കെ.സുരേന്ദ്രനെ അറസ്റ്റ് ചെയ്ത് ജയിലിലടച്ചിട്ടും നിയമസഭയിൽ ഒരക്ഷരം മിണ്ടാതിരുന്ന ബി.ജെ.പി യുടെ ഏക നിയമസഭാംഗം ഒ. രാജഗോപാലിനെതിരെ പാർട്ടിക്കുള്ളിൽ തന്നെ പ്രതിഷേധം. കറുപ്പ് വസ്ത്രം ധരിച്ച് നിയമസഭയില്‍ പോയെങ്കിലും കെ.സുരേന്ദ്രനെതിരായ നടപടിയില്‍ രാജഗോപാല്‍ സര്‍ക്കാരിനോട് ഒരു ചോദ്യം പോലും ചോദിച്ചിരുന്നില്ല. മാധ്യമങ്ങളുടെ ചോദ്യത്തിന് നിയമസഭയിൽ സുരേന്ദ്രന്റെ കാര്യം ആരും ഉന്നയിക്കാത്തതുകൊണ്ടാണ് താനും പ്രതികരിക്കാതിരുന്നത് എന്നായിരുന്നു രാജഗോപാലിന്റെ മറുപടി.

ശശികലയെ അറസ്റ്റ് ചെയ്തപ്പോള്‍ ഹിന്ദു ഐക്യവേദി പ്രഖ്യാപിച്ച ഹര്‍ത്താലിന് ബി.ജെ.പി പിന്തുണ നല്‍കിയിരുന്നെങ്കിലും സുരേന്ദ്രന്റെ അറസ്റ്റിനെതിരെ പ്രത്യക്ഷ പ്രതിഷേധം ബി.ജെ.പി നടത്തിയിരുന്നില്ല. ഇത് പാർട്ടിക്കുള്ളിൽ തന്നെ മുറുമുപ്പിന് ഇടയാക്കിയിട്ടുണ്ട്. പി.സി ജോര്‍ജിനൊപ്പം പ്രത്യേക ബ്ലോക്കായി ഇരിക്കുമെന്നും കറുപ്പുടുത്ത് പോകുമെന്നും രാജഗോപാല്‍ പറഞ്ഞപ്പോള്‍, അദ്ദേഹം ഇക്കാര്യങ്ങള്‍ എല്ലാം സഭയില്‍ ഉന്നയിക്കുമെന്നായിരുന്നു പ്രതീക്ഷിച്ചിരുന്നത്.