പൊലീസുകാര്‍ക്കു ഗുണം ലഭിക്കുമെങ്കില്‍ ഇനിയും മല ചവിട്ടാന്‍ തയാറാണെന്ന് ഹിന്ദു ഐക്യവേദി സംസ്ഥാന അധ്യക്ഷ കെ.പി.ശശികല. ക്ഷേത്രങ്ങള്‍ ഭക്തര്‍ക്ക് കൈമാറും വരെ കാണിക്കയിടരുത്. ഇത് തീരുമാനവും ആഹ്വാനവുമാണ്. ഇതിന് ആഹ്വാനം ചെയ്തതിന്റെ പേരില്‍ അറസ്റ്റ് വരിക്കാനും തയാറാണെന്നും കെ.പി. ശശികല പറഞ്ഞു. ശബരിമലയിലെ പൊലീസ് നടപടികളില്‍ പ്രതിഷേധിച്ച് സെക്രട്ടേറിയറ്റ് നടക്കല്‍ ശബരിമല കര്‍മ സമിതി നടത്തിയ സമരത്തില്‍ സംസാരിക്കുകയായിരുന്നു ശശികല.

ശബരിമലയിലെ ദുരിതങ്ങൾക്കിടയിൽ അടിസ്ഥാന സൗകര്യങ്ങൾ പോലും നിഷേധിക്കപ്പെട്ട് പണിയെടുക്കുന്ന പാവപ്പെട്ട പൊലീസുകാർക്ക് ഡി ജി പി ഇനിയും ഗുഡ് സർവീസ് എൻട്രി നൽകുമെങ്കിൽ വീണ്ടും ശബരിമലയ്ക്കു പോകും. പെൻഷൻ പറ്റിയ തന്നെക്കൊണ്ട് ഇത്രയുമൊക്കെയേ പറ്റൂ. പൊലീസുകാർക്കു ഗുണം ലഭിക്കുമെങ്കിൽ ഇനിയും മല ചവിട്ടാൻ തയാറാണെന്നും ശശികല പറഞ്ഞു.

ശബരിമലയിൽ ശരണമന്ത്രവിലക്കിനും പൊലീസ്​രാജിനുമെതിരെയുമാണ് ​സെക്രട്ടേറിയറ്റ്​ പടിക്കൽ ഹിന്ദുസംഘടന നേതാക്കളുടെ നേതൃത്വത്തിൽ ശബരിമല കർമ സമിതി പ്രതിഷേധം നടത്തുന്നത്.