മുഖ്യമന്ത്രി പിണറായി വിജയന്‍ സഞ്ചരിക്കാനിരുന്ന വിമാനത്തിന് യന്ത്രതകരാര്‍. കണ്ണൂരില്‍ നിന്ന് കൊച്ചിയിലേക്ക് പറക്കാനിരുന്ന വിമാനത്തിലാണ് യന്ത്രതകരാര്‍ കണ്ടെത്തിയത്. തുടര്‍ന്ന് മുഖ്യമന്ത്രിയുടെ യാത്ര വൈകി.

കൊച്ചിയില്‍ പ്രധാനമന്ത്രി പങ്കെടുക്കുന്ന പരിപാടിയില്‍ സംബന്ധിക്കാനാണ് മുഖ്യമന്ത്രി കണ്ണൂരില്‍ നിന്ന് യാത്ര തിരിക്കുന്നത്. കൊച്ചി നാവികസേന ആസ്ഥാനത്ത് നിന്ന് പകരം വിമാനം എത്തിച്ച് പിണറായി വിജയന് യാത്ര സൗകര്യം ഒരുക്കാനാണ് ശ്രമം. എങ്കിലും പരിപാടിക്ക് മുമ്പ് അദ്ദേഹത്തിന് കൊച്ചിയില്‍ എത്താന്‍ കഴിയുമോയെന്നതില്‍ ആശങ്കയുണ്ട്.

മുഖ്യമന്ത്രി ഇന്ന് നടത്തിയ പ്രസ്താവന ഏറെ വിവാദമായിരുന്നു. ചില ദേശാടനക്കിളികള്‍ക്ക് കേരളം ഇഷ്ടഭൂമിയായി മാറിയിട്ടുണ്ടെന്ന് മുഖ്യമന്ത്രി പറഞ്ഞിരുന്നു. മരുഭൂമിയില്‍ നിന്നുള്ള ദേശാടനപ്പക്ഷിയാണ് ഇടയ്ക്കിടെ കേരളത്തിലെത്തുന്നത്. അത് നമ്മളെയെല്ലാം അസ്വസ്ഥമാക്കുന്നതോ, ഭയചകിതരാക്കുന്നതോ ആണ്. എന്ത് ആപത്താണ് ഈ നാടിന് വരാനിരിക്കുന്നതെന്ന് അറിയില്ലെന്നും പിണറായി പറഞ്ഞു. കണ്ണൂരില്‍ നടന്ന ജൈവവൈവിധ്യ കോണ്‍ഗ്രസ് ഉദ്ഘാടനം ചെയ്യുകയായിരുന്നു മുഖ്യമന്ത്രി പിണറായി വിജയന്‍

പ്രധാനമന്ത്രി നരേന്ദ്രമോദി കേരളത്തില്‍ വിവിധ പരിപാടികളില്‍ പങ്കെടുക്കാന്‍ എത്തുന്ന ദിവസമാണ് മുഖ്യമന്ത്രി പിണറായി വിജയന്റെ പരാമര്‍ശമെന്നതും ശ്രദ്ധേയം.

നരേന്ദ്ര മോഡിയുടെ ഇന്നത്തെ സന്ദര്‍ശനം രാഷ്ട്രം ഉറ്റുനോക്കുകയാണ്. തെരഞ്ഞെടുപ്പ് കമ്മീഷനെ പ്രശംസിച്ച് നരേന്ദ്ര മോദി രംഗത്തെത്തിയിരുന്നു. പ്രതിമാസം തോറുമുള്ള പ്രധാനമന്ത്രിയുടെ റേഡിയോ പ്രഭാഷണ പരിപാടിയായ മന്‍ കി ബാത്തിലാണ് മോദി കമ്മീഷനെ പ്രശംസിച്ചത്. ഇലക്‌ട്രോണിക് വോട്ടിംഗ് യന്ത്രത്തെ ചൊല്ലിയുള്ള വിവാദങ്ങള്‍ക്കു പിന്നാലെയാണ് മോദിയുടെ പ്രതികരണം.

തെരഞ്ഞെടുപ്പ് കമ്മീഷന്റെയും സുരക്ഷാ ഉദ്യോഗസ്ഥരുടെയും തെരഞ്ഞെടുപ്പ് നടത്തിപ്പ് ഏതൊരു ഇന്ത്യക്കാരനും അഭിമാനിക്കാവുന്നതാണെന്ന് മോദി പറഞ്ഞു. ഹിമാചല്‍ പ്രദേശില്‍ പതിനയ്യായിരം അടി ഉയരത്തിലുള്ള സ്ഥലത്ത് പോലും ബൂത്ത് തയാറാക്കുന്നത് കമ്മീഷന് അഭിമാനിക്കാവുന്ന നേട്ടമാണെന്നും മോദി കൂട്ടിച്ചേര്‍ത്തു.