി. സന്നിധാനത്ത് തൃശൂര്‍ സ്വദേശിയായ 52കാരി ലളിതയെ ആക്രമിച്ച കേസിലാണ് സുരേന്ദ്രന് കോടതി ജാമ്യം നിഷേധിച്ചത്. ശബരിമലയിലേക്കുള്ള യാത്രയ്ക്കിടെ നിരോധനാജ്ഞ ലംഘിച്ചതിന് അറസ്റ്റിലായ കെ. സുരേന്ദ്രന് കോടതി ജാമ്യം അനുവദിച്ചിരുന്നു. കര്‍ശന ഉപാധികളോടെയായിരുന്നു ജാമ്യം.

എന്നാല്‍ കണ്ണൂരില്‍ സുരേന്ദ്രനെതിരെ മറ്റൊരു കേസ് നിലവിലുള്ളതിനാല്‍ അദ്ദേഹത്തിന് ജയിലില്‍ നിന്ന് പുറത്തിറങ്ങാന്‍ കഴിഞ്ഞിരുന്നില്ല. കണ്ണൂരില്‍ പൊലീസുകാരെ ഭീഷണിപ്പെടുത്തിയെന്ന കേസാണ് സുരേന്ദ്രനെതിരെയുള്ളത്.