അൽഐനിൽ പാർക്കിന് സമീപത്തെ വീടിന് മുന്നിൽ സ്ഥാപിച്ചിരുന്ന വാട്ടർ കൂളറിൽ നിന്ന് വൈദ്യുതാഘാതമേറ്റ് എട്ടുവയസ്സുകാരൻ മരിച്ചു. അറബ് പ്രവാസി കുടുംബത്തിലെ വലീദ് ഖാലിദ് എന്ന കുട്ടിയാണ് മരിച്ചത്. പുതിയ അധ്യയന വർഷത്തെ വരവേൽക്കാൻ സ്കൂൾ ബാഗും പഠനോപകരണങ്ങളും ഒരുക്കി, കായിക വസ്ത്രങ്ങൾ വാങ്ങാൻ പോകാനിരിക്കെയാണ് ദുരന്തം.

വീടിന് സമീപത്തെ പാർക്കിൽ ജ്യേഷ്ഠനും കൂട്ടുകാർക്കുമൊപ്പം കളിക്കാനിറങ്ങിയതായിരുന്നു വലീദ്. ഇതിനടുത്തുള്ള വീടിന് പുറത്തുവച്ചിരുന്ന വാട്ടർ കൂളറിൽ നിന്ന് വെള്ളം കുടിക്കാൻ ശ്രമിക്കുന്നതിനിടെ മറ്റൊരു കുട്ടി വൈദ്യുതാഘാതമേറ്റ് വീണു. ഇത് തമാശയാണെന്ന് കരുതി അടുത്തേക്ക് ചെന്ന വലീദ് വാട്ടർ കൂളറിൽ തൊട്ടതോടെയാണ് അപകടമുണ്ടായത്.

വലീദിന്റെ ഒപ്പമുണ്ടായിരുന്ന ഒൻപതു വയസ്സുകാരനായ സഹോദരൻ അഹമ്മദ് രക്ഷപ്പെടുത്താൻ ശ്രമിച്ചെങ്കിലും വൈദ്യുതി പ്രവാഹം അനുഭവപ്പെട്ടതോടെ കൈ പിൻവലിച്ച് വീട്ടിലേക്ക് ഓടിച്ചെന്ന് വിവരമറിയിക്കുകയായിരുന്നു.

ഉടൻ തന്നെ സ്ഥലത്തെത്തിയ കുടുംബം കുട്ടിയെ ആംബുലൻസിൽ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഈ കൂളറിൽ നിന്ന് പലരും സാധാരണയായി വെള്ളം കുടിക്കാറുള്ളതാണ്.

യഥാസമയം അറ്റകുറ്റപ്പണി നടത്താത്തതും സുരക്ഷിതമല്ലാത്തതുമായ വൈദ്യുതോപകരണങ്ങൾ ഉണ്ടാക്കുന്ന അപകടങ്ങളെക്കുറിച്ച് ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. വലീദിന്റെ ദാരുണ മരണത്തിൽ വിദ്യാലയത്തിലെ അധ്യാപകരും സഹപാഠികളും ആഴത്തിലുള്ള ദുഃഖവും അനുശോചനവും രേഖപ്പെടുത്തി

ജീവിതവഴികളിൽ താങ്ങും തണലുമായി ഒന്നിച്ചു നടന്ന രണ്ടു നല്ല സുഹൃത്തുക്കൾ, ഒടുവിൽ പ്രവാസ മണ്ണിലെ ദുരന്തപാതയിലും ഒന്നിച്ചു വിടപറഞ്ഞു. അബുദാബിയിലുണ്ടായ ദാരുണ വാഹനാപകടത്തിൽ മരിച്ച മലയാളി പ്രവാസികളുടെ വേർപാട് നൊമ്പരമാകുന്നു. മലപ്പുറം തൃപ്പനച്ചി സ്വദേശി നാറാണത്ത് ഹംസ കോക്കഞ്ചേരി (53), കാസർകോട് ബേക്കൽ മൗവ്വലിൽ താമസിക്കുന്ന കുമ്പള സ്വദേശി മുഹമ്മദ് അഷ്റഫ് (54) എന്നിവരാണ് വാഹനാപകടത്തിൽ തൽക്ഷണം മരിച്ചത്.

ഹംസയുടെ മൃതദേഹം ചൊവ്വാഴ്ച രാത്രിയോടെ നാട്ടിലേക്ക് കൊണ്ടുപോയി. മുഹമ്മദ് അഷ്റഫിന്റെ മൃതദേഹം നാളെ പുലർച്ചെ മൂന്നിനുള്ള എയർ ഇന്ത്യ വിമാനത്തിൽ മംഗളുരുവിലേയ്ക്ക് കൊണ്ടുപോകുമെന്ന് നടപടിക്രമങ്ങൾ പൂർത്തിയാക്കാൻ സേവനം ചെയ്യുന്ന സാമൂഹിക പ്രവർത്തകൻ ഷിഹാബ് ദേശമംഗലം മനോരമ ഓൺലൈനിനോട് പറഞ്ഞു.