യുവതികള് ദര്ശനം നടത്തിയതിന്റെ മറവില് 79 കെ.എസ്.ആര്.ടി.സി ബസുകളും ഏഴ് പൊലീസ് ജീപ്പുകളും തകര്ത്തു, 31 പൊലീസുകാര്ക്ക് പരിക്ക്, ഏറ്റവും കൂടുതല് ആക്രമിക്കപ്പെട്ടത് വനിതകള്- ഇന്നലത്തെ സംഭവങ്ങള് മുഖ്യമന്ത്രി വ്യക്തമാക്കി
യുവതികള് ഇന്നലെ ശബരിമല ദര്ശനം നടത്തിയതിന്റെ മറവില് ബി.ജെ.പി- ആര്.എസ്.എസ് പ്രവര്ത്തകര് സംസ്ഥാനത്ത് വ്യാപക ആക്രമണം നടത്തിയെന്ന് മുഖ്യമന്ത്രി പിണറായി വിജയന്. യുവതികള് ദര്ശനം നടത്തിയ വിവരം ശബരിമലയ്ക്ക് പുറത്ത് അറിഞ്ഞതിന് പിന്നില് ആര്.എസ്.എസ് പ്രവര്ത്തകര് പൊലീസിനെയും മാധ്യമപ്രവര്ത്തരെയും വഴിയാത്രക്കാരെയും ആക്രമിച്ചു. ഇന്നലെ മാത്രം ഏഴ് പൊലീസ് വാഹനം ആക്രമിച്ചു. 79 കെ.എസ്.ആര്.ടി.സി ബസുകള് കല്ലെറിഞ്ഞ് തകര്ത്തു. അക്രമസംഭവങ്ങളില് 31 പൊലീസുകാര്ക്ക് പരിക്ക് പറ്റി. അക്രമിക്കപ്പെട്ടതില് ഭൂരിഭാഗവും വനിതകളാണന്നും മുഖ്യമന്ത്രി വാര്ത്താസമ്മേളനത്തില് അറിയിച്ചു.
മീഡിയാവണ്, കൈരളി, ഡെക്കാണ് ക്രോണിക്കിള്, മാതൃഭൂമി, മനോരമ ക്യാമറാമാന്മാരെ ആക്രമിച്ചു. വനിതാമാധ്യമപ്രവര്ത്തകര്, നിരവധി കടകള്, ബോര്ഡുകള്, സി.പി.എം, സി.പി.ഐ ഓഫീസുകള് എന്നിവ ആക്രമിച്ചു. ചിലത് തീയിട്ട് നശിപ്പിച്ചു. സ്വകാര്യബസുകള് ഉള്പ്പെടെ നിരവധി വാഹനങ്ങള് ഹര്ത്താല് അനുകൂലികള് നശിപ്പിച്ചു. കഴിഞ്ഞ കുറേനാളായി കൊട്ടാരക്കര ഗണപതിക്ഷേത്രം ആര്.എസ്.എസുകാരുടെ ആക്രമണ കേന്ദ്രമാണ്. അവിടുത്തെ ഉണ്ണിയപ്പം കൗണ്ടര് ഇന്നലെ അടച്ചുപൂട്ടിച്ചു. വനിതാ മതിലില് പങ്കെടുത്തെന്ന് ആരോപിച്ച് മാവേലിക്കരയില് സുശീല എന്ന വനിതയുടെ സുന്ദരം ബേക്കറി അടിച്ചു തകര്ത്തു.
മാരാരിക്കുളത്ത് ബി.ജെ.പി നേതാക്കള് വനിതാമതിലിന്റെ സംഘാടകസമിതി പ്രസിഡന്റ് വെള്ളാപ്പള്ളി നടേശന്റെ വീട്ടിലേക്ക് മാര്ച്ച് നടത്തി. കരുനാഗപ്പള്ളിയില് നാല് കടകള് അടിച്ചുതകര്ത്തു. നാല് പൊലീസുകാര്ക്ക് പരിക്ക് പറ്റി. പൊലീസ് ജീപ്പിന്റെ മുന്വശത്തെ ഗ്ലാസുകള് അടിച്ചു പൊട്ടിച്ചു. നെയ്യാറ്റിന്കരയില് മൂന്ന് പൊലീസുകാര്ക്ക് ആക്രമസംഭവങ്ങളില് പരിക്ക് പറ്റി. വെള്ളനാട് സി.പി.എം ഓഫീസ് അടിച്ച് തകര്ത്തു. പൊലീസ് ഉദ്യോഗസ്ഥരെ പ്രത്യേക ലക്ഷ്യം വെച്ച് ആക്രമിക്കപ്പെടുകയാണ്. ഗുരുവായൂര് ടെമ്പിള് സി.ഐയ്ക്ക് ഗുരുതര പരിക്കാണ് ഉണ്ടായത്. പന്തളത്ത് അയ്യപ്പഭക്തന് മരിച്ചത് ഹൃദയാഘാതം മൂലമാണെന്നും മുഖ്യമന്ത്രി അറിയിച്ചു.
കൊല്ലം ശാസ്താംകോട്ടയില് നാല് കെ.എസ്.ആര്.ടി.സി ബസും ഒരു സ്വകാര്യ ബസും അക്രമികള് അടിച്ച് തകര്ത്തു. തൃശൂര് ഈസ്റ്റ് പൊലീസ് സ്റ്റേഷനിലെ ഒഫിഷല് വീഡിയോ ക്യാമറ ആര്.എസ്.എസുകാര് നിലത്തെറിഞ്ഞ് നശിപ്പിച്ചു. പത്തനംതിട്ട ആറന്മുളയില് സി.പി.എം ഓഫീസിന്റെ ചില്ല് എറിഞ്ഞ് തകര്ത്തു. ദേവസ്വം പ്രസിഡന്റ് എ.പത്മകുമാറിന്റെ വീട്ടിലേക്ക് മാര്ച്ച് നടത്തി. ഇതെല്ലാം ഇന്നലെ നടന്ന സംഭവങ്ങളാണ്. ഇന്നത്തെ കണക്കുകള് ലഭ്യമായിവരുന്നതേയുള്ളൂ എന്നും മുഖ്യമന്ത്രി അറിയിച്ചു.
https://www.facebook.com/Malayalivartha
