രഞ്ജി ട്രോഫിയില്‍ ഹിമാചല്‍പ്രദേശിനെതിരേ അവിശ്വസനീയ വിജയം നേടിയ കേരളം ക്വാര്‍ട്ടര്‍ ഫൈനലില്‍ കടന്നു. അവസാന ദിനം 297 റണ്‍സ് വിജയലക്ഷ്യവുമായി ബാറ്റിംഗിനിറങ്ങിയ കേരളം 67 ഓവറില്‍ അഞ്ച് വിക്കറ്റ് നഷ്ടത്തില്‍ ലക്ഷ്യം മറികടക്കുകയായിരുന്നു. വിനൂപ് മനോഹരന്‍ (96), ക്യാപ്റ്റന്‍ സച്ചിന്‍ ബേബി (92), സഞ്ജു സാംസണ്‍ (പുറത്താകാതെ 61) എന്നിവരുടെ മികവിലാണ് കേരളം അപ്രതീക്ഷിത വിജയം കൊയ്തത്.

285/8 എന്ന മൂന്നാംദിന സ്കോറില്‍ തന്നെ ഹിമാചല്‍ രണ്ടാം ഇന്നിംഗ്സ് ഡിക്ലയര്‍ ചെയ്തതോടെയാണ് കേരളത്തിന് 297 റണ്‍സ് എന്ന വിജയലക്ഷ്യം ലഭിച്ചത്. രഞ്ജിയില്‍ അവസാന ദിവസം അസാധ്യമെന്ന് കരുതിയിരുന്ന ലക്ഷ്യം കേരളം മറികടക്കുമെന്ന് ആരും പ്രതീക്ഷിച്ചിരുന്നതല്ല. എന്നാല്‍ ബാറ്റിംഗ് ഓര്‍ഡറില്‍ സ്ഥാനക്കയറ്റം ലഭിച്ച്‌ ഓപ്പണറായി ഇറങ്ങിയ വിനൂപ് മനോഹരന്‍റെ വെടിക്കെട്ട് കേരളത്തിന് മികച്ച തുടക്കം സമ്മാനിക്കുകയായിരുന്നു.

വേഗത്തില്‍ സ്കോര്‍ ചെയ്ത വിനൂപ് 11 ബൗണ്ടറികളുടെ സഹായത്തോടെയാണ് 96 റണ്‍സ് നേടിയത്. നാലാമനായി ക്രീസിലെത്തിയ സച്ചിനും താളം കണ്ടെത്തി. എട്ട് ഫോറും ഒരു സിക്സും അടങ്ങിയതായിരുന്നു നായകന്‍റെ ഇന്നിംഗ്സ്. ആദ്യ ഇന്നിംഗ്സില്‍ അര്‍ധ സെഞ്ചുറി നേടിയ സഞ്ജു രണ്ടാം ഇന്നിംഗ്സില്‍ 53 പന്തുകള്‍ മാത്രം നേരിട്ടാണ് 61 റണ്‍സ് അടിച്ചൂകൂട്ടിയത്. അഞ്ച് ഫോറും രണ്ടു സിക്സും സഞ്ജു പറത്തി.

എലൈറ്റ് ഗ്രൂപ്പില്‍ വിദര്‍ഭയും കര്‍ണാടകയും ഒന്നും രണ്ടും സ്ഥാനങ്ങള്‍ ഉറപ്പിച്ചു കഴിഞ്ഞു. നാലാം ജയത്തോടെ സീസണില്‍ കേരളത്തിന്‍റെ പോയിന്‍റ് സന്പാദ്യം 26 ആയി. അവസാന സ്ഥാനക്കാരായെങ്കിലും കേരളത്തിന് ക്വാര്‍ട്ടര്‍ ബര്‍ത്ത് നേടാം. തുടര്‍ച്ചയായ രണ്ടാം തവണയാണ് കേരളം എലീറ്റ് ഗ്രൂപ്പില്‍ നിന്നും ക്വാര്‍ട്ടര്‍ ബര്‍ത്ത് നേടുന്നത്.സ്കോര്‍: ഹിമാചല്‍ ഒന്നാം ഇന്നിംഗ്സ് 297, 285/8 ഡിക്ലയേര്‍ഡ്. കേരളം ഒന്നാം ഇന്നിംഗ്സ് 286, രണ്ടാം ഇന്നിംഗ്സ് 299/5