കണ്ണൂർ പാനൂരിൽ നിന്നും കാണാതായ ദൃശ്യ (20), സൈന(20) വിദ്യാർത്ഥികളെ മലപ്പുറം തിരൂരില്‍ നിന്നും കണ്ടെത്തി. ദുരൂഹ സാഹചര്യത്തിൽ കാണാതായ ഇരുവരെയും തിരൂരിലെ ഒരു ലോഡ്ജില്‍ നിന്നുമാണ് പോലീസ് കണ്ടെത്തിയത്. താനൂരിലെ ഒരു ഹോട്ടലിൽ നിന്നും ലഭിച്ച സിസിടിവി ദൃശ്യങ്ങളുടെ അടിസ്ഥാനത്തിൽ നടത്തിയ അന്വേഷണത്തിലാണ് ഇരുവരെയും കണ്ടെത്താനായത്.

നവംബര്‍ 19-മുതലാണ് ഇരുവരേയും കാണാതായത്. ഇവര്‍ക്കായി സംസ്ഥാനവ്യാപകമായി പൊലീസ് തിരച്ചില്‍ നടത്തുകയായിരുന്നു. ഇതിനിടയിലായിരുന്നു ഇവരോട് മുഖസാദൃശ്യമുള്ള പെൺകുട്ടികൾ സിസിടിവി ദൃശ്യങ്ങളില്‍ പതിഞ്ഞത്. ഇതേ തുടര്‍ന്ന് ഈ മേഖല കേന്ദ്രീകരിച്ച് പൊലീസ് അന്വേഷണം നടത്തി വരുന്നതിനിടയിലാണ് ഇരുവരെയും കണ്ടെത്താനായത്.

കഴിഞ്ഞ തിങ്കളാഴ്ച മുതലാണ് അയൽവാസികളും സുഹൃത്തുക്കളുമായ സയന, ദൃശ്യ എന്നിവരെ കാണാതായത്. ലാബ് ടെക്‌നീഷ്യൻസ് വിദ്യാർഥിനികളായ ഇരുവരും തിങ്കളാഴ്ച പതിവ് പോലെ കോളജിൽ പോയി. വിദ്യാർത്ഥിനികളെ രാത്രിയായിട്ടും കാണാത്തതോടെ രക്ഷിതാക്കൾ പൊലീസ് സ്റ്റേഷനിൽ പരാതി നൽകിയിരുന്നു. പൊലീസ് ഇവരുടെ മൊബൈൽ ഫോൺ സിഗ്‌നൽ പിന്തുടർന്ന് അന്വേഷണം നടത്തിയപ്പോൾ കണ്ണൂർ റെയിൽവേ സ്റ്റേഷനിൽ വച്ചാണ് അവസാനം ഫോൺ സ്വിച്ച് ഓഫ് ആയത്. പിന്നീട് ഫോൺ ഓൺ ചെയ്തിട്ടില്ല.

പാനൂരിലെ സ്വകാര്യ സ്ഥാപനത്തിൽ ലാബ് ടെക്നീഷ്യൻ കോഴ്സ് വിദ്യാർത്ഥിനികളായ ഇരുവരും തമ്മിൽ പിരിഞ്ഞിരിക്കാനാവാത്ത വിധം കടുത്ത സൗഹൃദമുണ്ടായിരുന്നുവെന്ന് വീട്ടുകാർ ആദ്യമേ അറിയിച്ചിരുന്നു. മണിക്കൂറുകൾ നീളുന്ന ഫോൺ സംഭാഷണവും തമ്മിലുള്ള കൂടിക്കാഴ്‌ച്ചയും വീട്ടുകാർ എതിർക്കുകയും ചെയ്തിരുന്നു.