രാത്രി ഡ്യൂട്ടിക്കുള്ള ജീവനക്കാര്‍ ഉറങ്ങുന്നുണ്ടോയെന്നു രഹസ്യമായി പരിശോധിക്കാന്‍ കെ എസ് ആര്‍ടിസി വിതുര ഡിപ്പോയിലെക്കിയ സര്‍പ്രൈസ് സ്‌ക്വാഡ് അക്ഷരാര്‍ത്ഥത്തില്‍ ഞെട്ടിപ്പോയി. സര്‍പ്രൈസ് നല്‍കി വന്നതാകട്ടെ നായയാണ്. നായ കുരച്ചു ചാടിയതോടെ പരിഭ്രാന്തരായ ഉദ്യോഗസ്ഥര്‍ സ്‌റ്റേഷനിലെ ഉദ്യോഗസ്ഥരുടെ സഹായത്തോടെയാണു പരിശോധന നടത്തി മടങ്ങിയത്.

നായ്‌ക്കെതിരെ നടപടി വേണമെന്നു റിപ്പോര്‍ട്ടില്‍ ആവശ്യപ്പെട്ടിട്ടുണ്ട്. കഴിഞ്ഞ ദിവസം രാത്രിയായിരുന്നു സംഭവം ഡിപ്പോയിലെ ജീവനക്കാര്‍ ആഹാരം നല്‍കി വളര്‍ത്തുന്ന നായയാണ് കുരച്ചു ചാടിയത്. ഡിപ്പോയിലെ കാവല്‍ക്കാരന്‍ കൂടിയാണു നായ എന്നു പറയാം.

യാത്രക്കാര്‍ക്കു ഒരു ശല്യവുമുണ്ടാക്കാത്ത നായ പക്ഷേ അപ്രതീക്ഷിതമായി ആരെങ്കിലും ഡിപ്പോയ്ക്കുള്ളിലെ വിവിധ ഭാഗങ്ങളില്‍ അതിക്രമിച്ചു കടന്നാല്‍ ഇടപെടും മുമ്പ് ഡിപ്പോയില്‍ നിന്നും ഡീസല്‍, സ്‌പെയര്‍ പാര്‍ട്‌സ് മോഷണം പതിവായിരുന്നു. നായ സജീവമായതോടെ ഒരാള്‍ പോലും അതിക്രമിച്ചു കടക്കാറില്ലെന്നും മോഷണം ഒഴിവായെന്നും ജീവനക്കാര്‍ പറയുന്നു.

ഡിപ്പോയിലെ മെക്കാനിക്കല്‍ കെട്ടിടത്തില്‍ രാത്രി ജോലി നടക്കുന്നുണ്ടോയെന്നു നോക്കാനായിരുന്നു സ്‌ക്വാഡ് എത്തിയത്. എന്നാല്‍ ഇവിടെ കിടക്കുകയായിരുന്ന നായ ഉദ്യോഗസ്ഥര്‍ വന്നതും കുരച്ചു ചാടി. അതോടെ ജീവനക്കാര്‍ രക്ഷപ്പെട്ടു. അതേസമയം മെക്കാനിക്കല്‍ ജോലിക്കു നായ തടസമാണ്, മേല്‍ അറിവിലേക്ക് എന്നു കൂടി ചേര്‍ത്തു ഉദ്യോഗസ്ഥര്‍ റിപ്പോര്‍ട്ട് നല്‍കുകയായിരുന്നു. അതേ സമയം ജീവനക്കാര്‍ക്കും മറ്റു ശല്യമുണ്ടാക്കാത്ത നായയെ ഡിപ്പോയില്‍ നിന്നു ഒഴിവാക്കരുതെന്നാണു ജീവനക്കാരുടെ പക്ഷം.