വരാൻപോകുന്ന ലോക്സഭ തെരഞ്ഞെടുപ്പില്‍ കേരളത്തില്‍ യുഡിഎഫിന് ഭൂരിപക്ഷം ലഭിക്കുമെന്നത് മലര്‍പ്പൊടിക്കാരന്‍റെ സ്വപ്നമാണെന്ന് മന്ത്രി എം എം മണി. തെരഞ്ഞെടുപ്പിന് മുമ്പായി വന്ന സര്‍വേ ഫലങ്ങളിലെ യുഡിഎഫ് ഭൂരിപക്ഷത്തെ തള്ളിയാണ് എംഎം മണി രംഗത്ത് വന്നിരിക്കുന്നത്.

ഇന്ത്യയിൽ കോൺഗ്രസ് ഒറ്റയ്ക്ക് ഭൂരിപക്ഷം നേടും എന്ന മട്ടിലാണു ചിലരുടെ അവകാശവാദം. എന്നാൽ അത് എവിടെനിന്നു കിട്ടും എന്നൊന്നും കോൺഗ്രസ്സുകാർക്കു പോലും അറിയില്ല. പ്രമുഖ സംസ്ഥാനമായ ഉത്തർ പ്രദേശിൽ കോൺഗ്രസിനെ ഒഴിവാക്കിയാണ് മുന്നണി രൂപികരിച്ചിരിക്കുന്നത് എന്നും അദ്ദേഹം തന്റെ ഫേസ്ബുക്കിലൂടെ പ്രതികരിച്ചു.

മന്ത്രി എം എം മണിയുടെ ഫേസ്ബുക്‌പോസ്റ്റ് ഇങ്ങനെ ;

വരുന്ന പാർലമെന്റ് തെരെഞ്ഞെടുപ്പുമായി ബന്ധപ്പെടുത്തി ചില സർവ്വേ ഫലങ്ങൾ മാധ്യമങ്ങളിൽ പ്രസിദ്ധികരിച്ചു കാണുന്നുണ്ട്. ഈ സർവ്വേ ഫലങ്ങളിൽ കേരളത്തിൽ യു.ഡി.എഫിന് മേൽക്കൈ കിട്ടുമെന്ന് പ്രവചിച്ചിട്ടുള്ളതായും കാണുന്നു. ഈ വാർത്ത മലർപ്പൊടിക്കാരന്റെ സ്വപ്നം മാത്രമാണ്. ഇന്ത്യയിൽ കോൺഗ്രസ് ഒറ്റയ്ക്ക് ഭൂരിപക്ഷം നേടും എന്ന മട്ടിലാണു ചിലരുടെ അവകാശവാദം. എന്നാൽ അത് എവിടെനിന്നു കിട്ടും എന്നൊന്നും കോൺഗ്രസ്സുകാർക്കു പോലും അറിയില്ല. പ്രമുഖ സംസ്ഥാനമായ ഉത്തർ പ്രദേശിൽ കോൺഗ്രസിനെ ഒഴിവാക്കിയാണ് മുന്നണി രൂപികരിച്ചിരിക്കുന്നത്. ദേശീയ തലത്തിൽ കോൺഗ്രസിന് ഒറ്റയ്ക്കു ഭരിക്കുന്നതിനെക്കുറിച്ച് ചിന്തിക്കാൻ പോലും കഴിയില്ല. ഒരു കൂട്ടുകക്ഷി മന്ത്രിസഭയ്‌ക്കേ എന്തെങ്കിലും സാധ്യതയുള്ളൂ. ഏക കക്ഷി ഭരണത്തിന്റെ കാലം കഴിഞ്ഞിരിക്കുന്നു. എങ്കിലും ചിലർ ഇപ്പോഴും ദിവാ സ്വപ്നങ്ങളിലാണ്. അവർ തന്നെയാണ് സർവ്വേയുമായി ഇറങ്ങിയിരിക്കുന്നതും. എന്തായാലും കേരളത്തിൽ ഇടതുപക്ഷ ജനാധിപത്യ മുന്നണിക്ക് ശക്തമായ മുന്നേറ്റം ഉണ്ടാകുമെന്നതിൽ സംശയമില്ല.സർവ്വേക്കാർ എന്ത് പറഞ്ഞാലും കേരളത്തിലെ ജനവിധി 2004 - ലേതിനേക്കാൾ മെച്ചപ്പെട്ടതാകും. എന്ന് എംഎം മണി ഫേസ്ബുക്കിൽ കുറിച്ചു.