തിരുവനന്തപുരം സര്‍ക്കാര്‍ മെഡിക്കല്‍ കോളേജില്‍ മള്‍ട്ടി സ്‌പെഷ്യാലിറ്റി ബ്ലോക്ക് ഇന്ന് ഉദ്ഘാടനം ചെയ്യുന്നതിനോടനുബന്ധിച്ച് 106 അധ്യാപക അനധ്യാപക തസ്തികകള്‍ സൃഷ്ടിക്കാന്‍ മന്ത്രിസഭായോഗം അനുമതി നല്‍കിയതായി ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്‍.

പുതുതായി ആരംഭിച്ച എമര്‍ജന്‍സി മെഡിസിന്‍ വിഭാഗത്തിലാണ് തസ്തികകള്‍ സൃഷ്ടിച്ചതെങ്കിലും ഇവരെ ആദ്യഘട്ടത്തില്‍ മള്‍ട്ടി സ്‌പെഷ്യാലിറ്റി ബ്ലോക്കിലെ വിദഗ്ധ ചികിത്സയ്ക്കായിരിക്കും നിയമിക്കുക. സര്‍ക്കാര്‍ മേഖലയിലെ തന്നെ ആദ്യത്തെ മള്‍ട്ടി സ്‌പെഷ്യാലിറ്റി ബ്ലോക്കിന്റെ പ്രവര്‍ത്തനം സുഗമമായി നടക്കുന്നതിനും മികച്ച സൗകര്യം ലഭ്യമാക്കുന്നതിനും വേണ്ടിയാണ് അടിയന്തരമായി ഇത്രയും തസ്തികള്‍ സൃഷ്ടിച്ചതെന്നും മന്ത്രി പറഞ്ഞു.

മെഡിക്കല്‍ കോളേജ് ആശുപത്രിയില്‍ പ്രതിദിനം നാലായിരത്തോളം പേര്‍ ഒ.പി.യിലും ആയിരത്തോളം പേര്‍ അത്യാഹിത വിഭാഗത്തിലും ചികിത്സ തേടി എത്താറുണ്ട്. ഇവര്‍ക്ക് വിദഗ്ധ ചികിത്സ നല്‍കുന്നതിന് വിവിധ സ്‌പെഷ്യാലിറ്റി വിഭാഗങ്ങളുടെ കൂട്ടായ പരിശ്രമം ആവശ്യമാണ്. കൂടാതെ മള്‍ട്ടി സ്‌പെഷ്യാലിറ്റി ബ്ലോക്കിലെ ചികിത്സയും കൂടിയാകുമ്പോള്‍ ജീവനക്കാര്‍ക്കും ബുദ്ധിമുട്ടാകും. ഇതെല്ലാം മുന്നില്‍ കണ്ടാണ് 106 തസ്തികള്‍ അധികമായി അടിയന്തരമായി അനുവദിച്ചതെന്നും മന്ത്രി പറഞ്ഞു.

പ്രൊഫസര്‍ (എമര്‍ജന്‍സി മെഡിസിന്‍) 1, അസോ. പ്രൊഫസര്‍ (എമര്‍ജന്‍സി മെഡിസിന്‍) 2, അസോ. പ്രൊഫസര്‍ (അനസ്‌തേഷ്യോളജി) 1, അസോസിയേറ്റ് പ്രൊഫസര്‍ (റേഡിയോ ഡയഗ്നോസിസ്) 1, അസി. പ്രൊഫസര്‍ (എമര്‍ജന്‍സി മെഡിസിന്‍) 10, അസി. പ്രൊഫസര്‍ (അനസ്‌തേഷ്യോളജി) 5, അസി. പ്രൊഫസര്‍ (റേഡിയോ ഡയഗ്നോസിസ്) 3, സീനിയര്‍ റെസിഡന്റ് (എമര്‍ജന്‍സി മെഡിസിന്‍) 5, സീനിയര്‍ റെസിഡന്റ് (അനസ്‌തേഷ്യോളജി) 5, സീനിയര്‍ റെസിഡന്റ് (റേഡിയോ ഡയഗ്നോസിസ്) 3, ജൂനിയര്‍ റെസിഡന്റ് 5 എന്നിങ്ങനെ 41 അധ്യാപക തസ്തികകളാണ് സൃഷ്ടിച്ചത്.

ഹെഡ് നഴ്‌സ് 1, സ്റ്റാഫ് നഴ്‌സ് ഗ്രേഡ്-2 10, സ്റ്റാഫ് നഴ്‌സ് ഗ്രേഡ്-2 (സ്‌പെഷ്യാലിറ്റി സഹിതം) 10, നഴ്‌സിംഗ് അസിസ്റ്റന്റ് 20, ഹോസ്പിറ്റല്‍ അറ്റന്‍ഡന്റ് ഗ്രേഡ്-1 10, ഹോസ്പിറ്റല്‍ അറ്റന്‍ഡന്റ് ഗ്രേഡ്-2 10, ജീനിയര്‍ ലാബ് അസിസ്റ്റന്റ് 1, ലാബ് ടെക്‌നീഷ്യന്‍ ഗ്രേഡ്-2 1, ഫാര്‍മസിസ്റ്റ് ഗ്രേഡ്-2 1, തീയറ്റര്‍ ടെക്‌നീഷ്യന്‍ ഗ്രേഡ്-2 1 എന്നിങ്ങനെയാണ് 65 അനധ്യാപക തസ്തികകള്‍ സൃഷ്ടിച്ചത്.